СУ ТАСҚЫНЫМЕН КҮРЕСУ ҮШІН 360 АРНАЙЫ ТЕХНИКА ДАЙЫНДАЛДЫ

Көктем мезгілі келген сайын Қазақстанда су тасқыны қаупі артады. Әсіресе, қардың күрт еруі, өзендердің арнасынан асуы және жаңбырлы маусым елдің солтүстік, шығыс және орталық аймақтарында су басу қаупін тудырады. Сондықтан мемлекет жыл сайын тасқынның алдын алу және оның салдарын азайту бағытында арнайы дайындық жұмыстарын жүргізеді.

Биыл да дайындық жұмыстары қарқын алған. Мәселен, «Қазсушар» кәсіпорнының облыстық филиалдары су тасқынымен күресу үшін 360 арнайы техника дайындап қойды. Су ресурстары және ирригация министрлігінде су тасқынына қарсы іс-шараларды үйлестіру жөніндегі жедел штаб отырысы да өтті. Айтылған дерекке ойыссақ, 32,7 мың тоннадан астам инертті материал дайындалды және гидротехникалық нысандардың 200 шақырымнан астам кірме жолдары қардан тазартылды. Министрлік «Қазсушар» филиалдарының материалдық-техникалық базасын жақсарту үшін Үкіметтің қолдауымен 757 бірлік арнайы техника мен көлік сатып алуды бастады. Бүгінгі таңда кәсіпорын филиалдарына 200-ден астам арнайы техника жеткізілді. «Арнайы техника және инертті материалдар қоры төтенше оқиға туындаған жағдайда қажет. Барлық су шаруашылығы нысандарында «Қазсушар» мамандары тәулік бойы кезекшілік жүргізеді және су қоймалары мен өзендердегі су деңгейін бақылап отыр. Сонымен қатар, кәсіпорын қызметкерлері еліміздің бірқатар облыстарында 1147 шақырым каналды механикалық тазалап, 230 гидротехникалық құрылысты жөндеді» деді Су ресурстары және ирригация вице-министрі Ерболат Ибрайханов.
Су тасқыны – Қазақстан үшін жыл сайынғы табиғи сынақтардың бірі. Оған қарсы күрес уақытылы дайындық пен тиімді шараларды талап етеді. Мемлекеттік органдар, құтқару қызметтері және жергілікті халық бірлесе әрекет еткенде ғана табиғи апаттың зардабын азайтуға болады. Сондықтан су тасқынына дайындық жұмыстарын үнемі жетілдіру – ел қауіпсіздігі үшін аса маңызды.