МЕРЕКЕ ҚАРСАҢЫНДА КӨКСАЙЛЫҚТАР ҚУАНЫШҚА КЕНЕЛДІ

Шұғылалы көктемнің шуақты күндеріне де жеттік. Жер ана кең тыныстап, айнала жасыл желекке оранып-ақ жатыр. Көктемнің көркіне айналған Ұлыстың ұлы күні — Наурыз мерекесін тойлау бұл күндері Шымкентте басталып кеткен. Қуантарлығы сол, бұл жылы айтулы мереке концерттік бағдарламамен ғана шектеліп жатқан жоқ. Бірқатар игі бастамалар көтеріліп, көптің көңілінен шығып жатыр десек, артық айтпаған болар едік.

Қалың оқырманның жадында болса, қала әкімі Ғабит Сыздықбековтың тапсырмасымен өткен жылы Көксай шағынауданын жаңғырту тұжырымдамасын жүзеге асыру басталған болатын. Нәтиже де жоқ емес. Іске қосылғалы 22 отбасыға тұрғын үй жағдайын жақсартуға мүмкіндік берілді. Тұжырымдаманың негізгі кезеңдерінің бірі – тұрғындарды тозығы жеткен үйлерден бөлме саны бірдей, әрленген жаңа қонысқа көшіру. Осы орайда, жуырда Наурыз мерекесі қарсаңында қала әкімі Ғабит Сыздықбеков Нұрлыбаев көшесіндегі №4, №9, №14 үйлерінде тұратын тағы 35 отбасына жаңа пәтер кілттерін салтанатты түрде табыстады. Сонымен қатар тұрғындарды қуанышты оқиғамен құттықтап, заманауи жайлы баспанаға көшу азаматтардың өмір сүру сапасын арттыру жолындағы маңызды қадам екенін атап өтті.
Қаланың осынау тарихи бөлігін заманауи және абаттандырылған шағынауданға айналдыруға бағытталған тұжырымдама жергілікті тұрғындардың өмір сүру сапасын арттырып қана қоймай, мегаполистің келбетін жақсартуға мүмкіндік береді. Жақын арада осы ауданда тұратын тағы 159 отбасын көшіру жоспарлануда. Жобада көпқабатты тұрғын үйлерді, әлеуметтік нысандарды, саябақтар мен скверлерді, аудан әкімдігінің ғимаратын, спорт кешенін кезең-кезеңімен салу жоспарланған. Сондай-ақ жұмыс істеп тұрған мектепті кеңейту және көпфункционалды сауда-логистикалық орталығын құру көзделген.

“Уақыт”.