ҰЛТТЫҚ ҚҰРЫЛТАЙ ҰТЫМДЫ ҰСЫНЫСТАР АЛАҢЫНА АЙНАЛЫП КЕЛЕДІ

биылғы жиында қандай мәселелер
сөз болды?

Қазақстандағы маңызды саяси және қоғамдық оқиғалардың бірі – Ұлттық құрылтайдың IV отырысы биыл Бурабайда өтті. Бұл құрылтай – қоғамның өзекті мәселелерін талқылап, ел дамуының жаңа бағыттарын айқындайтын маңызды алаң. Президенттің бастамасымен құрылған бұл жиын азаматтық қоғам мен билік арасындағы ашық диалогты қамтамасыз етіп, халықтың көкейінде жүрген сұрақтарға жауап беруді мақсат етеді.

Биылғы құрылтайда саяси реформалар, экономикалық даму, әлеуметтік әділеттілік, ұлттық бірегейлік, жастар мәселесі және экология сынды тақырыптар кеңінен талқыланды. Бұл мәселелердің барлығы Қазақстанның болашақтағы тұрақты дамуы мен халқымыздың әл-ауқатын арттыруға бағытталған бастамалармен толықтырылды. Ұлттық құрылтай қоғам мен мемлекеттің өзара ықпалдастығын күшейту, елдің өзекті мәселелерін ашық талқылау және шешу жолдарын ұсыну мақсатында ұйымдастырылатыны бесенеден белгілі. IV құрылтайдың Бурабайда өтуі кездейсоқ емес. Бұл аймақ — Қазақстанның тарихи-мәдени орталықтарының бірі, ел бірлігінің символы ретінде танылған мекен. Маңызды жиынға мемлекет басшысы, үкімет мүшелері, қоғам қайраткерлері, ғалымдар, жастар өкілдері және түрлі сала мамандары қатысты. Құрылтай барысында әртүрлі салалардағы сарапшылар елді толғандырып отырған мәселелерді көтеріп, олардың шешу жолдарын ұсынды.
Құрылтайдың басты тақырыптарының бірі – саяси реформаларды жалғастыру және азаматтық қоғамды нығайту болды. Жергілікті басқару жүйесін жетілдіру мәселесі көтерілді. Қоғам белсенділері әкімдерді сайлау тәжірибесін кеңейту, жергілікті биліктің жауапкершілігін арттыру қажеттігін атап өтті. Құқықтық жүйені жаңғырту, әділ сот билігін қамтамасыз ету туралы бастамалар ұсынылды. Азаматтардың құқықтарын қорғау және жемқорлыққа қарсы күресті күшейту жайлы нақты ұсыныстар жасалды. Бұдан бөлек, Қасым-Жомарт Тоқаев Ұлттық құрылтай мүшелері тарапынан көтерілген қоғамдық әдепті реттеу, теріс ағымдар мен ұлттық болмысымызға жат идеологияларға, түрлі алаяқтық әрекеттерге тосқауыл қою, отандық кино және анимация өндірісіне идеологиялық тұрғыдан мән беру, әйелдер колониясындағы жағдайды түзеп, қылмыстық-атқару жүйесіндегі заңнаманың жүкті немесе кәмелет жасқа толмаған балалары бар әйелдерге қатысты тұсын қайта қарау, кәсіптік-техникалық колледждерді дамыту ісінде жаңа мамандықтарға сұраныс пен еңбек нарығындағы жағдайды ескеру секілді өзекті мәселелерге қолдау білдіріп, өз ойын ортаға салды.
Мемлекет басшысы ономастика саласын, мемлекеттік және мекемелік марапаттар жүйесін жетілдіру, жасампаздық құндылықтарды дәріптеу, әлеуметтік кеселдерді жою, азаматтық қоғамды дамыту бағытында атқарылып жатқан жұмыстың кемшін тұстарына назар аударып, ішкі саясаттағы ауқымды идеологиялық жұмысты жүйелейтін біртұтас тұжырымдамалық құжат әзірлеуді тапсырды. Сонымен қатар Президент ұлттық бірегейлігімізді нығайту жолында мәдениет саласы айрықша рөл атқаратынын айтты. Қасым-Жомарт Тоқаев елімізде театр өнеріне деген қызығушылық өсіп келе жатқанын алға тартып, өңірлердегі театрларды дамытуға әрі бұл іске бизнес өкілдерін белсенді атсалысуға шақырды. Сондай-ақ Абай Құнанбайұлының 180 жылдық мерейтойы қарсаңында Абай институтын Конфуций, Гете, Сервантес институттары сияқты халықаралық деңгейдегі мәдени-ағарту мекемесіне айналдыру үшін Сыртқы істер министрлігі мен «Отандастар» қорына Мәдениет және ақпарат министрлігімен бірлесіп, шетелде осындай орталықтар ашу бойынша тиісті жұмысты жалғастыруды тапсырды. Президенттің пікірінше, еліміз тәуелсіздіктің 40 жылдығына қандай жетістікпен жететінін, оған дейін қандай тарихи міндеттердің орындалуға тиіс екенін нақты білу маңызды. Бұл ретте Мемлекет басшысы цифрландыру мен жасанды интеллектіні, энергетика, агроөнеркәсіп секторын және адам капиталын Қазақстанның жаңа әлемдегі орнықты дамуына жол ашатын негізгі факторлары ретінде атады.
IV Ұлттық құрылтай Қазақстанның әлеуметтік, саяси, экономикалық және мәдени дамуының жаңа бағыттарын айқындауға көмектесті. Мұнда көтерілген мәселелер елдің болашағы үшін маңызды стратегиялық шешімдер қабылдауға негіз болмақ. Құрылтайда көтерілген бастамалар тек талқылаумен шектелмей, оларды нақты жүзеге асыру үшін үкімет пен қоғам бірлесе жұмыс істеуі тиіс. Осы жиында ұсынылған реформалар Қазақстанның дамуын жаңа деңгейге көтеруге ықпал ететін маңызды қадамдар болары сөзсіз. Ұлттық құрылтай елдің өркендеуіне, халықтың әл-ауқатын арттыруға және ұлттық бірегейлікті нығайтуға үлес қосатын маңызды диалог алаңы ретінде өз жұмысын жалғастыра бермек!

Қ.ДӘУЛЕТӘЛІ.