САЛЫҚҚА САЛҒЫРТ ҚАРАҒАНДАР ҚАТАРЫНДА АЛПАУЫТ КОМПАНИЯЛАР ДА БАР
Соңғы жылдар ішінде елімізде құрылыс саласы айрықша қарқынмен дамыды. Жыл сайын қаржы айналымы да арта түсті. Өйткені елімізде баспанаға деген сұраныс жоғары. Сондықтан баға да аспандап барады. Енді жуырда мемлекеттік кірістер органдары аталған салада заңбұзушылық барын мәлімдеді. Демек құрылыс компаниялары талапқа томпақ келетін әрекетпен жалғанды жалпағынан басып келген.
Тарқатсақ, осыдан бір апта бұрын мемлекеттік кірістер органдары ірі құрылыс компаниялары санатындағы «Bazis-A» және «Bi Group» қанша сомада салық кірістерін төмендетіп көрсеткені жөнінде ақпарат берген еді. Нақтырағы, «Bazis-A» компаниясына 4,6 млрд теңге, «Bi Group» компаниясына 11,9 млрд теңге мөлшерінде салыққа жататын кірістерін төмендетіп көрсетілгені жөнінде хабарлама жіберген. Енді осы аптада Вице-премьер әрі ұлттық экономика министрі Серік Жұманғарин аталған мәселеге қатысты пікір білдірді. Өз сөзінде «Бізде камералды бақылау деген бар. Былтыр, мәселен, бизнеске осындай 400 мыңға жуық анықтама жібердік. Биыл құрылыс компанияларына тек шет жағасын ашып айттық. Сол себепті бұл бір ерекше құбылыс емес. Содан кейін біз ешқандай санкция салмаймыз. Оны басқа елдер салып жатыр. Біздің тек әкімшілік шараларымыз бар. Салық комитеті бар» деді ол.
Жуырда Премьер-министр Олжас Бектенов те аталған мәселені көтеріп, заңнан аттағандарды аямайтынын аңғартқан. Тіпті, жоғарыдағы қос алпауыт компанияның атын атап, заңсыз әрекеттерге жол бергенін жеткізді. Сонымен қатар салықтық міндеттемелерден жалтару схемаларын қолданатын олигархтар мен ірі компания басшыларына қосымша салық сомалары көрсетілген хабарламалар жіберілетінін ескертті. Оларға салық төлеу үшін екі апта уақыт берді. Қош делік, Forbes тізіміндегі алпауыттарға да тықыр таяған тәрізді. Олардың заңсыздығымен күреспей, бюджеттің бүйірін толтыру да мүмкін емес тәрізді…
С.НҰРАЙ.
