ҚАЛА ӘКІМІ АБАЙ АУДАНЫНЫҢ ТҰРҒЫНДАРЫМЕН КЕЗДЕСУ ӨТКІЗДІ

Шымкент қаласының әкімі Ғабит Сыздықбеков халықпен тығыз байланыс орнатуға ерекше көңіл бөлуде. Шаһар басшысы қала тұрғындарымен көшпелі кездесулер өткізіп, олардың өзекті мәселелерін тыңдап, шешу жолдарын қарастыруда. Мұндай кездесулер – халық пен билік арасындағы ашық диалогтың тиімді форматы.

Осы орайда, жуырда Шымкент қаласының әкімі Ғабит Сыздықбеков Абай ауданы тұрғындарымен кездесті. Шымкент Сити, Асар, Ақжайық, Ынтымақ, Тұран және Қызылжар шағынауданының жергілікті халқы мегаполистің дамуына қатысты өзекті мәселелерді көтеріп, маңызды ұсыныстарын білдірді. Кездесу барысында әлеуметтік нысандардың, әсіресе балабақша мен емханалардың тапшылығы сөз болды. Сондай-ақ тұрғындар балалар мен спорт алаңының және пандустың жетіспеушілігін айтып, кейбір көшелерде су ағатын жүйенің, бейнебақылау камераларының, жол белгілері мен жаяу жүргіншілер өткелінің жоқ екенін алға тартты. Бұдан бөлек, қоғамдық көлік кестесі, коммуналдық төлем және инфрақұрылым тарту мәселелері де талқыланды. Кездесу барысында қала әкімі тұрғындарды тазалық сақтауға шақырып, жылдар бойы шешімін таппай келген түйткілді мәселелердің кезең-кезеңімен ретке келтірілетінін атап өтті. Мысалы, жыл соңына дейін қала көшелерін толық жарықтандырып, жол сапасын 100 пайызға жеткізу жоспарланып отыр. Кездесу қорытындысы бойынша тұрғындар көтерген мәселелер жан-жақты сараланып, жүйелі шешу мақсатында нақты іс-шаралар жоспары әзірленеді.
Айта кету керек, көшпелі кездесулердің басты мақсаты – тұрғындардың мәселелерін жергілікті жерде қарастыру және шұғыл шешімдер қабылдау. Бұл кездесулерде инфрақұрылым, қоғамдық көлік, тұрғын үй, абаттандыру, су және электрмен қамтамасыз ету, жол жөндеу сияқты маңызды тақырыптар талқыланады. Әкім әр аудан мен шағынауданға барып, халықтың ұсыныстарын тыңдап, жергілікті билік өкілдеріне нақты тапсырмалар береді. Мұндай формат тұрғындардың билікке деген сенімін арттырып, олардың пікірін ескеру арқылы қаланы дамытуға мүмкіндік бермек.