ҮКІМЕТТІК ЕМЕС ҰЙЫМ ӨКІЛДЕРІМЕН КЕЗДЕСУ ӨТТІ
Қоғамдық келісімді бекемдеу мен конституциялық реформаларды тереңдетуге бағытталған мемлекеттік саясат аясында үкіметтік емес ұйымдар өкілдерінің қатысуымен келелі басқосу өтті. «Қазақстанның жаңа Конституциясынан нақты қадамға: реформалар дәуіріндегі әлеуметтік бірлік пен құқықтық тәртіп» деп аталған бұл кездесу әділеттілік пен заң үстемдігін орнықтыру, азаматтардың құқықтары мен бостандықтарын қорғау тетіктерін іс жүзінде ширата түсуді мақсат етті.
Сондай-ақ алқалы жиында Әділетті Қазақстанды құру жолындағы азаматтық қоғам институттарының рөлін арттыру мәселелері кеңінен қарастырылды. Басқосуға жиналғандар елдің саяси жаңғыруындағы темірқазыққа айналған жаңа Ата Заңның әлеуетін жоғары бағалап, бүгінде заңнаманы жетілдірумен қатар, оны күнделікті өмірде тиімді қолдануға ерекше серпін беріліп жатқанын тілге тиек етті. Осы орайда, құқықтық мәдениетті биіктетіп, ел ішіндегі ынтымақты сақтауда мемлекеттік органдар мен үкіметтік емес сектордың бірлескен күш-жігері ауадай қажет екені айтылды.
Еркін пікір алмасу алаңында үкіметтік емес ұйымдардың жетекшілері мен белсенділері адам құқығын қорғау, жастарды қолдау, еріктілер қозғалысын өрге сүйреу және ұлтаралық татулықты нығайту бағытындағы өздерінің тәжірибелерімен бөлісті. Әсіресе, халықтың құқықтық санасын қалыптастыру, азаматтық белсенділікті ояту және мемлекеттік институттармен арадағы алтын көпірді бекіте түсу мәселелеріне басымдық берілді. Ашық әрі сындарлы жүрген дидарласу барысында қатысушылар реформаларды өміршең етудің өзекті тұстарын талқылап, алдағы уақыттағы ынтымақтастықтың жаңа үлгілерін ортаға салды.
