КҮН САЙЫН КӘМЕЛЕТКЕ ТОЛМАҒАНДАР АРАСЫНДА ШАМАМЕН 5 ҚЫЛМЫС ЖАСАЛАДЫ
Соңғы жылдары Қазақстанда жасөспірімдер арасындағы қылмыс деңгейінің өсуі қоғамды алаңдататын мәселеге айналды. Бұл жағдай әлеуметтік, экономикалық және отбасылық факторларға тікелей байланысты. Жастар арасында құқық бұзушылықтың көбеюі болашақ ұрпақтың қауіпсіздігіне, елдің дамуына кері әсерін тигізеді.
Осы орайда, ҚР Бала құқықтары жөніндегі уәкіл Динара Зәкиева мектеп оқушылары арасындағы қатыгездік оқиғаларына қатысты пікір айтты. Нақтырағы “Күн сайын елімізде кәмелетке толмағандар арасында шамамен 5 қылмыс анықталып отырады. Балалар арасында қылмыстардың жасалуы себебіне тоқталсақ, олар негізінен буллингке, ұрлық, сондай-ақ экономикалық сипаттағы әрекеттерге қатысты. Бұл ретте, осыған ықпал еткен факторларға назар аударсақ, осы балалар ата-анасының назарынан немесе қамқорлығынан тыс қалған. Мұнымен қоса, өздері зорлық-зомбылық көрген және осындай оқиғалардың куәгері болған жеткіншектер де кейіннен заңсыз әрекеттерге барып жатады. Сондықтан қабылданған заңға сәйкес, алдын алу іс-шаралары қарастырылған. Осы орайда, құрылған мобильді топтарға қиын жағдайдағы отбасыларды, зорлық-зомбылық әрекеттері бар отбасыларды анықтау міндеті жүктелген. Мәселен, маусым айынан бері 45 мың отбасы анықталып, 1800 отбасы жан-жақты сүйемелдеу жұмыстарымен қамтылып отыр” деді Динара Зәкиева Парламент Мәжілісінде тілшілер сұрағына жауап бере отырып.
Оның айтуынша, отбасыларды қолдау орталықтары ашылды. Қазір өңірлерде осындай 112 орталық жұмыс істеп тұр, енді тағы 109-ы іске қосылады. Жалпы профилактикалық нормалар отбасылармен жұмыста маңызды рөл атқарады. Бұл ғана емес, қыркүйек айынан бері мектептерде қауіпсіздік сабағы енгізілді. Бұл сабақта 130 тақырып қамтылған. Олардың ішінде балаларға жауапкершілік мәселесі түсіндіріледі. Қош делік, өскелең ұрпақты елдің болашағына балайтын халықпыз ғой. Әйткенмен мынадай жағдайдың жиілеуі ұрпаққа ғана емес, тұтас ұлтқа қауіп төндірмек. Сондықтан алдын алу шараларының маңызы да, міндеті де зор болмақ.
