ЖАҢА ЖЫЛ ҚҰТТЫ БОЛСЫН!
Қадірлі ағайын, ардақты жерлестер! Міне, тағы бір жыл тарих қойнауына еніп, үміт пен сенімге толы жаңа 2026 жыл табалдырығымыздан аттағалы тұр. Өтіп бара жатқан жыл әрқайсымызға сан түрлі сынақ пен тағылым, қуаныш пен жауапкершілік сыйлады. Біріміз үшін ол табандылықты талап еткен еңбек жылы болса, енді біріміз үшін арман мен мақсаттың айқындалған кезеңі болды.
Жаңа жыл — әрдайым жаңару мен жақсылықтың бастауы. Бұл — өткенге есеп беріп, келешекке нақты жоспар құратын, жүректерге үміт ұялататын ерекше сәт. 2026 жыл әр шаңыраққа тыныштық пен тұрақтылық, ырыс пен береке әкелсін. Ел ішіндегі татулық пен бірлік нығайып, ортақ мақсат жолында жұдырықтай жұмылған қоғам қалыптаса берсін. Алдағы жылда әрбір отбасының төрінде шат күлкі естіліп, сәбилердің сыңғыры мен аналардың мейірімі молайсын. Қарияларымыз аман болып, ақ батасын берсін. Жастарымыз білімге ұмтылып, елге адал қызмет ететін азамат болып қалыптассын. Еңбек адамдарының маңдай тері еленіп, адал еңбектің қадірі арта берсін.
2026 жыл еліміз үшін өсіп-өркендеу, жаңашыл бастамалар мен нәтижелі істердің жылы болғай. Әр басталған іс сәтімен аяқталып, қоғам дамуына бағытталған жобалар жемісін берсін. Экономикамыз нығайып, әлеуметтік салада оң өзгерістер көбейсін. Әділдік пен жауапкершілік басты құндылыққа айналып, әр азамат өзін қауіпсіз әрі сенімді сезінетін орта қалыптассын. Жаңа жыл әрқайсымызға рухани байлық, ішкі тыныштық пен сенім сыйласын.
Келе жатқан 2026 жыл құтты, берекелі, табысты жыл болсын! Баршаңызға зор денсаулық, отбасыларыңызға амандық, елге қызмет етер істеріңізге сәттілік тілеймін. Жаңа жыл жарқын жетістіктер мен қуанышты сәттерге толы болсын!
Муфтулла
Құлмұратұлы ҚОНАҚБАЕВ,
Шымкент қаласы мәслихатының депутаты.
