Маңызды

Шымкенттің аумақтық қорғаныс бригадасында командалық-штабтық жұмылдыру оқу-жаттығулары өтті. Төтенше жағдай режимін енгізу және қамтамасыз ету кезінде арнайы өрістету, іс-шараларды ұйымдастыру және орындау мәселелері пысықталды.

Оқу-жаттығуға Шымкент қаласының, Түркістан, Жамбыл және Қызылорда облыстарының қауіпсіздік және қорғаныс мәселелері жөніндегі әкімдерінің көмекшілері, аумақтық қорғаныс бригадасының жеке құрамы, қорғаныс істері жөніндегі департаменттің жұмылдыру дайындығы басқармасының, полиция мен төтенше жағдайлар департаменттерінің және ҚР ҰҚК Шекара қызметінің Шымкент қаласындағы өкілдері тартылды.
Жұмылдыру жаттығуларына қатысушылар алдында алдында Шымкенттегі мұнай өңдеу зауытындағы шартты апаттың салдарын жою міндеті тұрды. Оқу-жаттығу жоспарына сәйкес жеке құрам мен әскери техниканы қабылдау пункттері ашылып, резервтегі жеке құрамды мақсаты бойынша міндеттерді орындау үшін жұмылдыру және жауынгерлік әзірлікке келтіру жөніндегі іс-шаралары өткізілді.
Оқу-жаттығу барысында басқару органдарының ақпаратты жинау және талдау, шешім қабылдау, жоспарлау және бағынышты бөлімшелерге міндеттерді жеткізу бойынша іс-қимылдарының үйлесімділігі тексерілді.
Айта кетсек, аумақтық қорғаныс бригадалары Қарулы Күштердің құрамдас бөлігі болып табылады. Олар белгілі бір аймақта міндеттерді орындауға арналған және осы аймақта тұратын азаматтармен жабдықталған.

Наурыз мерекесі биыл да ауқымды мерекелік шаралармен өтті. Сөз жоқ, ұлыстың ұлы күні Шымкент қаласында айрықша тойланды. Тың, жаңа бастамалар жүзеге асып, тарихы тереңнен бастау алатын мерекенің қадір-қасиеті көпке насихатталды. Мерекелік шаралар қатарында ресторандар жәрмеңкесі де болды. Қызығы мен жаңашылдығы көп шара жайында тарқата жазайық…

Наурыз мерекесі қарсаңында өткен «ДәмДәсTour» тұңғыш ресторандар жәрмеңкесіне келуші қонақтар мен қала тұрғындарына 2200 шыны «Шымкент шайы» ұсынылды. Қаланың 2200 жылға жуық тарихы шеңберінде іске асқан шара – Қазақстан Рекордтар кітабына енгізу бойынша гастрорекордқа ұсынылды. Шай «Ahmad tea» өндірушілерінің қолдауымен дайындалған.
Бұған дейін ресторан өкілдерінің қатысуымен өткен кездесулердің бірінде сусындар мәзірінде «Шымкент шайын» қолдану бойынша ұсыныстар айтылған еді. Ұсынысты Туризм және сыртқы байланыстар басқармасының басшысы Ерлан Қыдыров қоғамдық тамақтану орындарына жеткізген. Олар бірауыздан қолдаған болатын. Қазірде «Понтос», «Мизам», «Jam Bakery», «Quvshin» сынды бірнеше кафе-ресторанда «Шымкент шайы» аз мәзіріне енген.
Айта кету керек, үшінші мегаполисте алғаш рет ұйымдастырылып отырған шара жергілікті қоғамдық тамақтану орындарының бәсекелестігін арттырып, сервистік қызметтің жандана түсуіне мүмкіндік береді. Сондай-ақ мерекелік шараларда немесе қалаға саяхаттаушы азаматтардың көптеп келуінде дәмді тағамдарымен өз деңгейлерінде қамтуға дайын болуына да таптырмас мүмкіндік.

Шымкент қаласының әкімі Мұрат Әйтеновтің шағын аудан тұрғындарымен тілдесіп, мәселелерін тыңдап жүргенін жиі байқайтын болдық. Қала маңындағы ықшамаудандарда тұратын азаматтар өңірдегі өзекті мәселені көтеріп, шешілуін сұрап та жатады. Осындайда мәселенің бары белгілі, шешімін тауып жатыр ма деген заңды сауалдың туары белгілі. Тұрғындар тарапынан көтерілген қанша мәселе шешімін тапты?

Жыл басынан бері Әл-Фараби ауданы тұрғындары көтерген 33 мәселенің 13-і оң шешімін тапқан. Бұл туралы аудан әкімі Рашид Мыңбаев қала басшысының аудан белсенділерімен өткен кезекті «ашық диалог» форматындағы жиында баяндады. Жұмыстардың жүйелі түрде атқарылып жатқанын басқосуға келген тұрғындар да растады.
Жиынға ҚР Парламенті Сенатының депутаттары Айгүл Қапбарова мен Нурлан Бекназаров, аудандық қоғамдық бақылау кеңесінің мүшелері және аудан тұрғындары қатысты. 33 хаттамалық тапсырманың 13-і орындалған болса, қалғаны белгіленген кестеге сәйкес жүзеге асып жатыр. Бірқатарына тоқталсақ, Сәуле шағын ауданына жүретін №96 және №43 қоғамдық көліктердің бағытына өзгеріс енгізілді. Тұрғындардың ұсынысы бойынша бұл бағыттар мектеп пен емхананы қамтыды. Сонымен қатар шағын ауданда 5 аялдама орнатылды. Ақжайық шағын ауданында биыл Ақжелен көшесінен кіретін атауы жоқ 4 көше орташа жөндеуден өтеді. Елді мекендегі Тоқпан, Балтамыр және Майлыкент көшелерінің ойық жерлерін бітеу жұмысы да жүргізіледі.
Тұрғындар Забадам каналын белгісіз тұлғалар қазып жатқаны туралы шағымын жеткізген болатын. Полиция қызметкерлері каналдың арнасын заңсыз кеңейтіп жатқан 4 үйді анықтады. Оларға ҚР ӘҚБтК-нің 505-бабы бойынша ескерту хаттамасы толтырылды. Мұндай заңсыздықты болдырмау мақсатында каналды бетондау үшін жобалық-сметалық құжаттамасы әзірленуде. Сонымен қатар Ақтас шағын ауданының жаңақұрылыс аумағын табиғи газбен қамту үшін бүгінде құрылыс жұмысы жүргізілуде. Бұл жұмыстарды қазан айына дейін аяқтау жоспарланып отыр. Нәтижесінде 65 үй табиғи газге қол жеткізбек.
Жиын барысында қала басшысы тапсырмалардың орындалу барысын пайыздық көрсеткіштермен ай сайын баяндап отыруды тапсырды. Ал аудан белсенділері шешімін тапқан мәселелер бойынша ризашылығын білдірді.

Шымкент қаласында Қазақстан Республикасының президенті Қасым-Жомарт Тоқаевтың «Жаңа Қазақстан: Жаңару мен жаңғыру жолы» атты Жолдауын жүзеге асыру бойынша актив отырысы өтті. Жиында қала әкімі Мұрат Әйтенов болашақта болатын бірқатар маңызды өзгерістер жайына тоқталып өтті.

«Бәсеке болғанда ғана халықтың әл-ауқаты артып, жағдайы жақсарады. Сондықтан президенттің көптеген құзыретінен бас тартатытын айтты. Сонымен бірге, саяси партияларды тіркеу шегін төрт есеге азайтып, 20 мың адамнан 5 мың адамға төмендетуді ұсынды. Бұл өз кезегінде жаңа партиялардың пайда болып, партияаралық бәсекелестікті арттырып, қоғамды демократияландыру үдерісін жетелдетеді» деді қала басшысы. Президент барлық партияларға тең мүмкіндік жасау үшін партия төрағалығынан кететінін жариялап, әкімдер мен олардың орынбасарларына партия филиалдарын басқаруға заң жүзінде тыйым салу керегін мәлімдеген еді. Осы орайда, Мұрат Әйтенов партия атынан сайланған депутаттар сайлауалды бағдарламаның орындалуына қатаң бақылауда ұстап, жергілікті атқарушы орган мен сайлаушылар арасында алтын көпір бола білуі керек деп ойлайтынын жеткізді.
Жиын барысында қала әкімі Қоғамдық кеңеске мүше ұсыну құзыретінен бас тартатынын да айтты. «Қазіргі таңда Шымкент қаласында Қоғамдық кеңес құрамын жасақтау жүріп жатыр. Бүгінгі кеңестің 29 мүшесінің 10-ы не мемлекеттік қызметкер, не болмаса квазимемлекеттік сектордың қызметкерлері болса, енді сайланып жатқан Кеңес толығымен азаматтық қоғам өкілдерінен құралады деген сенімдемін. Әкім ретінде менің Кеңестің 29 мүшесінің 9-ын ұсыну құзырым бар. Алайда бұл құзырымнан бас тартып, ешкімді ұсынған жоқпын. Үміткерлер өздері қатысып, тәуелсіз таңдау комиссиясы өздері шешім шығарады» деді Мұрат Әйтенов.
Президенттің азаматтық қоғамды дамытуға көп көңіл бөлгенін айтқан қала басшысы Шымкентте 840 үкіметтік емес ұйым тіркелгенін, өкінішке қарай оның бәрі бірдей белсенді қызмет атқармайтынын да атап өтті. Осы ретте қала әкімі кәсіпкерлерді азаматтық бастамаларды қолдауға шақырып, үкіметтік емес ұйым басшыларын мемлекеттік қолдаумен бірге, бизнес қауымдастықпен тығыз қарым-қатынас орнатуға тиіс екенін жеткізді.

Түркістан облысында Сауран ауданының құрылғанына да бір жылдың жүзі болды. Еншісін алып, жеке аудан ретінде бөлініп шыққан өңірде бүгінгі күннің өзінде құрылыс қарқыны артқан. Жуық арада өңір бірнеше әлеуметтік нысандармен толыға түспек.

Атап айтсақ, келер жылы Оранғай ауылында 150 орындық, Жаңа Иқан ауылында 200 орындық мектеп құрылысы аяқталып, пайдалануға беріледі деп жоспарланып отыр. Биыл Қосмезгіл елді мекеніндегі 300 орындық білім ордасы пайдалануға беріледі деп күтілуде.
Аудан орталығы Шорнақта әкімшілік-іскерлік орталығының құрылысын жүргізу үшін 38 гектар жер телімі бөлінген. Қазіргі таңда аудан әкімдігінің құрылысы басталып кетті. Сондай-ақ 1 өрт сөндіру депосы, 200 орынға шақталған орталық аурухана, 500 орындық мәдениет үйінің салынуы жоспарлануда. Айта кетейік, ауданның топографиялық түсірілімімен бірлескен бас жоспарын егжей-тегжейлі жоспарлау жобасы әзірленуде. Бас жоспар аясында аудан орталығына Аша және Қосмезгіл ауылдары біріктіріліп, Шорнақ елді мекені болып аталатын болады.

Түркістан қаласының облыс орталығы болуы Кентаудың да дамуына тың серпін берді. Енді аталған қала әкімдігі Кентауды қауіпсіз қалаға айналдыру бастамасын көтеріп, бірқатар тың жобаларды жүзеге асыруды бастап та кетті. Солардың бірі – «Қауіпсіз қала» жобасы аясында сергек бейне бақылау камераларын орнату.

 

Жоба мақсаты — қаланың қауіпсіздігін күшейту, жол қозғалысы ережесінің бұзылуына жол бермеу және жол-көлік оқиғасының санын азайту. 16 наурыздан бастап қаланың Ясауи мен Төле би көшелерінің қиылысына, «Ынтымақ» алаңына қойылды. Жалпы 20 «Сергек» бейне бақылау камераларын орнату қажет пунктілері ұсынылған. Қала әкімі Рашид Аюпов Кентауды қауіпсіз қалаға айналдыру мақсатында жыл соңына дейін сергек бақылау камералардың санын арттыруды жоспарлауда. Жүргізушілер жылдамдықты асырмай, өзі мен жолаушылардың өмірі үшін жол ережелерін сақтағаны абзал. Әйтпегенде ауқымды айыппұл арқалауға тура келеді.
Қолға алынған бастама жол көлік оқиғаларының санының кемуі мен жүргізушілердің мәдениетін арттыруға сеп болмақ. Қала берді қаланың қауіпсіздігіне де үлкен септігін тигізеді.

AMANAT партиясы Сарыағаш аудандық филиалы жанынан құрылған «Парасат» пікірталас клубының алғашқы отырысы өтті. Алғашқы жиында Сарыағаш ауданының әкімі М.Отаршиаев төраға болып сайланып, жиынды жүргізді.

 

«Парасат» пікірталас клубы қоғамдағы өзекті мәселелерді ашық айтып, пікірталас алаңында жан-жақты талқылау мен шешу жолдарын қарастыруды көздейді. Сонымен қатар ауданның белсенді азаматтары мен саяси партиялардың, үкіметтік емес ұйымдардың және мемлекеттік органдардың өкілдері арасында сындарлы диалогты қамтамасыз ету міндетін де атқарады. Басқосуға аудандық мәслихат хатшысы С.Тасқұлов және «Amanat» партиясының Сарыағаш аудандық филиалының атқарушы хатшысы Қ.Қыстаубаев, аудандық мәслихат депутаттары мен жастар, ауданның ардагерлері, қоғам белсенділері, қоғамдық ұйым мүшелері, БАҚ өкілдері қатысты.
Отырыс төрағасы келесі жиында жастар тәрбиесі, сыбайлас жемқорлықты жою, ауыл шаруашылығы және медицина саласындағы өзекті мәселелер бойынша ашық диалог жүргізуді ұсынды. Бұдан бөлек, алда өтетін отырыстардың төрағасын тақырыпқа сай сайлау мәселесі де талқыланды. Жиында клуб мүшелері белсенділік танытып, түрлі салаға қатысты ұсыныс-пікірлерін айтты. Атап айтсақ, еркін форматта жүргізілген басқасуда клуб мүшелері жастар арасында жұмыссыздықты жою үшін өндіріс орындарын ашу, әкелер мектебін жандандыруды, әлеуметтік мәселелер және тағы да басқа ұсыныстарын ортаға салды.
Отырыс соңында келесі жиында жастар тәрбиесі мәселесі қаралатыны айтылды және кезекті отырыстың төрағасы сайланды. Алдағы уақытта клуб отырысында аудан көлеміндегі өзекті мәселелердің шешілу жолдары қарастырылып, кез-келген салада орын алып жатқан түйткілдер пікірталас алаңында ашық талқыланып, көтерілген мәселелер бойынша тиісті жұмыстар атқарылмақ.

Қоғам сан түрлі даму сатысынан өтті. Тасқа қашап сурет салды. Терімшілікпен тіршілік етті. Аңшылықты азық қылды. Құлдық дәуірде қиналды. Феодалдық дәуірде патшаның пәрменімен ғана ғұмыр кешті. Десе де қай дәуірді алсаңыз да жұлдыздардың жайын білу мен айналаны аспаннан тамашалау Адам ата ұрпағы үшін тылсым құпия күйінде қалып келді. Рас, шетсіз де шексіз құм даладағы керуен де, тізіле қалқып, асау толқынмен алысқан кемелер де аспандағы жұлдызға қарап жолын тапты, бағытын түзеді. Әйткенмен ғарыш әлемінің құпиясын анық біліп, айқын түсінген ешкім жоқ. Қаншама зерттеу жасалды, ғылым теориялармен толыға берді. Телескоппен түнгі аспанға телміріп талай ғалым өтті. Ғұмырын ғарышты зерттеуге арнаған адамдардың санынан тарих жаңылды. Десе де…

 

1961 жылы бүкіл адамзат радиодан тамаша жаңалық естіп, жағаларын ұстады. 12 сәуір күні адамзат атаулы алғаш рет ғарышқа ұшты. Иә, Юрий Гагарин көкке көтеріліп, дөп-дөңгелек жерімізді иллюминатордан тамашалады. Мыңдаған жылдар бойы аса үлкен құпия күйінде қалып келген жаңа ғылымға жол салынды. Аспан әлемінің алғашқы есігі ашылды. Ең қуантарлығы, ғарышқа жол алғаш болып біздің елімізде салынды. Байқоңыр ғарыш айлағы аспан мен жерді байланыстырушы алғашқы тетік ретінде тарихқа енді. Бертін келе ғарышкер атанғандар саны ондап, жүздеп, тіпті, тыңдап санала бастады.
Ғарышқа жол салынған елден ғарышкердің шықпауы мүмкін емес. Бізде бір емес үш бірдей ұлттың батыры, ұшқыш-ғарышкер бар. Олар — Тоқтар Әубәкіров, Талғат Мұсабаев және Айдын Айымбетов. Ұлты құрметтеп, ұлына есімін берген азаматтарды талай бүлдіршін үлгі етіп өсті. “Ғарышкер болам!” дейтін балалардың саны да жыл санап артып келеді. Осы тұста, тарихқа шегініс жасап көрейік…
1991 жыл. 2 сәуір күні Кеңес Одағы Ғарышкерлер даярлау орталығында ғарышқа ұшу дайындығынан өткен Тоқтар Әубәкіров 2 қазанда Байқоңырдан «Союз ТМ-13» кемесімен ғарышқа аттанды. Ғарыш кемесі жер төңірегіндегі «Мир» орбиталық кешенімен түйісті. Онда ол өзге ғарышкерлермен бірге биотехнология, металлургия, медицина салалары және Арал аймағы бойынша ғылыми-зерттеу жұмыстарын жүргізді. Ғарышкермен бірге көкке кеңес ғарышкері Александр Волков пен австриялық космонавт Франц Фибек те көтерілген болатын. Олар “Мир” кешенінде 1 аптадан аса жұмыс істеп, 10 қазанда қайта жерге оралды. Бұл уақытта әр қазақтың үйінде тұңғыш ғарышкер туралы ертегіге бергісіз әңгімелер айтыла бастаған еді. Тіпті, Тоқтар Әубәкіровтің өзі талай баланың ғарышқа деген қызығушылығын оятамын деп ойламаған да шығар.
Тағы бір ғарышкеріміз Талғат Мұсабаев ғарыш кемесіне 3 рет мінді. 1994 жылы 1 шілдеде «Союз ТМ-19» экипажының борт инженері ретінде ғарыш сапарына аттанды. Оның әр жылдардағы ғарыштық экспедицияларының жалпы ұзақтығы бір жылға жуық уақытты құрайды. Осылайша есімі қазақ тарихына “ғарышта ең ұзақ болған ғарышкер” ретінде енген. Ал Айдын Айымбетов 2015 жылдың қыркүйек айында ғарышкер атанған. Қазақстан атынан халықаралық экипаж құрамында ғарышты бағындырған тұңғыш ғарышкер-ұшқыш екенін де тілге тиек ете кетейік. Ол Каспий теңізі мен Арал көлі маңының экологиялық жағдайына байланысты зерттеулерін жүргізген. Ғарышта болған уақыты — 9 күн, 20 сағат, 13 минут.
Қорыта келсек, ғарыш әлемінің құпиясы әлі де толық ашылған жоқ. Тарихтың дерегіне сенсек, аспанға жол Қазақстаннан ашылған. Дәл сол 12 сәуірде әлем халқы ғарышкерлер күнін тойлайды. Алдағы уақытта көктің адамзат әлі білмеген құпиясын ашып, ғылымға ауқымды үлес қосар жастарымыз көбейсін. Қазақтың аты ғарышта да, ғылымда да шыға берсін! Ал үш қаһарманымызды келе жатқан ғарышкерлер күнімен құттықтаймын!

Уәлиханова Медина,
Нұр-Сұлтан қаласы,
Алматы ауданы
93 мектеп-лицейдің 8 А сынып оқушысы,
Жетекшісі — Ешимова Нургул Абдухакикаткызы.

Түркістан облысы, Созақ ауданының әкімі Мұхит Тұрысбеков білім, мәдениет саласының жастары, жас кәсіпкерлер, ерікті жастар және оқушылардың басын қосып, жиын өткізді. Кездесу аудандық «Мыңжылқы» мәдениет үйінде өтті. Онда Құмкент ауылындағы Қ.Сәтбаев мектеп-гиманзиясының 6-сынып оқушылары Назира Бегалы мен Айдана Қыстау аудан әкіміне смартфонмен басқарылатын робот техникасын таныстырды.

 

«Сіздермен кездесуді жоспарланғаныма біраз болды. Міне, бүгін сәті түсті. Кез-келген сауалдарыңызды қойып, еркін пікір алмасуға шақырамын» деді аудан әкімі Мұхит Сексенбайұлы кездесу барысында. Жастар өз ойын ортаға салып, ұсыныстарын да білдірді. Мәселен, Ы.Алтынсарин мектебінің оқушысы Құралай Ізбасарова алдағы тоқсандық демалыс кезінде оқушыларды тарихи-мәдени орындарға саяхатқа жіберуді ұйымдастыруды сұрады. Сонымен қатар талантты балаларды тереңдетіп оқытатын мектеп ашылса деген ұсыныс та айтылды. Айтылған ұсыныс орынды екеніне тоқталған аудан басшысы оқушылардың демалысын тиімді ұйымдастыру үшін үздік оқушыларды облыстағы тарихи орындарға саяхаттау мәселесін шешетінін жеткізді.
Бұдан бөлек, таукенттік тұрғын Әкім Байдосұлы жастарды оқыту және үйірмелерге арналған ғимаратпен қамту мәселесін көтерді. Өз кезегінде, аудан басшысы Шолаққорған ауылында бос тұрған үлкен ғимаратты жастарға ұсынды. Алдағы уақытта ғимарат жөндеуден өтіп, жастарға арналған үйірмелер мен тіл курстары ашылмақ. Сондай-ақ жиын барысында жұмыссыздықты жою, жеңілдетілген грант алу, ауыл шаруашылығы мақсатында жер телімін алып, егін егу мәселелері де сөз болды. Кездесу соңында аймақ басшысы мұндай кездесулердің алдағы уақытта да өткізіліп тұратынын айтты.

ҚР Президенті Қасым-Жомарт Тоқаевтың халыққа арнаған Жолдауындағы міндеттерді орындау мәселелері бойынша Түркістан қаласында партияның облыстық активінің мәжілісі өтті. Оны облыс әкімі, «Amanat» партиясының облыстық филиалының төрағасы Өмірзақ Шөкеев төрағалық етіп жүргізді. Жиынға партияның облыстық филиалының атқарушы хатшысы Бейсен Тәжібаев, Саяси кеңес мүшелері, қоғамдық кеңестер мен бастауыш партия ұйымдарының төрағалары, мәслихат депутаттары, партия ардагерлері мен белсенділері, үкіметтік емес ұйым және БАҚ өкілдері қатысты.

Жиын барысында Өмірзақ Шөкеев «Мемлекет басшысы Қасым-Жомарт Тоқаев биылғы Жолдауында алдағы жүзеге уақытта жүзеге асатын Мемлекеттік басқару ісіндегі басты өзгерістерге тоқталды. Елде Парламенттің ықпалын күшейтіп, берік негізді елге айналудың алғышарттарын ұсынды. Саяси трансформациялар – қоғамдағы әділдікті орнатып, ел даумына ерекше серпін беретіндігіне де тоқталды. Мемлекет басшысының ұсынысымен еліміздің әкімшілік-аумақтық құрылымына өзгерістер енгізіледі. Бұл тарихи әділеттілікті орнатып қана қоймай, жергілікті тұрғындардың әлеуметтік жағдайына да оң ықпалын тигізері анық. Біз бұған өзіміздің Түркістан облысының бүгінгі келбеті мен тыныс-тіршілігін мысал ретінде көрсете аламыз» деп атап өтті. Сонымен қатар Жолдауда айтылған негізгі бастамалар жаңа Қазақстанды құруға айрықша ықпал ететінін жеткізді.
Ал AMANAT партиясы Түркістан облыстық филиалының атқарушы хатшысы Бейсен Тәжібаев саяси ұйымдағы жаңа бастамалар мен модернизациялау бағытында істеліп жатқан жұмыстар жайына тоқталып өтті. «Облыстық және аудандық мәслихат депутаттарының, жауапты басқарма мен жергілікті құрылымдық бөлім мамандарының қатысуымен мобильді қоғамдық қабылдаулар жүргізілуде. Алғашқы қабылдаулар Қазығұрт, Созақ аудандарының шалғай ауылдарында өтті. Қабылдауларға 244 азамат келіп, өз өтініштерін білдірді. Олардың негізгі көтеріп отырған мәселелері – жаңа мектептер салу, субсидия, ішкі жол құрылысы, ауыз су, жайылым жер, электр энергиясы мен интернет сапасының нашарлығы, денсаулық сақтау және тұрақты жұмыспен қамту. Бұл жұмыстар биыл 1 маусымға дейін 14 ауданның ең шалғай ауылдарында жалғасады. Облыс көлеміндегі бастауыш партия ұйымдарында зерделеу жүргізіліп, 21 БПҰ-да қоғамдық қабылдау бөлмесін ашу қолға алынды. Сонымен қатар облыстық партия филиалы жанынан құрылған 12 қоғамдық кеңес оңтайландырылып, саны 8-ге азайды. Ал аудан, қалалардағы кеңестердің саны 9-дан 5-ке кеміді. Қалай десек те, бүгінгі Жолдау ел тарихында «Жаңа Қазақстан» тұжырымдамасын іске асырудың басты, құнды құжаты ретінде саналары анық» деді өз сөзінде Бейсен Тәжібаев.
Бұдан бөлек, алқалы жиында Сауран аудандық ардагерлер кеңесінің төрағасы Сейілхан Ахметов, «Turkistan» телеарнасының ақпараттық-сараптамалық бағдарламалар департаментінің директоры Гүлжазира Матенова, Келес аудандық мәслихатының депутаты Д.Абдиев Жолдауға қатысты ойларын ортаға салды. Мәжіліс соңында өңір басшысы Жолдауды жан-жақты саралау үшін аудан мен қалаларда актив жиналыстарын өткізіп, көпке насихаттау ісін ұйымдастыруды тапсырды.