БЫЛТЫР ҚАЗАҚСТАН ҚАНША ТОННА ЕТ ЭКСПОРТТАДЫ?

Қазақстан – мал шаруашылығы жақсы дамыған елдердің бірі, сондықтан ет өндірісі мен экспорты ел экономикасының маңызды салаларының бірі саналады. Кең байтақ жайылымдық жерлер, табиғи тұрғыда қоректенетін мал және еттің жоғары сапасы Қазақстанды ет экспорттаушы ел ретінде үлкен әлеуетке ие мемлекетке айналдырады.

Осы орайда, елімізде өткен жылы 1 млн 235 мың тоннадай ет өндіріліп, оның 102 мың тоннасы экспортталған. Ішінара тарқатсақ, 2024 жылы ішкі нарықта ет өнімдерін өткізу көлемі келесідей болған. Сиыр еті – 419,6 мың тонна, жылқы еті – 173,7 мың тонна, қой мен ешкі еті – 131,3 мың тонна, шошқа еті – 57,8 мың тонна және құс еті – 452,4 мың тонна. Жалпы мөлшері 1 млн 234,8 мың тонна ет өндірілген.
Сондай-ақ ведомство 2024 жылы елден шығарылған ет көлемін де мәлімдеді. Оны тарқатар болсақ, 22,1 мың тонна ірі қара мал еті шығарылды. Оның ішінде негізгі импорттаушы елдер — Өзбекстан – 20,7 мың тонна, Тәжікстан – 609 тонна, Иран – 298,4 тонна, Қырғызстан – 295,0 тонна. Сонымен қатар 17,6 мың тонна қой еті шығарылды. Оның ішінде негізгі елдер — Өзбекстан – 13,8 мың тонна, ОАЭ – 1,2 мың тонна, Иран – 1,1 мың тонна. Бұдан бөлек, 0,2 тонна жылқы еті Ресей Федерациясына экспортталған. Бұл ғана емес, 42 мың тонна тауық еті де шет мемлекеттерге сатылған. Оның ішінде негізгі елдер — Ресей – 25,7 мың тонна, Қырғызстан – 12,5 мың тонна, Өзбекстан – 1,6 мың тонна, Тәжікстан – 1,5 мың тонна.

Ж.БАЛАУСА.