БҰҚАРАНЫҢ БАНККЕ БЕРЕШЕГІ КӨБЕЙІП БАРАДЫ

Кредитке кіріптарлық тереңдеп барады. Қаржы нарығын реттеу және дамыту агенттігінің ақпаратынша, 2025 жылдың қаңтар айында Қазақстанда халыққа берілген қарыз көлемі 0,6 пайызға артып, 20,8 трлн теңгені құрады. 

Агенттіктің мәліметінше, қарыз көлемінің артуына тұтынушылық несиелерге сұраныстың 0,8 пайызға өсіп, 13,9 трлн теңгеге жетуі себеп болған. Ал ипотекалық несиелерге сұраныс 2024 жылдың желтоқсанындағы деңгейде қалды. Оның көлемі – 6,1 трлн теңге. Агенттік өкілдері несиелік портфельдің сапасы жоғары деңгейде сақталып отырғанын атап өтті. 1 ақпанға дейін банк секторындағы 90 күннен астам мерзімі өткен берешек деңгейі 3,2 пайызды құрады, бұл – 1 трлн 143 млрд теңге. Бұл ғана емес, қаңтар айында жеке тұлғалардың депозиттері 2 пайызға азайып, 22,1 трлн теңгені құрады. Ұлттық валютадағы депозиттер 2,4 пайызға, шетел валютасындағы депозиттер 1,4 пайызға қысқарған.
Қалың оқырманның жадында болса, бұған дейін ел президенті Қасым-Жомарт Тоқаев реттеу шараларының қатаңдауына қарамастан, елде тұтынушылық несиелеу көлемі жылдам өсіп жатқанын айтқан болатын. Президенттің сөзінше, өткен жылы бұл көрсеткіш 33 пайызға артып, проблемалық қарыз алушылар саны бір жарым миллионнан асты. Қош делік, тұтынушылық несиенің өсуі әлеумет ахуалының жақсы емесін аңғартады. Үкімет тарапынан бұл мәселені шешу үшін түрлі бастамалар қолға алынғанымен, жағдайдың жақсы жаққа өзгеріп жатқанын көріп тұрғанымыз жоқ…

О.ҚАСЫМ.