ЫНТЫМАҚТАСТЫҚ ҚОС ТАРАПТЫҢ НӘТИЖЕЛІ ЖҰМЫСЫНА СЕПТІГІН ТИГІЗЕДІ
Бүгінде салалардың дамуы сапалы кадрға тікелей байланысты. Осы орайда, жуырда Шымкент қаласының әкімі Ғабит Сыздықбеков пен «Мирас» университетінің ректоры Нұркен Халықберген жоғары оқу орны мен қала әкімдігі арасындағы ынтымақтастық туралы меморандумға қол қойды. Ынтымақтастықтың негізгі бағыттары — халық арасында ғылым мен жоғары білімді насихаттау, мамандарды қайта даярлау және біліктілігін арттыру үшін мүмкіндіктерді молайту, сондай-ақ оқу-әдістемелік зерттеулерді ілгерілету және іске асыру.
Бұл өңірдің кәсіби әлеуетін арттыруға септігін тигізеді. Кездесу барысында «Қол қойылған меморандум екі тараптың да академиялық қоғамдастық пен қала әкімдігі арасындағы байланысты нығайтуға, инновацияларды енгізуге және Шымкент қаласы тұрғындарының өмір сүру сапасын арттыруға талпынысын куәландырады» деп хабарлайды қала әкімдігі. Тараптар қаланың білім беру және әлеуметтік салаларын дамытуда іс-шараларды бірлесіп өткізуге уағдаласты.
Бұдан бөлек, тараптар «Жайлы қалалық орта» жобасын бірлесіп әзірлеуге және іске асыруға келісті. Университетпен тығыз байланыс орнату республикалық маңызы бар қалаға және жалпы өңірге білім беру және әлеуметтік салаларды дамытуда жаңа серпін береді деп күтілуде. Сондай-ақ екі тарап арасындағы ынтымақтастық одан әрі нәтижелі өзара іс-қимыл үшін жаңа перспективалар ашатынын және өңірдегі жоғары оқу орындарының арасынан жаңа әріптестерді тартуда әкімдік іске асырып жатқан білім беру саласындағы үдемелі саясаттың алғашқы қадамы болатынын атап өту қажет.
