МАКРОЭКОНОМИКАЛЫҚ КӨРСЕТКІШТЕР ЖОҒАРЫЛАП КЕЛЕДІ
Шымкент – Қазақстанның үшінші мегаполисі, қарқынды дамып келе жатқан ірі экономикалық және мәдени орталық. Соңғы жылдары қала халықаралық байланыстарды нығайтып, шет мемлекеттермен сауда-экономикалық, мәдени және инвестициялық әріптестікті дамытуда белсенді қадамдар жасауда. Сонымен қатар қаланы дамыту мақсатында да бірқатар ауқымды бастамалар көтеріліп, сәтті жүзеге асырылып келе жатыр. Ал атқарылған жұмыстар жайы қала әкімінің тікелей бақылауында десек, артық айтпаған болар едік.
Осы орайда, жуырда қала әкімі Ғабит Сыздықбековтің төрағалығымен өткен аппараттық мәжілісте Наурыз айындағы мерекелік бағдарламалар, макроэкономикалық көрсеткіштер, қоршаған ортаны қорғау мәселелері талқыланды. Ғабит Әбдімәжитұлы жауаптыларға Наурызнама онкүндігін сапалы ұйымдастыруды, алаңдарда халықтың қауіпсіздігін ескеруді қатаң тапсырды. Бұдан бөлек, жиында Экономика және бюджеттік жоспарлау басқармасының басшысы Е.Есқараев макроэкономикалық көрсеткіштерді баяндап, оң өсім қалыптасып отырғанын атап өтті. Айтуынша, өткен жылы қалаға тартылған инвестиция көлемі 12, құрылыс жұмыстары 14, пайдалануға берілген тұрғын үй алаңы 26, сауда көлемі 20, көлік қызметі 27, өнеркәсіптегі өнім көлемі 3 пайызға артты. Өңірлер арасында сауда, көлік, пайдалануға берілген тұрғын үй көлемі бойынша көрсеткіштер өсімі алдыңғы үштікке енді. Нәтижесінде, қала экономикасының қысқа мерзімді өсімі 11,7 пайызды құрап, республикада орташа көрсеткіштен жоғары болып, өңірлер арасында 5-орынға ие болды. Биылғы қаңтар-ақпан айларында да мегаполис дамуында өсу қарқыны бар. Бұл ретте қала басшысы сандардың шынайылығын басшылыққа алып, ең бастысы халықтың өмір сапасын жақсарту шараларын сапалы атқару бойынша нақты тапсырмалар берді.
Сондай-ақ жиында қаланың экологиялық мәселелерін шешу бойынша қабылданған Жол картасы аясында атқарылған жұмыстар баяндалды. Жауапты сала басшыларына өзекті мәселелер бойынша заң аясында шешім қабылдап, бірлесе жұмыс жүргізу тапсырылды. Қала әкімі шалғай елді мекендердегі шешімін күткен проблемаларға да тоқталып, көшпелі кездесулерде көтерілген өзекті мәселелерді халықпен кері байланыс жасау арқылы шұғыл шешуді тапсырды.
