ЕТ БАҒАСЫНЫҢ КҮРТ ҚЫМБАТТАУЫ МҮМКІН БЕ?

Қазіргі таңда Қазақстан нарығында сиыр етінің орташа бағасы килограмына 3 800 теңге төңірегінде сатылып жатыр. Ел арасында ет өнімдерінің қымбаттауына қатысты түрлі әңгімелер жиі айтылғанымен, Ауыл шаруашылығы министрлігі бұған алаңдауға еш себеп жоқ екенін жеткізді. Жауапты ведомство өкілдерінің пайымынша, бүгінде елде ет бағасын аспандатып, күрт өсіретіндей салмақты факторлар мүлде жоқ.

Үкімет үйінде өткен арнайы брифингте Ауыл шаруашылығы вице-министрі Назгүл Хатепова министрліктің ет бағасының құбылуын күн сайын бақылауда ұстап, тұрақты мониторинг жүргізіп отырғанын айтты. Оның сөзінше, тіпті бас қала Астананың өзіндегі сауда орындарында сиыр етінің бағасы әртүрлі болып қалыптасқан. Мәселен, елордадағы халық жиі баратын «Шапағат» базарында сиыр етінің килограмы шамамен 3 500 теңгеден сатылса, «Артем» базарында бұл көрсеткіш 4 400-4 500 теңге көлемін құрайды. Десе де барлық өңірлерді тұтас алғанда, республика бойынша сиыр етінің орташа бағасы келісіне 3 800 теңге деңгейінде тұрақталып отыр.
Вице-министр сонымен қатар еліміздің ішкі нарығы отандық сиыр етімен толық әрі жеткілікті көлемде қамтамасыз етілгенін баса айтты. Бұл ретте нақты сандарды алға тартқан ол өткен жылдың қорытындысы бойынша елімізде 434 мың тонна сиыр еті өндірілгенін еске салды. Сонымен бірге биылғы жылдың алғашқы 8 айының қорытындысы да көңіл қуантады. Ет өндірісінің көлемі өткен жылмен салыстырғанда арта түскені байқалады. Сондай-ақ республикада төрт түлік мал басының да біртіндеп көбейіп келе жатқаны байқалады. Осы орайда министрлік өкілі елдегі ет қоры жеткілікті болғандықтан, алдағы уақытта сиыр етінің бағасы шарықтап кетеді деп болжауға ешқандай негіз де, себеп те жоқ екенін айтып, оқырманды сендірді.