СӘРСЕН ҚҰРАНБЕК — ШЫМКЕНТ ҚАЛАСЫ ӘКІМДІГІНІҢ РЕСМИ ӨКІЛІ

алғашқы брифингте айтылған ақпар да, қойылған сауал да көп болды
Ашықтық — әділетті жүйенің негізгі қозғаушы күші. Мемлекет басшысы маңызды жиындарда аталған тақырыпты сөз етіп, бірқатар ұсыныстарды айтқанына біршама уақыт болды. Әйткенмен жылдар бойы қалыптасып, сең болып қатқан жергілікті жүйенің өзгере қоюына уақыт керек. Уақыттан бұрын әкімдіктің құлшынысы қажет. Онсыз ашық қоғам мен әділетті жүйенің орнай қоюы неғайбыл. Мұны тектен-текке жазып отырғанымыз жоқ. Жуырда Шымкент қаласы әкімдігінің ресми өкілі болып қала әкімінің орынбасары Сәрсен Құранбектің тағайындалғаны турасында ақпар тарады. Артынша Өңірлік коммуникациялар қызметі алаңында жаңа міндетті желкесіне жүктеген Сәрсен Абайұлы алғашқы баспасөз жиынын өткізді. Бас-аяғы 2 сағатқа созылған брифингте әкімдіктің атқарған һәм алдағы уақытта қолға алатын шаралары сөз болды. Сонымен қатар бұқаралық ақпарат құралдары өкілдерінің сауалдарына да жауаптар берілді. Қош делік, ендеше маңызды жиында қаузалған тақырыптарға ойысайық…
Шымкент қаласында қоғамның бірқатар саласы қарқынды дамып келеді. Мұны экономикалық көрсеткіштер айғақтап отыр. Мәселен, былтыр қалаға тартылған инвестиция көлемі 12 пайызға артқан. Демек инвестициялық жайлы орта қалыптастыру шаралары өз нәтижесін беріп келеді. Бұл ғана емес, құрылыс саласында да серпіліс бар. Өткен 2024 жылда құрылыс жұмыстарының көлемі 14 пайызға, ал пайдалануға берілген тұрғын үй алаңы 26 пайызға өскен. Сауда көлемі 20 пайызға, көлік қызметі 27 пайызға артқан. Өнеркәсіпте де 3 пайыздық өсім байқалған. Мұның баршасы қала экономикасының кешенді түрде дамып келе жатқанын айғақтайды. Өңірдің әлеуеті әлеуметтің ахуалымен өлшенеді десек, артық айтпаған болар едік. Бұл тұрғыдан келгенде, еліміздің үшінші мегаполисінде «Халықтың табысын арттыру» бағдарламасы бойынша 58 мыңнан астам адам жұмысқа орналасып, оның 40 мыңға жуығы тұрақты жұмысқа қабылданған. Бұл ғана емес, жергілікті бюджет есебінен 11 млрд теңге бөлініп, еңбек ақысы төмен 15 мыңнан астам азаматтық қызметшілердің жалақысы 50 мың теңгеге көтерілген. Нәтижесінде қаланың әлеуметтік секторындағы өзгерістер халықтың тұрмыс сапасын арттыруға әсер етіп, өмір сүру деңгейін жақсартуға мүмкіндік беріп отыр.
Денсаулық пен білім – өңірдің я қаланың емес, күллі қоғамның, елдің дамуына әсер ететін айрықша салалардың бірі. Бұл тұрғыдан келгенде, үшінші мегаполисте атқарылып жатқан шаралар аз емес. Көрсеткіштерге ойыссақ, шаһарда 15 800 орындық 11 жаңа мектеп ашылып, 500 орындық екі Оқушылар сарайы салынды. «Жайлы мектеп» ұлттық жобасы аясында іске қосылған бұл мектептер қаланың білім жүйесінің жаңаруы мен дамуына айтарлықтай үлес қосып отыр. Салада атқарылар жұмыстар мұнымен шектелмек емес. 2025 жылы қаладағы мектептердің 9-ын күрделі жөндеуден өткізу жоспарланған. Құрылыс-монтаж жұмыстарына 9 миллиард теңге бөлініп, жөндеу жұмыстарын 2025 жылдың тамыз айында аяқтау жоспарлануда. Бұл шара білім сапасын арттырып, мектептерді заман талабына сай жаңартуға бағытталған. Шымкент қаласы барлық салаларда тұрақты даму жолына түсіп, тұрғындардың әл-ауқатын жақсартуды басты мақсат етіп қойып отыр. Сонымен қатар қаланың денсаулық сақтау жүйесі де жаңа бастамалармен толығып жатыр. Шымкентте үш жаңа жекеменшік медициналық орталық ашылды, ал екі мемлекеттік аурухана күрделі жөндеуден өтіп жатыр. Осы жұмыстар денсаулық сақтау саласындағы қызмет сапасын арттыруға және тұрғындарға заманауи медициналық көмек көрсетуге мүмкіндік береді. Осы орайда, жиын барысында Сәрсен Абайұлы «Қаланың әлеуметтік инфрақұрылымын дамыту мақсатында биыл 150 орындық оңалту орталығының құрылысы басталды. Сонымен қатар, паралимпиада мен сурдлимпиада спорт түрлеріне арналған арнайы орталықтың құрылысын жоспарлап отырмыз. Бұл шаралар қаланың денсаулық сақтау және білім беру жүйелерінің барлық талаптарға сай болуына бағытталған» деп атап өтті.
Жастар мәселесі де жергілікті әкімдіктің басты назарында десек, қателеспеген болар едік. Оның ішінде жастарға арналған тұрғын үй бағдарламасы белсенді түрде жүзеге асырылуда. 2019 жылдан бері жұмыс істейтін жастарға арналған «Жастар» тұрғын үй бағдарламасы бойынша қалада 3 849 отбасы баспаналы болды. Бұл бағдарлама аясында 2025 жылдың наурыз айында тағы 900 отбасы жаңа пәтерлерге көшеді. Алайда алғашқы 901 қатысушының жалдау мерзімі аяқталғаннан кейін, баспана мәселесі күрделене түскен. Бұл мәселені шешу үшін «Отбасы банк» АҚ арқылы жеңілдетілген несиелік механизмдер ұсынылмақ. Жастарға бастапқы жарнасыз пәтер сатып алу мүмкіндігі беріледі, бұл оларға қарыз жүктемесін азайтуға көмектеседі. Әрине, мұның өзі отбасын жаңа құрған жастарға үлкен қолдау болмақ.
Шымкент – жасыл қала. Еліміздің өзге өңірінен келген қонақтар жасыл желектің көптігіне тәнті болып жататын. Дегенмен кейінгі онжылдықта қаладағы құрылыстың қарқын алуымен олардың қатары сиреп қалғандай көрінген. Бұл біздің көкейдегі мәселе десек, қателескен екенбіз. Әкімдік тиісті шараларды қолға алып, жұмысты бастап кеткен. Бұған дейін қала аумағында көптеген саябақтар мен скверлердің ашылып жатқанын жазған болатынбыз. Сәрсен Абайұлының сөзінше, бұл бағыттағы шаралар алдағы уақытта да жалғасын таппақ. Бұл ғана емес, қалада көктемгі жаңарумен бірге экологиялық, мәдени және әлеуметтік салаларда ауқымды шаралар өткізілуде. Қала тұрғындары 19 наурызда басталатын экологиялық акцияларға белсене қатысып, «Таза өлке» және «Рахмет, Жер ана!» акциялары аясында қаланың түрлі аумақтарында 1000 түп ағаш көшетінің отырғызылуына үлес қосады. Бұл шара табиғатқа деген қамқорлықты арттырып, қаланың жасыл желекпен көркеюіне мүмкіндік береді. Сонымен қатар көктайғақтың алдын алу мақсатында қар тазалау жұмыстары күшейтілген. Қала аумағында 189 арнайы техника мен 500-ге жуық қызметкер жұмылдырылып, жолдар мен саябақтар үнемі тазартылып тұрады. Жергілікті билік экологиялық жағдайды жақсартуға бағытталған шаралармен қатар, қала тұрғындарының өмір сапасын арттыруға бар күшін салып отыр.
Наурыз – жаңару мен жаңғыру айы. Бұл айда бірқатар мерекелер тойланады. Оның ішінде ұлтымыз үшін маңызы айрықша Ұлыстың ұлы күні – наурыз мерекесі бар. Қазақылықтың қаймағы қалқыған Шымкентте жыл сайын аталған мейрам ауқымды түрде аталып өтеді. Биыл да бірқатар бастамалар қолға алынып отыр. Тарқатсақ, 21 наурызда қаланың барлық аудандарында және тұрғын алаптарында түрлі салтанатты іс-шаралар ұйымдастырылады. Мерекеге арналған жәрмеңкелер мен қолөнер шеберлерінің көрмелері ашылып, этноауыл жасақталып, ұлттық спорт ойындары өтеді. Бұл күні «Астана» алаңында балаларға арналған ойын алаңшалары, ұлттық спорт ойындарының алаңшалары жасақталып, түрлі сайыстар ұйымдастырылады. Сонымен қатар отандық дизайнерлердің ұлттық киімдерінің дефилесі өткізіліп, қала тұрғындары мен қонақтарына өнер мен мәдениет саласында көптеген қызықты шаралар ұсынылады. Кешкі уақытта эстрада жұлдыздарының қатысуымен гала-концерт ұйымдастырылып, отшашумен аяқталады. Қала тұрғындары мен қонақтары осы салтанатты шаралар арқылы қазақ халқының салт-дәстүрімен таныса алады.
Баспасөз брифингі барысында әлеуметтік желіде желдей ескен сыпсың сөз, алып-қашпа әңгімелерге де нүкте қойылды. Бұған дейін «Кең баба» саябағы мен «Қиял әлемі» технопаркінің орнына көпқабатты тұрғын үй салынады-мыс» деген сөз тараған болатын. Спикер мұндай жоспардың жоғын және болмайтынын мәлімдеді. Қос нысанның орнында жұртшылық сейіл құрып, серуендейтін парк болады. Ал қаладағы №8 мектеп маңындағы сауна мәселесіне ойыссақ, ақпаратқа қатысты қазір Шымкент қаласы Полиция департаментінің өндірісінде Қылмыстық кодекстің 309-бабы 2-бөлігі 1-тармағымен жезөкшелікпен айналысу үшін притон ұйымдастыру және оны ұстау, жеңгетайлық фактісі бойынша тіркелген қылмыстық іс тергеліп жатыр. Бұл мекенжайларда жүргізілген тінту шаралары барысында Тәуке хан даңғылы, 60/7-үйде орналасқан 32 пәтердің барлығы монша және қонақүй кешені ретінде қайта жабдықталғаны және онда интимдік қызметтер көрсетілгені анықталған. Қылмыстық іс аясында сауна қызметкерлері күдікті деп танылып, үшеуі қамауға алынды. Биыл 2 ақпанда ГАСК басқармасы, СЭС, Оңтүстік Жарық Транзит және ТЖД қызметкерлерінің қатысуымен де кешенді тексеру жүргізілді. Тексеру барысында Әкімшілік құқық бұзушылық туралы кодекстің 316-бабының талаптары бұзылғаны анықталды. Осыған байланысты «Арман-1» саунасының қызметі тоқтатылып, нысан мөрленді. Осы баппен әкімшілік құқықбұзушылық туралы хаттама толтырылып, Шымкент қаласының әкімшілік сотына жолданды. Үш күдіктіге қатысты айыптау актісі жасалып, іс әрі қарай зерделеу және сотқа жолдау үшін қалалық прокуратураға жіберілді. Мұндай құқық бұзушылық пен бассыздыққа қаламызда заң аясында тұрақты тексеру жүргізіліп, тиісті шаралар қолданыла береді.
Қош делік, жоғарыда атап өткеніміздей, 2 сағатқа созылған жиында қала әкімінің орынбасары әрі әкімдіктің ресми өкілі журналистер тарапынан қойылған әр сауалға мұқият жауап берді. Қағаздан ежелеп оқып, екіұшты пікір білдірген жоқ. Ақиқаттың астарын ашып айтты, мән-жайды бүкпесіз баяндады. Келген журналистер қауымы да алғысын айтып, бұл бастаманың қолға алынғанына қуанышты екендерін жеткізді. Бұрындары әлдебір тұрмыстық дау я өзге де жаға ұстатар жайт бола қалса, әлеужелідегі жұрт «Не шықса да, Шымкенттен шығады» деп жататын. Әйткенмен соңғы уақытта қаламыз қылмыс емес қылмыспен күресудегі үздік механизм, жемқорлық емес ашықтық, трайбализм емес әділетті жүйе арқылы танылып келеді. Демек қоғамның санасына шырмалған стереотиптер бұзылып жатыр. Бұл – қуантарлық жайт!
Қ.ДӘУЛЕТӘЛІ.