БИЫЛ 6 МЫҢНАН АСА ЗЕЙНЕТКЕР ШИПАЖАЙҒА БАРАДЫ
![](https://uaqyt.kz/wp-content/uploads/2021/08/БИЫЛ-6-МЫҢНАН-АСА-ЗЕЙНЕТКЕР-ШИПАЖАЙҒА-БАРАДЫ.jpg)
Шымкент қаласының жұмыспен қамту және әлеуметтік қорғау басқармасы тарапынан әлеуметтік қолдау көрсету санатындағы азаматтарға шипажайларға тегін және жеңілдікпен жолдамалар беру жалғасуда.
Биыл жолдамаға ие болатын 6174 азаматтың ішінен 2000-нан астамы Шымкент қаласының «Денсаулық» шипажайына, Түлкібас ауданының «Ақсу-Жабағылы» және Тараз қаласының «Айша бибі» шипажайларына жіберілуде.
Санаториялық-курорттық емдеу Ұлы Отан соғысының қатысушыларына және оларға теңестірілген тұлғаларға, зейнеткерлік жастағы «Алтын алқа», «Күміс алқа» иегерлеріне 12 күнге тегін беріледі. Ал, зейнеткерлерге жолдама құнының 50 пайызын төлеумен, яғни 6 күнге беріледі.
Бүгінде қалада 82 821 зейнеткер тіркелген. Оның ішінде ҰОС ардагерлері – 20, тыл ардагерлері – 3 153. Сондай-ақ, «Алтын алқа» және «Күміс алқа» иегері атанған 2377 зейнеткер бар. Шипажайларға жолдама беру жұмыстары мемлекеттік тапсырыс шеңберінде жүзеге асырылады. Жолдама алу үшін С.Бәйтереков көшесі, №89 мекенжайы бойынша қалалық жұмыспен қамту және әлеуметтік қорғау басқармасына өтініш қалдыру қажет. Жолдама кезек бойынша беріледі. Кезекке тұру үшін жеке куәлік және 068 нысанындағы дәрігерлік анықтама қажет.