Маңызды

Медицина саласының қоғам өміріндегі маңызы жоғары. Қазіргі уақытта Шымкент қаласының коммуналдық меншігінде 36 медициналық ұйым бар. Оның ішінде 15-і – ауруханалық ұйым, 14 амбулаторлық-емханалық ұйым және 7 мекеме басқа бейінге бағытталған.

Үшінші мегаполистегі медициналық қызмет сапасын жақсарту мақсатында материалдық-техникалық база жаңартылып, көрсетілетін қызмет түрлері кеңейе түспек. Толығырақ тоқталсақ, №1 қалалық клиникалық аурухана, №2, №3 қалалық ауруханаларында медициналық көмек түрі артып, көпсалалы аурухана болып қайта құрылады.
Бүгінде көпсалалы ауруханаға айналған медициналық мекеменің бірі – қалалық балалар клиникалық ауруханасы. Жаңғырту жұмыстарынан соң ауыр дертке шалдыққан балалардың өзге қалаға сабылмай осында ем алып, күрделі оталар жасауына мүмкіндік туады. Бұл бағыттағы жұмыстар іске асып, орындалып жатыр. Қазіргі уақытта балалар ауруханасында нейрохирургиялық, күйік, урологиялық, торакальды хирургия, нейрохирургиялық медициналық оңалту бөлімшелерінің қызметтері жолға қойылған. Нейрохирургиялық оталарды жандандыру мақсатында соңғы үлгідегі заманауи аппараттар орнатылғанын да айта кету керек.

«Газ және газбен жабдықтау туралы» ҚР Заңына сәйкес тұрғындар газ жабдықтарының техникалық жай-күйін, қауіпсіздігін және жыл сайын техникалық қызмет көрсетуге арналған шарт жасасуға, ал қызмет көрсетуші ұйым олардың техникалық жарамды күйде болуын қамтамасыз етуге міндетті.

Алайда осы талаптар тиісті дәрежеде сақталмау салдарынан тек 2022 жылдың 4 айында улы газдан уланудың 78 фактісі тіркеліп, 8 адам қайтыс болған.
Осы орайда, прокуратура бастамасымен бір тұрғынның улы газдан уланып, денсаулығына зиян келу фактісі бойынша ҚК-тің 306-бабының 1-бөлігімен (қауiпсiздiк талаптарына сай келмейтін тауарларды шығару немесе сату, жұмыстарды орындау не қызметтер көрсету) сотқа дейінгі тергеп-тексеру басталып, нәтижесінде қылмыстық іс тараптардың татуласуына байланысты тоқтатылған.
Бұдан бөлек, 2 қылмыстық іс тергелу сатысында. Тұрғындардан газ құрылғыларының үйішілік техникалық қызмет көрсету жөнінде өнеркәсіптік қауіпсіздік саласындағы жұмыстарды жүргізу құқығына аттестатталған, мамандандырылған тәуелсіз ұйымдармен шартты міндетті түрде жасау және олармен техникалық қызметтердің сапалы жүргізілуін талап ету, сонымен бірге тұрмыста газды пайдаланудың Ережесін сақтау, газ құрылғыларының ақаулары пайда болған жағдайда тек қана газ саласындағы мамандарға жүгіну сұралады.
Сондай-ақ техникалық қызмет көрсетуші ұйымның тиісті төлемді алып, газ жабдықтарының жай-күйіне тексеру жүргізбеген жағдайда уәкілетті мемлекеттік орган Шымкент қаласының қалалық орта сапасы және бақылау басқармасының газ техникалық инспекция бөліміне (24-75-04, 8-702-671-19-92, 8-707-230-36-17, 8-701-570-00-27, 8-775-274-54-05), ал аталған мемлекеттік орган әрекетсіздік танытса қала прокуратурасына (53-91-84) шағымдануға құқылы екендіктеріңізді түсіндіреміз.

Шымкент қаласының
прокуратурасы.

Елімізде жастарға барынша жағдай жасалып келеді. Бүгінде жұмыс істеуге ниетті азаматтар үшін көптеген мемлекеттік бағдарламалар бар. Баспанасы мәселесі мазалайтындарға арналған бастамалар да көтеріліп, оң нәтижесін беруде. Мәселен, биыл Шымкент қаласында 1 605 баспананы сатып алу құқығынсыз, жалға беру жоспарланған. Оның ішінде 857 пәтер жұмыс істейтін жастарға табысталады.

Бүгінде аталған тұрғын үйлерде абаттандыру және инфрақұрылымдық жүйелерге қосу жұмыстары жүріп жатыр. Жұмыстар аяқталған соң тұрғын үй басқармасында конкурс өтеді. Бұл туралы алдын ала барлық бұқаралық ақпарат құралдары мен әлеуметтік желілерде хабарланады.
Айта кету керек, былтыр «Нұрлы жер» мемлекеттік бағдарламасы аясындағы 29 жасқа дейінгі жұмыс істейтін жастарға сатып алу құқығынсыз жалға берілетін тұрғын үй беру бағдарламасы бойынша Шымкент қаласында 300 жас жалдамалы баспанамен қамтылды. 2020 жылы 904 азаматқа пәтер кілті табысталған еді. Аталған бағдарлама негізінде жастарға сатып алу құқығынсыз табысталатын пәтерлер 5 жылдық мерзімге беріледі.

Шымкент қаласы, Қаратау аудандық кірістер басқармасы мемлекеттік бюджет түсімін артығымен орындап жатыр. Бұл жөнінде Ақпараттық-коммуникациялық орталығында өткен Қаратау аудандық кірістер басқармасының басшысы Қайрат Құдияровтың басқарма тарпынан 2022 жылдың І тоқсанында атқарылған жұмыстар турасында берген баспасөз жиынында айтылды.

«Мемлекеттік кірістер комитетінің құзырындағы кірістерден Мемлекеттік бюджет жоспары 108 пайызға орындалды. Есепті мерзімде бюджетке 613 303 мың теңге артығымен түсті. Жоспар бойынша 7 346 488 мың теңге мөлшерінде бекітілген, есепті мерзімде нақты түскені 7 959 791 мың теңге болып отыр. Республикалық бюджет бойынша есепті мерзімге жоспар 103 пайызға орындалып, бюджетке 123 711 мың теңге артығымен өндірілді. Жоспар бойынша 3 556 011 мың теңге болса, нақты түсім 3 679 722 мың теңгені құрады. Ал жергілікті бюджет бойынша есепті мерзімге межеленген жоспар 113 пайызға орындалып, бюджетке 489 592 мың теңге артық ѳндірілді. Жоспар бойынша 3 790 477 мың теңге болса, нақты түсім 4 280 069 мың теңге болып отыр» деді аудандық кірістер басқармасының басшысы.
Сонымен қатар басқарма басшысы салықтық қызметтің түрлеріне де тоқталып өтті. Ол бойынша, биылдың І тоқсанында 51 935 мемлекеттік қызметтің 51 757-і электронды түрде, ал 178-і қағаз жүзінде көрсетілген. Ескерте кетейік, азаматтар салықты «E-Salyq Azamat», «E-Salyq Business» қосымшалары арқылы төлей алады. ҚР ҚМ МКК тарапынан ашылған «SalyqBot» анықтамалық бот арқылы салықтар мен міндетті төлемдерге, кедендік төлемдерге қатысты мәліметтер, анықтамалар алуға болады, сұрақтар қоюға болады. «E-Salyq Azamat», «E-Salyq Business» мобильді қосымшалары туралы толық мәліметтерді алуға болады, осы қосымшалармен бейнесабақтармен қалай жұмыс жасау керегі де толық түсіндіріледі.

Шымкент қаласы жыл өткен сайын кеңейіп келеді. Халық санының өсуі қаладағы қозғалысқа да әсер етпей қоймады. Қалада болатын ұзын-сонар кептелістің көпті мезі ететіні тағы белгілі. Десе де әкімдік аталған мәселені шешу мақсатында біраз бастамаларды көтеріп, жүзеге асырып жатыр. Солардың бірі – Д.Қонаев даңғылын әрі қарай созу. Бұл қазіргі орталық көшелердегі кептеліс мәселесінің шешілуіне мүмкіндік береді.

 

Ал құрылыс сапасын қала әкімі Мұрат Әйтеновтің өзі бақылап қайтты. Шаһар басшысы Д.Қонаев даңғылы жалғасы құрылысының ІІ және ІІІ кезеңі бойынша атқарылып жатқан жұмыстарды бақылады. Орындалған әрбір жұмысқа зертханалық сынақтамалар жүргізіліп, сапасы тексерілуін тапсырды.
Сонымен қатар Д.Қонаев даңғылы жалғасының екінші кезеңі бойынша инженерлік желілерді орнын ауыстыру, мемлекет мұқтажына алынған үйлерді сүру жұмыстарымен қатар ұзындығы 0,561 шақырымды құрайтын үшінші кезеңі бойынша қазіргі уақытта жол мен аяқжолдардың негізін әзірлеу, абаттандыру және жерүсті жаяу жүргінші өткелін жасау жұмыстары атқарылуда. Қорыта келгенде, құрылыс сапасы қала әкімінің бақылауында. Әзірге барша жұмыстар жоспарға сай жүріп жатыр.

Осы аптада еліміздің барша мектептерінде биылғы оқу жылының соңғы қоңырауы соғылды. Мыңдаған түлек алтын ұя мектебін тәмамдап, үлкен өмірге аяқ басты. Енді оларды алда үлкен белес күтіп тұр. Бітіруші түлектер 11 жыл бойы алған білімін дәлелдеп, белгілі бір мамандықты таңдауы тиіс. Жуырда Білім және ғылым министрі Асхат Аймағамбетов «Алтын белгіге» үміткер оқушылар мен олардың мектебіне қатаң талаптар қойылатынын айтқан еді. Осы орайда, Шымкент қаласында биыл қанша оқушының «Алтын белгіге» үміткер екенін зерделеп көрдік.

Биылғы оқу жылының қорытындысы бойынша Шымкент қаласында 453 түлек «Алтын белгіге» үміткер атанып отыр. Оның ішінде 433-і Ұлттық біріңғай тестілеуге қатысады. Қалған 23 үміткер шетелдік жоғары оқу орнына түсуіне байланысты ҰБТ тапсырудан бас тартқан. Осы тұста айта кетерлігі, үлгілі мінез-құлық танытқан және барлық пәндер мен қорытынды аттестаттаудан өте жақсы деген баға алған оқушыларға «Алтын белгі» аттестаты және «Алтын белгі» белгісі беріледі.
Биылғы соңғы қоңырау шарасы «Түлек-2022 – Жаңа Қазақстанның ертеңі» атты тақырыппен өтті. Ағымдағы жылы үшінші мегаполис мектептерін 11 189 оқушы аяқтап отыр. Бұдан бөлек, 19 251 оқушы 9 сыныпты бітірген. Десе де оқу жылы аяқталғанымен, 9 және 11 сынып оқушылары 10 маусымға дейін қорытынды емтихандар тапсырады. 11 сынып оқушылары 16 мамыр мен 5 шілде аралығында Ұлттық бірыңғай тестілеуден өтеді. Соның ішінде мемлекеттік білім гранттарын тағайындау конкурсына қатысуға мүмкіндік беретін тестілеуге 8 200 бітіруші қатысады. Олардың әрқайсысына 2 реттен тест тапсыру мүмкіндігі берілетінін де айта кету керек.
Сондай-ақ 1-8 және 10 сынып оқушылары 26 мамыр мен 17 маусым аралығында жазғы мектепке ерікті түрде қатыса алады. Мұндай шара үлгерімі төмен оқушылардың біліміндегі олқылықтардың орнын толтыру мақсатында қолға алынып отыр. Алдын-ала дерек бойынша, Шымкент қаласында жалпы 143 757 оқушы жазғы мектепте оқиды деп жоспарлануда.

Шымкент қаласы еліміздегі демографиялық ахуалы жақсы өңірлердің қатарына кіреді. Туу көрсеткіші жоғары. Десе де мұның өзі медициналық қызметті әрі қарай дамытуға баса назар аудару керегін көрсетеді. Бүгінде қаламыздағы перзентханаларда барша жағдай жасалған ба? Материалдық-техникалық база күн сайын жаңарып жатқан талаптарға жауап бере ме?

Жоғарыдағы сауалдарымызға Шымкент қаласының әкімі Мұрат Әйтеновтің қалалық перзентханаға барып, қазіргі ахуалмен танысқан кездесуінен жауап алдық. Мамандардың сөзінше, қазіргі уақытта стационарлық жағдайда мамандандырылған медициналық көмек көрсететін қалалық перзентхананың материалдық-техникалық базасы жаңартылып, қызмет көрсету сапасы артқан. Перзентханада 53 білікті дәрігер, 171 орта және 87 кіші медперсонал жұмыс істейді. Тұрғындарға 153 төсек-орындық стационар қызмет көрсетеді.
2021 жылы перзентхананың 6 ғимараты күрделі жөндеуден өткен. Оған бюджеттен 1,7 млрд теңге қаралған. Нәтижесінде нысан толықтай соңғы үлгідегі медициналық қондырғылармен жабдықталып отыр. 2021 жылы 41 медициналық құрал-жабдық сатып алынған. 11 мыңнан астам бала дүниеге келетін мекеме жаңғырту жұмыстарынан кейін 12 мыңнан астам ананың босануына жағдай жасай алатын мүмкіндікке ие болған.
Мекеменің жұмысымен танысу барысында қала басшысы медициналық мекемелердің материалдық-техникалық базасын жаңғыртудың маңыздылығын, ана мен баланың денсаулығын жақсарту мен демографиялық көрсеткішті одан әрі ұлғайту негізгі бағыттардың бірі болып белгіленгенін атап өтті.

Биылғы оқу жылы да аяқталды. Мектептерде соңғы қоңырау соғылып, түлектер білім ордасынан түлеп ұшты. №90 дарынды балаларға арналған мамандандырылған мектеп-гимназиясында өткен осындай жауапты да маңызы зор шараға Шымкент қаласының әкімі Мұрат Әйтенов қатысып, оқушыларға сәт сапар тіледі.

Қала әкімі өз сөзінде «Мемлекетімізде оқимын, білемін, танимын деген оқушылар үшін жағдай жасалған. Әсіресе, шәкірттеріне білім, тәрбие беріп, адамгершілік рухта бағыт-бағдар беруде ұстаздардың еңбегі зор.Тек білім ғана адамға өмір жолын дұрыс таңдауда еркіндік пен өз-өзіне деген сенімділік, табысқа жетуге және өз қабілетін жүзеге асыруға мүмкіндік береді. Қаламыздың барлық мектептерінде соңғы қоңырау соғылып, ұл-қыздарымыз болашақтың биік баспалдағына қадам басқалы тұр. Өмірде жолдарыңыз ашық болсын!» деді. Айта кету керек, биыл үшінші мегаполистегі 203 мектепте өткен соңғы қоңырау шарасы «Түлек-2022 – Жаңа Қазақстанның ертеңі» тақырыбымен ұйымдастырылды.
Білім саласын қоғамның өзге де салаларының түп тамыры деуге болады. Себебі сапалы білім, саналы тәрбие алған өскелең ұрпақ ертеңгі елдің тізгінін ұстайды. Осы орайда, Шымкент қаласында аталған саланың дамуына айрықша назар аударылып келе жатқанын айта кету керек. Мәселен, өткен жылы Шымкентте 25 мектеп салынды. Биыл 17 мектеп салу жоспарда бар. Келер жылы үш ауысымды мектеп мәселесі толық шешілмек. Одан бөлек, Оқушылар сарайы мен Саз мектебінің құрылысы да қарқын алған. Аталған бастамалар аяқталса, өңіріміздегі білім саласының ауқымды мәселелері шешіліп, сапа да арта түсуші еді.

Шымкент қаласының әкімі Мұрат Әйтенов біраз уақыттан бері әр ауданның белсенділерімен кездесіп, өңірлердегі мәселелерді тыңдап, тиісті тапсырмалар беріп жүр. Бұл жолы шаһар басшысы қаланың дамуы мен тазалығына айрықша атсалысып жүрген Әл-Фараби ауданының белсенділерімен жүздесті.

Жиында белсенділер тарапынан ұсыныстар мен өтініштер айтылды. Ол бойынша қала әкімі тиісті сала басшыларына тапсырмалар да берді. Сонымен қатар тұрғындар тарапынан көтерілген әрбір түйткіл бақылауында болатынын жеткізді. Бұған дейін болған кездесу барысында барлығы 68 мәселе көтерілген еді. Қазіргі уақытта оның 28-і толық орындалып, түйткілдердің түйіні ағытылған. Ал 29 тапсырма бүгінде орындалып жатыр. Сонымен қатар 5 өтініш тұрақты бақылауды қажет етеді. 2 ұсыныс бойынша жұмыстар келесі жылы атқарылмақ.
Атап айтсақ, Сәуле шағынауданынан жүретін қоғамдық көліктердің Қазығұрт шағынауданына дейін ұзарту туралы өтініш берілген болатын. Нәтижесінде №96 және №43 маршруттардың қозғалыс сызбасы өзгертіліп, тұрғындарға қолайлы етіп жасалды. 195 орамдағы Қырыққыз көшесін жарықтандыру бойынша ұсыныс бірден назарға алынып, құрылыс-монтаждау жұмыстары жүргізілді. Бүгінде аталған көшеге 31 жарық шамдары орнатылды. Ал Әл-Фараби ауданының үй басқарушылары мен белсенді азаматтарынан құрылған кеңесте инфрақұрылым, жол, қоғамдық көлік, тазалық сынды әлеуметтік мәселелер кезең-кезеңімен шешімін табуда.
Айта кету керек, қала әкімі бұдан біршама уақыт бұрын әр ауданның тұрғындарымен кездесу өткізіп, атқарылған жұмыстар мен алдағы уақытта қолға алынатын бастамалар жайын халыққа таныстырып шықты. Аталған есепті кездесу алдағы уақытта да жалғасады.

Шымкент қаласындағы әрбір инженерлік инфрақұрылымның құрылыс сапасы әкімдік бақылауында. Қала әкімі Мұрат Әйтеновтың өзі ара-тұра құрылыс алаңдарына барып, атқарылып жатқан жұмыстар жайымен танысып тұрады. Бұл жолы қала басшысы «Оңтүстік» айналма жолының құрылыс басына барды.

Аталған айналма жолдың құрылысы Леңгір тас жолынан КХ-15 облыстық маңызы бар автожолына дейін жүргізіледі. Құрылысы 2021-2022 жылдарға жоспарланған жолдың ұзындығы 16 шақырымды құрайды. Қазіргі уақытта құрылыс жұмыстарын «Корпорация Береке-А» мердігер мекемесі жүргізіп отыр. Бүгінде айналма жолдың Шымкент-Ташкент тасжолымен қиылысатын бөлігінде көпір салынып, жол жабынының жерді қысымдау жұмысы атқарылуда.
Құрылыс нысанының 6 учаскесінде жолдың негізін дайындау, қазу жұмыстары қолға алынған. Биыл жолайрық, байланыс, электр, газ, сыртқы сумен қамту жүйелерінің құрылысы жүргізілмек. Жобаға сәйкес 4 орыннан жауын суына арналған құбырлар орнатылады. Жұмыс қарқыны жоғары. Жалпы саны 81 техника жұмыс істеп жатыр. Құрылыс сапасына қатысты сын әзірге айтылған жоқ.