Маңызды

«ШЫНЫ КЕРЕК, КЕҢЕСТІҢ БІРДЕ БІР ОТЫРЫСЫНА ҚАТЫСА АЛМАДЫМ»

Ал, Ұлттық қоғамдық сенім кеңесінен шығарылған өзге белсенділер не дейді?

Осы аптада Ұлттық қоғамдық сенім кеңесінің құрамы жаңарды. Аталған кеңес былтыр Қазақстан Республикасы Президенті Қасым-Жомарт Тоқаевтың Жарлығымен құрылған-тын. Бұл қазақстандықтар үшін күтпеген жаңалық болды. Сайдың тасындай 40-тан астам белсенді азаматтар іріктеліп алынған Ұлттық кеңес осыған дейін мемлекет басшысының төрағалығымен екі отырыс өткізіп үлгерді. Кеңестің үшінші отырысы үстіміздегі жылдың сәуіріне жоспарланған. Енді үшінші отырыс жаңа құраммен өткізілетін болады.

Кеңес құрамының жаңа өкілдері жұртшылылыққа жақсы таныс. Олар белгілі қоғам қайраткері, Қазақстан Республикасы Парламенті Мәжілісінің депутаты, Ауған соғысы ардагерлері ұйымдарының «Қазақстан ардагерлері» қауымдастығының төрағасы Бақытбек Смағұл, белгілі заңгер, Еуропалық құқық және адам құқықтары институтының директоры Марат Башимов, қоғам қайраткері, «Мазмұндама» ҚБ төрағасы Шыңғыс Мұқан, Қазақстанның жаңартылатын энергетика қауымдастығының бас директоры Арман Қашқынбеков және «Талбесік» көпбалалы аналар қозғалысының жетекшісі, журналист Ләззат Қожахметова, заңгер, «Ізгілік елшісі» республикалық еріктелер қозғалысының жетекшісі Айнұр Сәбитова болып табылады.
Кеңес құрамынан адам құқықтары жөніндегі уәкіл Эльвира Әзімова, балалар омбудсмені Аружан Саин, бұрынғы бизнесмен-омбудсмен Болат Палымбетов, «Қазақстан барысы» қазақ күресін дамыту қорының қамқоршылық кеңесінің төрағасы Арман Шораев, саясаттанушы Бақытжан Бұқарбай, Қазақстан даму банкінің басқарушы директоры А. Әміртаев шығарылды.
Өз кезегінде Аружан Саин мұндай шешімді өз ықтиярымен қабылдағанын айтқан. Мұның себебін ол өзіне артылған жүктеменің тым көптігімен түсіндірген. Отандық сайтқа берген мәлімдемесінде ол тіпті уақытының тығыздығына байланысты Ұлттық қоғамдық сенім кеңесінің бірде бір отырысына қатыса алмағанын жеткізген. Сонымен қатар ол, адам құқықтары жөніндегі уәкіл Эльвира Әзімованың да кеңестен шығуы жұмысының көптігінен болғанын атап өткен.
Кеңестен шығарылған кезекті тұлға А. Әміртаев ротация туралы «Ұлттық кеңестегі басқа азаматтардың атынан ештеңе айта алмаймын. Ал жалпы өз басым халықпен жақсы қарым-қатынас орнатуға тырыстым, — деп қысқа қайырады.
Ағымдағы жылдың 24-ақпанында Болат Палымбетовтың бизнес-омбудсмен лауазымында қызмет ету мерзімі аяқталған болатын. Оның кеңестен шығарылуын осы жағдаймен сабақтастыруға болатын сыңайлы.
Кеңестен шығарылғандардың бірі баспагер Бақытжан Бұқарбай. Ол осы ротация жасалғанға дейін Ұлттық кеңестен шығатынын мәлімдеген еді. Мұның себебі ретінде ол қоғам талқысына ұсынылған «Бейбіт жиындар туралы» Заң жобасының Президент тапсырмасына сай әзірленіп жатпағаны туралы мәлімдемені алға тартқан.
Дәл Бақытжан Бұқарбай сынды базынаны Арман Шораевта ашық айтқан. Ол zakon.kz сайтына берген мәлімдемесінде: «Менің кеңес құрамынан кетуімнің басты себебі – оны әу бастан пәлендей маңызы бар кеңес деп қабылдаған жоқпын. Ол іс жүзінде ештеңе шешпейтін жай ғана кеңес еді. Сосын мен ұлттық кеңестегі өз миссиямды орындадым. Өзім қойған міндеттерімнің бір бөлігі шешілді. Ары қарай өздері шешсін. Ұлттық сенім кеңесіне жаңа адамдар кірді, бұл қалыпты құбылыс. Оның үстіне, менің митингтер туралы заң жобасына қатысты жеке ұстанымдарым белгілі. Заң осы күйінде қабылданса – мен кеңес құрамында қалмаймын деп бірден айтқан болатынмын», -деген.
Белсенділер айтып жатқан «Бейбіт жиындар туралы» Заң жобасы әлі бекітілген жоқ. Ол қоғам талқысында. Жуырда еліміздің Ақпарат және қоғамдық даму министрі Дәурен Абаев бұл бүгін-ертең қабылданатын құжат емес, ол ұзақ процесс екенін қадап айтқан. Ендеше, Бақытжан Бұқарбай мен Арман Шораевтың заң жобасының қабылдануын күтпей, неге мезгілінен бұрын қолдарын бір сілтегені түсініксіз болып тұр. Шамасы олар кеңестен шығатыны туралы мәлімдемелері бұлайша тез орындалады деп ойламаса керек.
Өз кезегінде ҚР Президенті Ұлттық қоғамдық сенім кеңесі құрамының өзгеруін кеңес жұмысына жұртшылықты кеңінен тарту қажеттігімен түсіндірген.

А. САТЫБАЛДЫ.

Енді, денсаулық саласы қалалық білім басқармасы сынды жылдар бойы басшысыз қалмаса игі болар еді.

Осы аптада Асхан Байдувалиев Шымкент қалалық денсаулық сақтау басқармасы басшысы қызметінен босатылды. Күні кеше Шымкент қаласының әкімі Мұрат Әйтенов журналистерге осы жағдайға қатысты қойылған сұраққа «ол өз еркімен, отбасылық жағдайына байланысты кетіп жатыр»,- деп жауап қатты.

Асхан Байдувалиев бұл қызметке былтыр сәуір айында бекітілген еді. Жаңа қызметке тағайындалу кезінде оған сол кездегі қала басшысы Ғабидолла Әбдірахымов шаһарда денсаулық сақтау саласы бойынша үлкен проблемалар бар екенін, оны шешуде өзіне зор сенім артатынын айтқан болатын.
Одан кейін аз уақыт ішінде орысша сөйлеуге әбден жаттыққан жаңа басшы, қазақы қалың өңірдің денсаулық сақтау саласын жақсартуға кірісіп қана қоймай, мемлекеттік тілді меңгеруге де барын салып кеткенін байқатқан еді. Оған түрлі жиындар мен басқосуларды қазақ тілінде жүргізіп, өзіне бағытталған сұрақтарға қазақша жауап беріп жүретіні жарқын мысал болады. Бұл оның кез келген ортаға тез бейімделе білетін қасиеті мен білімділігінің белгісі екені сөзсіз.
Оның қызметтен кетіп бара жатқаны ресми түрде хабарланды. Дей тұрғанмен, ол өзі де желідегі парақшасында басқарма басшысы қызметінен кетіп жатқанын айтып, әріптестері мен қала тұрғындарына алғысын білдірген. Республикалық маңызы бар қалада жауапты қызметтің тұтқасын ұстаған осы уақыт ішінде, үлкен тәжірибе жинағанын да жасырмапты. Өз кезегінде желі қолданушылары экс- басшыға ақ жол тілеп, оның қызметі мен адамгершілігіне қатысты жылы пікірлерін жарысып жазуда.
Әзірге басқарма басшысы міндетін уақытша атқарушы болып бұған дейін басқарма басшысының орынбасары болған Тимур Варзилов тағайындалды. Енді бұл басқарманың басшысы орынтағы қай уақытқа дейін бос тұратыны белгісіз. Әйтеуір қалалық білім басқармасы сынды жылдар бойы басшысыз қалмаса игі болар еді.

«Уақыт».

Кешегі жағдай бойынша әлемде коронавирустан 3305 адам қайтыс болды. Өкінішке орай бұл санайғақ сәт сайын өзгеріп отыр. Вирусты 96888 адам жұқтырған. 53638 адам аурудан жазылған. Коронавирус әлемнің 90 мемлекетінде тіркеліп отыр. Жұқпалы вирус былтыр желтоқсанда тіркеліп, тоқтаусыз тарала бастады. Коронавирус тараған уақыттан бері Қазақстанда аурудың бірде-бір жағдайы тіркелген жоқ. Бірақ тиісті сақтық шаралары қолға алынып келеді.

Күні кеше ҚР Денсаудық сауқтау министрі Е. Біртанов сақтық шараларын былай деп саралады.
– Ауруды алдын алу үшін елімізде мерекелік шараларды өткізуге шектеу қойылып отыр. Конференция, байқаулар мен форумдар кейінге қалдырылуда. Себебі қандай бір жағдай болса біз карантин жариялаймыз. Сол кезде артық трафик жасамас үшін осындай шараларға барып отырмыз. Оңтүстік Корея, Қытай мен Иран азаматтарының елге кіруіне тыйым салынады. Қазір Қазақстанда 992 адам стационарлық және үй жағдайындағы карантинде жатыр. 7 515 адам тұрғылықты жерінде бақылауға алынған, олардың арасында Қазақстан азаматтары да, шетел азаматтары да бар.
60 адам коронавирус жұқтырды деген күдікпен ауруханаға жеткізілді. Оның ішінде 18 адам ауруханадан шығарылды.
Осылай деген министр, қазіргі таңда қоғам арасында коронавирус туралы түрлі расталмаған ақпараттарды таратпауға және сенбеуге шақырды. Ведомства басшысы денсаулық сақтау министрлігінің өкілеттілігіне қазақстандықтарды вирустан сақтану ғана емес, сонымен қатар дер кезінде ақпарат беру де кіретінін, сондықтан да қажетті ақпаратты дер кезінде тұрғындарға хабарлайтынын айтты.

Қ. ҚАЛИЕВ.

Түркістан облысындағы «Шардара су электр станциясы» АҚ жаңғыртудан өтті. Нәтижесінде станциядағы адам қолымен атқарылып келген бірқатар жұмыстар компьютер арқылы қашықтықтан орындалатын қауқарға жетті.
Соған сәйкес, мекемедегі 150-ден астам жұмысшылар саны 130-ға бір-ақ қысқарды. Жаңғырту жұмыстарының арқасында станцияның өнім қуаттылығы 26 пайызға өсті. Мәселен, жөндеу жұмыстарына дейін станция 100 МВт электр энергиясын өндіріп келсе, қазір өндіріс көлемі 126 МВт-қа жетіп, өңірді электр қуатымен қамту деңгейі 8 пайыздан 14 пайызға дейін артқан.
Бұл туралы Түркістан Өңірлік коммуникациялар қызметі мәлімдейді. «Шардара су электр станциясы» АҚ бас инженерінің орынбасары Нұрлан Амановтың айтуынша жаңғырту жұмыстары барысында станциядағы төрт бірдей генератор Германия елінің заманауи қондырғыларымен алмастырылған екен. Ол қондырғылар қоймадағы өндіріске қажетті жоғары кернеулі желідегі тоқтың күшін тұрақты ұстап тұруға мүмкіндік береді. Станцияны жаңғырту бағытындағы жобаның жалпы құны 75 миллион еуроны құраған.

М. ӘБДІРАЙЫМ.

1-наурыз – Алғыс айту күні. Қазақстан бұл күнді бесінші рет айтулы мереке ретінде өткізіп келеді. Қазақстандықтар арасындағы татулықты нығайтуға бағытталған «Алғыс айту» күні Шымкентте салтанатты жағдайда аталып өтті.

Қаладағы Қазақстан халқы Ассамблеясы ғимаратында өткен мерекелік шараға қала әкімі, мәслихат депутаттары, зиялы қауым өкілдері, жоғары оқу орындарының ректорлары, ұстаздар, этномәдени бірлестіктердің мүшелері, Ассамблея жанындағы қоғамдық құрылымдардың өкілдері және қала тұрғындары қатысты. Мерекелік іс-шара алдымен «Қазақ еліне мың алғыс!» монументіне гүл шоқтарын қоюмен бастау алды. Содан соң көпшілік Шымкенттегі 17 этномәдени бірлестік ұйымдастырған қолөнер бұйымдарының көрмесін тамашалады. Көрмеде Шымкенттен шығатын өнімдер де таныстырылды. Одан соң жұртшылық мерекеге орай әзірленген концерттік бағдарламаны тамашалады.
Онда Мұрат Әйтенов «Барлықтарыңызды бүгінгі айтулы күнмен құттықтаймын. Халқымызда «алтын – жер сыйы, алғыс – ел сыйы» деген қанатты сөз бар. Бұл мереке ортақ тарихымызға деген құрметтің, алтын шаңырақ – киелі қазақ жеріне деген ризашылықтың белгісі болып саналады. Шұғылалы көктемнің алғашқы күнінің алғыс айту мерекесі болып жариялануында үлкен мән бар. Барлық игілік риясыз көңілден, алғыс айтудан басталады»,- деді.
Содан соң көрерменге арнайы дайындалған қысқаша бейнефильм көрсетілді. Онда кеңестік дәуір кезінде Қазақстанға жер аударылған түрлі этностардың өткені мен бүгіні туралы кәрі тарих іздерінен сыр шертілді. «Қазақ еліне мың алғыс!» тақырыбында театрландырылған хореографиялық қойылым ұсынылды. Қаланың өнер майталмандары патриоттық әндерден шашу шашты.
Қаперіңізде болса, Қазақстан халқы бұл мейрамды алғаш рет 2016 жылы атап өтті. 2016 жылдың 14-қаңтарында сол кездегі Президент Нұрсұлтан Назарбаев Қазақстан халқы Ассамблеясының құрылған күнін, яғни, 1- наурызды Алғыс айту күні етіп жариялады. Бұл мерекенің астарында қазақ халқының бауырмалдығы, мейірімділігі мен қонақжайлық қасиеттеріне ризашылық білдіру жатыр. Себебі, Столыпин реформасы кезінде елге тұтас этностар депортацияланған. Сол шақта түрлі этнос өкілдері қазақ жеріне вагондармен жеткізілді. Бірақ оларды ешкім орнықтырмады. Жәй ғана ашық далаға әкеп тастады. Сол шақтарда қазақ халқы өз қолы өз ауызына әрең жетіп отырғанына қарамастан, оларды үйіне кіргізіп, қамқорлық танытты. XX ғасырдың басында Қазақстанға Беларусь, Ресей және Украинадан 1,1 миллион адам қоныс аударды. Ал 1930 жылдары ұжымдастыру барысында 250 мың шаруа жер аударылып, тағы 1,2 миллионға тарта адам өнеркәсіп нысандарын тұрғызуға келді. Олардың бәрі Қазақстанда орнығып, қиын кезеңдерді қазақ халқымен бірге еңсерді.

Биыл Шымкентте болатын бірқатар шаралар еріктілердің атсалысуымен өткізілетіні белгілі. Еріктілердің қоғам дамуындағы беталыстарына ерекше құрмет білдіру мақсатында Шымкент қаласы, Әл-Фараби ауданы әкімдігінде «Еріктілер кабинеті» ашылды. Аудан әкімдігінің ұйытқы болуымен ашылып отырған бұл кабинетте еріктілер бас қосып, олар алда атқаратын жұмыстарын пысықтайтын болады.
Өз кезегінде аудан әкімдігі еріктілердің көмегімен жүзеге асатын әлеуметтік, мәдени бағыттағы іс-шаралар мен тазалық акциялары бойынша орындалатын ауқымды жұмыстарды талқылап, жоспарын түземек.
Игі бастама туралы өзінің әлеуметтік парақшасында аудан әкімі Ғабит Мәуленқұлов «Құрметті волонтерлар, арнайы ашылған кабинетте көкейлеріңізде жүрген сауалдарыңызды ортаға салып, еркін түрде пікір алмасып, ұсыныстарыңызды жеткізуге болатынын және алға қойған мақсаттарға қол жеткізу үшін білімдеріңізді, күш-жігерлеріңізді ауданымыздың өсіп-өркендеуіне жұмсауға шақырамын»,-деп жазады.
Шымкенттік еріктілердің белсенділігі билік басындағы азаматтардың көңілінен шығып келеді. Еріктілер жыл басынан бері түрлі қоғамдық шараларға атсалысуға бастама көтеріп, қолдан келер мүмкіндіктерін көрсетуде. Кешеге аптада өткен жалпыхалықтық сенбілікте де еріктілер тазалық шараларын қолдайтынын сөзбен емес, іспен көрсете білді. Биыл «Шымкент – ТМД елдерінің мәдени астанасы» бағдарламасы аясында қалада өткізілетін шараларды тамашалауға шетелдік қонақтар күтіліп отыр. Осыған орай 300-ге жуық ерікті арнайы оқытудан өтеді деп жоспарланып отыр. Олар қаламызға келетін қонақтарды күту және бағыттаушы әрі көмек көрсетуші ретінде қызмет көрсетпек. Еріктілерге арнайы үлгідегі киімдер таратылып олардың жол жүру ақысы мен тамақтануы қарастырылады.

Әженің қолымен дайындалған жылы жұмсақ тағамның дәмі әрқашан ерекше. Шаңыраққа жылылық сыйлайтын әженің қолымен дайындалған дәм кез келген балаға қуаныш сыйлайтыны сөзсіз. Кейін балалық шақтағы сол бір жылымық дәурен адам жадында жылы естелік пен сағынышты сәттер ретінде сақталып қалатыны анық.
Көктемнің алғашқы айына тоғысқан «Алғыс айту» күні, Ұлыстың ұлы күні – Наурыз мерекелеріне орай ҚР Ішкі істер министрлігі Ұлттық ұлан жасақтарының №6698 әскери бөлімінде «Әже дәмі» атты іс-шара ұйымдастырылды.
Шымкент қалалық ардагерлер кеңесінің әжелер алқасының ұйытқы болуымен өткізілген шарада әжелер қауымы Отан алдындағы борышын өтеп жүрген сарбаздарға дастархан жайды. Әскери бөлімде жайылған кең дастархан әжелер қолымен әзірленген бешбармақ, құрт, май, ірімшік және бауырсақ сынды тағамдармен толтырылды. Дастархан басына жиналған сарбаздар бойға қуат беретін астан татып, санада сақталған балалық дәурендегі бал кезеңге тап болғандай күй кешті.
Одан соң Отан алдындағы борышын өтеп жүрген өрімдей азаматтарға шымкенттік әжелер Абай Құнанбайұлының әндері мен өлеңдерін айтып берді.
Басқосуға Шымкент қалалық ардагерлер кеңесінің төрағасы Исамудин Рысбаев пен еңбек ардагері Бекет Тұрғараев арнайы қатысты. Өмір жолдары өнегеге толы бұл азаматтар саптағы жас сарбаздарға үлкенге құрмет көрсету мен Отанға адал қызмет етудің маңызы жөнінде тағылымды әңгімелер айтты.
Бүгінде Шымкенттегі №6698 әскери бөлімінде 200-ден астам азамат Отан алдындағы борышын өтеп жүр. Сарбаздар еліміздің әртүрлі өңірлерінен келген.

Қазақстанда ел келешегіне тұтқа болатын өскелең ұрпақтардың дені сау, саламатты азаматтар болып бой түзеуіне үлкен мүмкіндік беретін игі қадамдар көптеп жасалып жатыр.
Себебі, өз елінің болашағын ойлаған кез келген мемлекет өскелең ұрпақ денсаулығына баса көңіл бөлетіні анық. Шымкенттегі барлық мектептердің медициналық кабинеттерінің жаңартылып жатқаны соның жарқын мысалы. Кабинеттер жаңа қондырғылармен де жабдықталуда. Соған сәйкес, медбикелер мектеп ішінде мазасы қашқан кез келген оқушыға алғашқы дәрігерлік көмекті көрсететін болады.
Медициналық кабинеттерді жаңарту жұмыстары үшін «Әлеуметтік медициналық сақтандыру қоры» КЕАҚ-нан 1 млрд. теңге қаржы қаралған.
Қалалық денсаулық сақтау басқармасы мектептерде көрсетілетін алғашқы медициналық көмектің сапасын жақсартуға баса көңіл бөліп отыр. Бұл үшін медбикелерге артылған жүктемені азайту тетігін қарастыруда. Бұған дейін бір медбикеге 1 мың оқушы бекітілген болса, енді олардың саны 500-ге дейін азаймақ. Соның негізінде келешекте қосымша мамандар жұмысқа қабылданады.

Шымкентте тұңғыш рет «Көрпе FEST» фестивалі өткізілді. Аптаның сәрсенбісінде басталған шара екі күнге жалғасып, бүгін қорытындыланады. Шымкент қаласы әкімдігінің қолдауымен өткізілген іс-шара аясында 300 қыз- келіншек тігін және қолданбалы өнерді тегін үйренеді. Оларға «Құрмет» ордененің иегері, «Алтын сапа» сыйлығын жеңіп алған «Алтын орда» авторлық дизайн үйінің негізін қалаушы Ырза Тұрсынзада шеберлік сабақтарын өткізеді.

Осылайша ине мен жіпті жанына серік еткен нәзік жандылар, қолөнерді заманауи технология тілімен үндестіріп ісін өрге сүйреп жүрген Ырза Тұрсынзада арқылы мүмкіндіктерін молайтуға қол жеткізетін болады.
Көрме-байқау жеңімпаздары мен семинарға қатысушыларға сертификат және «Аманат» сыйлығы тапсырылады. Өз кезегінде Ырза Тұрсынзада бұл шара әйелдердің шеберлігін арттырып қана қоймай, олардың бойына ерекше сенімділік дарытып, жаңа іске бет бұруына, соның негізінде қалада жұмыссыздықтың азаюына жол ашады деп сенеді. Бұл туралы ол «Әйел қоғамға, отбасыға пайда әкелетін іспен айналысуы керек. Құрақ құрау әйел адамды сабырлы, көркем мінезді болуға тәрбиелейді. Әртүрлі нақышта тігін тігу арқылы әйелдің шынайы болмысы қалыптасады. «Көрпе — фест» шарасы көп балалы аналардың отбасының басы-қасында, балаларының ортасында болып-ақ, өзінің сүйікті ісімен айналысуына және табыс табуына үлкен жол ашады»,- деп пікір білдірді.

Бүгінде Шымкент аумағында «Оңтүстік» және «Тассай» индустриалды аймақтары жоспарлы түрде жұмыс істеп жатыр. Ол жерде 72 жоба бойынша өндіріс өркен жайған. Жобаларды іске асыру үшін тартылған инвестициялар көлемі 64 млрд. теңгені құрайды. Қазіргі таңда 4 мыңнан астам адамды жұмыспен қамтыған ол индустриалды аймақтардағы кәсіпорындар есебінен өткен жылы бюджетке 13,4 млрд. теңге түсім түскен. Бүгінде онда бос жер жоқ. Осыған орай алдағы үш жылда 2 индустриалды аймақ құрылып, олардың саны көбейе түспек. Оның бірінші «Жұлдыз», екіншісі «Агроиндустриалды аймағы» болып табылады. Алғашқысының техникалық негіздемесі әзірлену үстінде. Ал екіншісінің жобалық-сметалық құжаттары реттелуде.
Естеріңізде болса, өткен айда қала әкімі Мұрат Әйтенов 2019 жылы атқарылған жұмыстарды қорытындылаған халыққа есеп беру жиынында осылай деген болатын. Өз кезегінде ол іске қосылатын бұл индустриалды аймақтарда 40-қа жуық жобаларды жүзеге асыру үшін инвесторлар қызығушылық танытып жатқанын мәлімдеген.
Бұл бағытта нәтижелі жұмыстарға қол жеткізу мақсатында осы аптада Шымкент қаласының әкімі Мұрат Әйтенов Еуропалық Одаққа мүше елдердің елшілерімен кездесті. Кездесуге Германия, Франция, Латвия, Австрия, Финляндия, Швеция, Хорватия, Испания, Латвия, Румыния, Словакия, Чехия, Нидерланды елшілері қатысты.
Басқосуда тараптар сауда-экономикалық өзара іс-қимылдың өзекті мәселелері бойынша пікір алмасты. Кездесу барысында шаһар басшысы қаладағы инвестициялық жағдайды одан әрі жақсарту бойынша атқарылған және алдағы уақытқа жоспарланған жұмыстарды атап өтті. Сонымен қатар ол, «Шымкентте қолайлы инвестициялық климат құрылған, сондай-ақ, бизнесті дамытудың тиісті жолдары қарастырылған. Шымкенттің географиялық орналасуы мен климаты бизнесті жүргізуге таптырмас орын. Біз инвестициялық жобаларды іске асыруда жұмыла жұмыс істейміз»,-деп атап өтті.
Еуропалық Одаққа мүше елдердің елшілері Шымкентке келген сапары барысында қаладағы бірнеше ірі өндіріс орындарының ішкі жұмысымен танысты. Мақсат – қаланың инфестицияны қолдану мүмкіндіктеріне көз жеткізіп, өз елдерінен инвесторлар тарту болып табылады. Дипломаттар әуелі дәрі-дәрмек өндірісі жолға қойған «Химфарм» АҚ-на бас сұқты. Ондағы қарқынды жұмыспен танысқан соң, «Шымкент Цемент» АҚ-да табан тіреді. Бәсекеге қабілетті ірі кәсіпорынның жұмысын делегаттар оң бағалады. Содан соң «Азия трафо» зауытының тынысын байқады. Түтіні түзу шығып тұрған кәсіпорындардың жұмысымен танысқан делегат мүшелері қала туралы жылы пікір білдірді. Өз кезегінде Еуропалық Одақтың Қазақстандағы елшісі Свен-Олов Карлсон «Қазақстан табиғи-минаралды ресурстарға өте бай мемлекет. Бүгінгі сапар барысында Қазақстанның осы мүмкіндікті тиімді пайдаланып отырғанын айқын аңғардық»,-деді. Ал Германияның Қазақстандағы елшісі Тило Йоханнес Клиннер болса «Шымкентке келген бүгінгі делегаттар құрамында болғаныма қуаныштымын. Қала жаңа мүмкіндіктерді іздеп, инвестиция тартуға әбден лайық. Осы бағытта қарап жатпай, өзіндік үлес қосуды маңызды міндет деп санаймын»,- деп атап өтті.
Ендеше, еліміздің үшінші қаласына келген елшілердің бұл сапары талай ілкімді істердің ұйытқысына айналуы әбден мүмкін.