ЕЛІМІЗДЕ 5,8 МЛН-ҒА ЖУЫҚ АВТОКӨЛІК БАР

ал ескі көліктердің көрсеткіші қандай?

Жыл өткен сайын автокөлік нарығы кеңейіп, жаңарып келеді. Бұл үрдістен біз де айналып өте алмасымыз анық. Сәйкесінше, қазіргі уақытта жаңа көлік сатып алғысы келетіндерге айтылар ұсыныс артып, қойылар талап жеңілдеп келеді. Нәтижесін ресми деректер көрсетіп отыр. Мәселен, елімізде ақпан айында 149,2 мың автокөлік құралдары есепке қойылған. Бұл туралы Ұлттық статистика бюросы хабарлады.

Бұл көрсеткіш өткен жылдың сәйкес кезеңімен салыстырғанда 9,2 пайызға артық. Оның ішінде жеңіл автомобильдер саны 8 пайызға, жүк автомобильдері 26,2 пайызға артса, ал автобустар 6,8 пайызға кеміді. 2025 жылғы 1 наурыздағы жағдай бойынша Қазақстанда тіркелген автокөлік құралдарының саны 5 млн 791,7 мың болды, оның ішінде 88,1 пайызы — жеңіл автомобильдер, 9,9 пайызы — жүк автомобильдері және 2 пайызы — автобустар.
Айта кетейік, елімізде 2024 жылдың қаңтар-желтоқсан айларында барлығы 1 млн 836 мың автокөлік тіркелген. Олардың басым бөлігі желтоқсан айында есепке қойылған екен. Сонымен қатар елімізде әлі де ескі көліктер саны басым. Ресми мәлімет бойынша 20 жылдан аса жүрілген көліктер саны – 2 млн 518 мыңды құрап отыр. Ал шыққанына 10-20 жыл болған көліктер – 1 млн 361 мың автокөлік екені белгілі болған. Қош делік, қағаз бетіндегі қыруар санның сападан алшақ жатқанын осыдан-ақ білуге болатын тәрізді…

О.ҚАСЫМ.