ЖЫЛ БАСЫНАН БЕРІ 52 АДАМ ӨРТТЕН МЕРТ БОЛДЫ

Жыл басынан бері елімізде 1 мыңнан астам өрт шығу фактісі тіркелді. Бұл туралы Төтенше жағдайлар министрлігі өртке қарсы қызмет комитеті төрағасының міндетін атқарушы Ерлан Төрегелдиев мәлім етті.

Спикердің сөзінше, министрлік өртке қарсы белсенді профилактикалық жұмысты жалғастырып жатыр, әсіресе қыс мезгілінде, яғни жылу маусымында өрт қаупі арта түседі. Өрттің негізгі себептері — пештің ақаулығы, жылыту құрылғыларын дұрыс пайдаланбау және электр желілерінің шамадан тыс жүктелуі. 2025 жыл басталғалы ел аумағында тұрғын үй секторында 1 138 өрт шықты, тілсіз жаудан 313 адам құтқарылды. Қайғылы апат та болды, 52 адам өрттен қаза болды, оның ішінде 6 бала көз жұмды. Одан бөлек, өрттен 50 адам түрлі жарақат алған, оның ішінде 8 бала бар. ”22 қаңтарда СҚО Шал ақын ауданы Ступенко ауылында тұрғын үйден өрт шығып әкесі мен 4 бала қаза тапты. Өрт электр құралдарының қысқа тұйықталуынан болды. 2 қаңтарда Жетісу облысының Текелі қаласында тұрғын үйде пешті дұрыс орнатпау себебінен өрт шығып, 3 адам қаза тапты” деді спикер.
Айта кету керек, өрттің алдын алу және оны болдырмау мақсатында өрт қауіпсіздігі талаптарын сақтау өте маңызды. Бұл талаптар тұрғын үйлерде, қоғамдық орындарда, өндіріс орындарында және табиғи аймақтарда қатаң сақталуы тиіс.