Маңызды

Түркістанда ескек есу базасының құрылысы жүруде. Облыс әкімі Өмірзақ Шөкеев халықаралық талапқа сай бой көтеруі тиіс нысанның аумағына барып, атқарылып жатқан жұмыстармен танысты. Сала мамандары мен жауаптыларға тиісті талаптар беріп, жұмыс барысын пысықтады.

Қазіргі таңда «Түркістан қаласында спорт кешендері бар есу каналын салу» жобасының бірінші кезеңі жүруде. Ағымдағы жылдың мамыр айында басталған құрылыс жұмыстары 2022 жылы аяқталады. Құрылыс-монтаж жұмыстары барысында ескек есу базасының топырағы қайта нығыздалып, төселген. Резервуарларын бетондау жұмыстары жүргізілуде.
Облыс әкімі Өмірзақ Естайұлы құрылысы жүріп жатқан нысандарды аралау кезінде халықаралық теннис орталығы мен мұз сарайының құрылысын да тексерді. Бүгінде мұз сарайының іргетасы қаланып, бағандары бетондалу үстінде. Ал халықаралық теннис орталығының әкімшілік ғимаратындағы бетондау жұмыстары толығымен аяқталып, бірінші және екінші қабаттың электр желілері тартылған. Аталған қос нысан да келесі жылы ел игілігіне берілетін болады.
Айта кетейік, бүгінде Түркістан қаласында 221 спорт нысаны бар. Атап айтқанда, 1 спорт сарайы, 3 стадион (ХҚТУ, О.Жарылқапов, Түркістан Арена), 5 спорт кешені (Бокс Федерация, Б.Шолақ, №4 БЖСМ, Халықаралық туризм меймандостық академиясы), 139 спорт ойын алаңы, 10 теннис корты, 5 жүзу бассейні (Спорт сарайы, Су спорт кешені, «Акваланд» су кешені, «Шипа су» бассейні, «ХҚТУ» бассейні), 59 спорт залы жұмыс істеп тұр.
Барлығы 64 ашық спорт алаңшасы заманауи үлгідегі жасанды төсенішпен салынып, пайдалануға берілген. Оның ішінде 31-і кіші футбол алаңы, 16-ы баскетбол алаңы, 7 теннис корты, 7 «Street Workout» алаңы, 3 «Street bаll» алаңы.
Бүгінде қала тұрғындары спорттың волейбол, бокс, таэквандо, тоғызқұмалақ, баскетбол, қазақ күресі, самбо, үстел теннисі, футбол, жеңіл атлетика, дзюдо, еркін күрес сынды 12 түрімен айналысады.

Биыл Төлеби ауданында 49 көшеге орташа жөндеу жұмыстары жүргізілді. Барлығы 78,8 шақырымды құрайтын көшелердегі орташа жөндеу жұмыстары «2020-2022 жылдарға арналған жол жөндеу жұмыстары бойынша» бекітілген іс-шара жоспарына сәйкес атқарылды.

Бұл туралы Төлеби ауданы әкімінің баспасөз қызметі хабарлайды.
Ауданда ағымдағы жылы «Ауыл-Ел бесігі» жобасы бойынша 27 жол орташа жөндеуден өтіп жатыр. Сондай-ақ республикалық, облыстық және аудандық бюджет есебінен 22 нысан іске асуда.
Осы жылы жолда атқарылған құрылыс жұмыстарының нәтижесінде аудандағы елді мекендердегі ішкі көшелердің қанағаттанарлық жағдайы 63,2-ден 73 пайызға жетеді.

Осындай тақырыппен «Әзірет Сұлтан» мемлекеттік тарихи-мәдени қорық-музейі Сауран ауданы, Амангелді атындағы жалпы орта мектебінде фото және кітап көрмесін ұйымдастырды. 

Шарада өскелең ұрпаққа музей өкілдері Қазақстан Республикасының Тұңғыш Президенті-Елбасы Нұрсұлтан Назарбаевтың «Болашаққа бағдар: Рухани жаңғыру», «Ұлы даланың жеті қыры» бағдарламалық мақалалары аясында атқарылған еңбектері таныстырылды. Сонымен қатар ел Тәуелсіздігінің 30 жылдығын насихаттауды мақсат еткен көрмеде Қожа Ахмет Ясауи кесенесіндегі ортағасырлық тарихи жәдігерлер жайлы мағлұматтар беріліп, деректі, мазмұны терең құнды кітаптар таныстырылды. Көрмеге мектеп әкімшілігі мен ұстаздар және оқушылар қатысты.
Басқосу барысында «Әзірет Сұлтан» мемлекеттік тарихи-мәдени қорық-музейінің ғылыми қызметкері Т.Оразов «Тәуелсіздік-ең басты құндылығымыз», экскурсовод Қ.Нұрахметова «Тәуелсіздік-ел тұғыры» тақырыбында лекция оқып, оқушыларға Тәуелсіздік пен Түркістан ұғымдарының кешегі, бүгінгі және болашақтағы маңызы туралы әңгімеледі.
Кездесу аясында оқушылар да өзіндік пікірлерін білдіріп, ұйымдастырушыларға тарихи мұраларды сақтау, қорғау, олар жайлы деректерді зерттеу мәселелері бойынша сауалдар жолдады.

Осы аптада Түркістан облысының әкімі Өмірзақ Шөкеев әкімшілік-іскерлік орталығы аумағында салынып жатқан 9 және 12 қабатты барлығы 15 көпқабатты үйдің «А» және «Б» блогын инфрақұрылыммен қамту жұмыстарын көрді. Бүгінде аталған тұрғын үйлерде тұрғындарға жағдай жасау үшін байланыс, жарық, су және кәріз жүйесімен қамтамасыз ету бағытында жұмыстар жүріп жатыр. 2022 жылы үйлердің маңы толық реттеліп, заман талабына сай болады.

Қазіргі таңда қаладағы әкімшілік-іскерлік орталығындағы №9 көшесіндегі 9-12 қабатты 32 үйдің де инфрақұрылымын жақсарту, абаттандыру, ауыз су, кәріз, байланыс және электр қуатымен қамту жобалары қолға алынған. Бүгінде әкімшілік-іскерлік орталығында аталған нысандардан бөлек көпқабатты тұрғын үйлер салынуда.
Өмірзақ Шөкеев мердігер компания өкілдерімен және құрылысшылармен тілдесіп, нысандарды дер кезінде әрі заман талабына сай салып, елге тапсыру міндеті тұрғанына тоқталды. Әкімшілік тарапынан өзекті мәселелерді шешуге қолдау көрсетілетінін айта келе құрылысқа жауапты басшыларға бірқатар тапсырма берді.
Түркістан қаласындағы әкімшілік-іскерлік орталықта 2020 жылдан бастап 7, 9 және 12 қабатты жалпы 82 тұрғын үйдің құрылысы басталған. Ондағы пәтерлер саны 5313-ке жетеді. Оның ішінде 4039 пәтер кредиттік негізде үлестірілетін болса, 1274 пәтер баспана кезегінде тұрғандарға беріледі. Құрылыс жұмыстарының барлығы мемлекеттік бюджет есебінен жүргізілуде. Сол 82 тұрғын үйдің 45-і 12 қабатты (210,5 мың ш.м, 3237 пәтер), 5 үй — 9 қабатты (14,02 мың ш.м, 225 пәтер), 32 үй — 7 қабатты (116,4 мың ш.м, 1851 пәтер).

Румыния елінің астанасы Бухарест қаласында армрестлингтен 42-ші әлем чемпионаты өз мәресіне жетті. Байрақты жарыс өткен айдың 27-қарашасында басталып 3-желтоқсанда қорытындыланды.

Байрақты бәсекеге 50-ге жуық мемлекеттің қол күресінен кіл мықтылары өзара бақ сынасты. Газетіміздің өткен санында аталған сайыстың жасөспірімдер және жастар арасындағы жарысы 29-қарашада аяқталғанын, нәтижесінде шардаралық өрендер қоржынға 22 алтын медаль салғанын жазған болатынбыз.

Ал ересектер арасында ұлттық құрама сапында сынға түскен Түркістан облысының спортшылары 3 алтын, 2 күміс, 1 қола медальға қол жеткізді. Атап айтқанда, 55 келі салмақта Нұрмахан Ердәулет топ жарса, 60 келіде Ерсайын Мейрамбек және 65 келіде Сарыбай Ердәулет барлық қарсыластарынан басым түсіп, әлем чемпионы атанды. Сонымен қатар 75 келіде Мағжан Шамиев мен 100 келіде сынға түскен Берік Тағабаев күміс алқаны иеленсе, 55 келі салмақта Абсаттар Даурен қола жүлдегер атанды.
Әлем чемпионатының қорытындысы бойынша «Шардара армспорт» клубының өрендері жасөспірімдер, жастар, ересектер арасында жалпы 25 алтын жүлдеге қол жеткізіп, жанкүйерлеріне жемісті жеңіс сыйлады.
Айта кетейік, «Шардара армспорт» клубы 2000 жылы құрылған. Оның негізін армрестлингтен Қазақстанның чемпионы, Азия және әлем чемпионаттарының жүлдегері, халықаралық дәрежедегі спорт шебері Арман Қарсыбаев қалаған.

Осы аптаның сейсенбісінде елордада Қазақстан Республикасы Президентінің «Алтын сапа» сыйлығының жеңімпаздары анықталды. Әр кәсіпорынның деңгейі сыналатын шара он бес жылдан бері тұрақты өткізіліп келеді. Бүгінге дейін 150-ден астам компания Президент сыйлығының иегері атанған.

Мемлекет басшысы Қасым-Жомарт Тоқаев премия иегерлерін онлайн құттықтады. Президент «Біз сапалы өнім өндіріп, табысты жұмыс істеп жатқан бизнес өкілдерін жыл сайын марапаттаймыз. Әлеуметтік бастамаларды жүзеге асыруға барынша атсалысып жүрген іскер азаматтарға құрмет көрсетеміз. Осылайша, еткен еңбек пен шынайы табысты дәріптейміз. Мұның зор символдық мәні бар. Егемендік кезеңінде Қазақстанда бизнестің дамуына жан-жақты жағдай жасалды. Соның нәтижесінде жаңа заманға сай кәсіпкерлер шоғыры қалыптасты. Олар ұлттық экономиканың басты қозғаушы күшіне айналды. Бүгінде отандық бизнес еліміздегі индустрияландыру үдерісіне зор үлес қосып жатыр. Кейінгі 10 жылда өңдеу өнеркәсібінің экономикадағы үлесі тау-кен саласының көрсеткішінен асып, 33 пайызға жетті. Бүкіл еліміз бойынша 1 500 жаңа өндіріс іске қосылды. Бұл мақсатқа 9 трлн теңгеден астам инвестиция жұмсалды. 820 мыңнан астам тұрақты жұмыс орны ашылды. Былтыр өңдеу өнеркәсібінің экспорты үш есе өсіп, 15,4 млрд долларға жетті. Қазақстанда өңделген өнімдер бүгінде 131 мемлекетке экспортталады»,-деді.
Қазақстандық нарықтағы ең үздіктерді анықтауға көмектесетін бұл жолғы шара Түркістан өңірінің кәсіпкерлері үшін өте табысты болды. Осы жылғы байқауда «Бизнес кемелділік» арнайы халықаралық сыйлығын «Бөрте Милка» ЖШС алса, «Балмұздақ» ЖШС «Іскер» арнайы сыйлығының лауреаты атанды.
Айта кетейік, «Бөрте Милка» кәсіпорны 2016 жылы іске қосылған. Кәсіпорын 100-ге жуық адамды тұрақты жұмыспен қамтып отыр. Зауыттың өндірістік цехтары Оңтүстік Корея, Швейцария, Германия және Австрияның заманауи технологиялық желілерімен жабдықталған. Зауыт тәулігіне 13-15 тонна сүт өнімдерін өңдейді. Қазіргі уақытта мұнда қаймақ, май, йогурт, құрт, айран, балмұздақ және басқа да көптеген сүт өнімдері шығарылады.
Ал Төле би ауданындағы «Балмұздақ» ЖШС-нің 250-ге жуық жұмысшысы бар. «Балмұздақ» кәсіпорнында балмұздақтың 150-ден астам түрі шығарылады. Серіктестік өніміне деген сұраныс өте жоғары. Түркістан облысы кәсіпкерлер палатасының директоры Тимур Нақыпбеков жеңімпаздардың жетістігі – осы салада қабылданып жатқан мемлекеттік қолдаудың тиімділігінің дәлелі екенін алға тартады.

Сансыз баптар мекені Сайрам ауданында ел Тәуелсіздігінің 30 жылдығына орай республикалық айтыс өтті. «Мәңгілік ел жырлайды» тақырыбында өткен сөз сайысына Бөрібай Оразымбет, Серік Қалиев, Бекарыс Шойбеков, Ақмарал Леубаева, Маржан Есжанова, Анар Жаппарқұлова, Кәрима Оралова, Айбек Қалиев сынды елімізге танымал жыр жүйріктері қатысты.

Кіл жүйріктердің арасынан үздіктерді анықтау мәртебесі жазушы Мархабат Байғұт, драматург Сая Қасымбек, Нармахан Бегалиев, Ханбибі Есенқарақызы мен Сәбит Әбдірайымов сынды ақын азаматтарға тапсырылды.
Төл өнердің тізгін қағары белгілі сықақшы Көпен Әмірбек болды.
Айтыста 4 жұп өнер көрсетті. Сайыс нәтижесінде бас жүлде шалқар шабыт пен мәнерлі мақамның иесі түркістандық Бекарыс Шойбековке бұйырды. Ал, бірінші орын Серік Қалиевке бұйырса, екінші орынды Анар Жаппарқұлова, ал үшінші орынды Айбек Қалиев еншіледі. Айтыстың жарасымды үлгісін көрсеткен өзге де қатысушыларға арнайы жүлделер табысталды.
Қазылар алқасының төрағасы, жазушы Мархабат Байғұт ұйымдастырушылар мен айтыскерлерге алғыс білдірді.

Республика бойынша суармалы жерлердің үштен бір бөлігі Түркістан облысына тиесілі. Қазіргі таңда облыста суармалы жер көлемі 540 мың гектардан асады.

Бұл туралы Өңірлік коммуникациялар қызметінде өткен брифингте «Оңтүстік Қазақстан гидрогеологиялық-мелиоративтік экспедициясы» республикалық мемлекеттік мекемесінің басшысы Мейіржан Есенбеков мәлімдеді.
Мекеме басшысы облыстағы суармалы жерлердің жер асты суының деңгейі мен оның тұздылығын бақылау жұмыстары туралы баяндады.
– Жер асты суының деңгейі мен тұздылығын бақылау үшін барлық суармалы алқаптарда мекеменің 1200 дана бақылау құдығы бар. Өлшеу қорытындыларына сәйкес, 2021 жылы суармалы жерлердің 146 мың гектарында жер асты суының деңгейі шектеуден тыс жоғары (0-2 м) болғаны анықталған. Көрсеткіш өткен жылмен салыстырғанда 4,5 мың гектарға азайған. Ал, жер асты суының тұздылығы 3 г/л жоғары болған суармалы жерлердің көлемі — 81 мың гектарды құрап, өткен жылмен салыстырғанда шамамен 4 мың гектарға кеміген,-деді Мейіржан Есенбеков. Ол жер асты суының тұздылығы 3 г/л жоғары болған жерлердің басым бөлігі Мақтаарал, Жетісай және Отырар аудандарында кездесетінін атап өтті.
Облыстағы қашыртқы жүйелерде орналасқан гидробекеттерде қашыртқы суларының көлемдерін анықтау үшін ағымдағы жылы 964 рет өлшем жүрген. Өлшеу мәліметтеріне сәйкес, жалпы 2021 жылы облыстың суармалы алқаптары бойынша қашыртқы суларының жиынтық көлемі 625 млн текше метрді құраған.
Одан өзге биыл Түркістан облысында суармалы жерлердің мелиоративтік жағдайының құрылымы анықталған. Нәтижесінде 540 мың гектар суармалы жердің 185,5 мың гектары — мелиоративтік жағдайы жақсы, 166,6 мың гектар аумақтың мелиоративтік жағдайы қанағаттанарлық, 222,3 мың гектар алқаптың мелиоративтік жағдайы қанағаттанарлықсыз болған. Оның ішінде жер асты суының деңгейі шектеуден тыс жоғары жерлер — 88,4 мың гектар, топырақтың тұздануы — 44,1 мың гектар, жер асты суының деңгейі шектеуден тыс жоғарылығы және топырақтың тұздануы — 57,2 мың гектар, жер бетінің шектеулі деңгейден жоғары еңістігі — 32,6 мың гектарға жеткен.

Таяуда еліміздің Тұңғыш Президенті – Елбасы Нұрсұлтан Назарбаевтың «Тәуелсіздік тағылымы» атты мақаласы жарияланды. Мақаланың әлқиссасында Нұрсұлтан Әбішұлы егемен ел болғанымызға отыз жыл толғанына тоқталады. Содан соң дербес мемлекет болып құрылғанына отыз жыл толған торқалы той қарсаңында тәуелсіздіктен тағылым алу үшін туған халқымен ой бөлісуді жөн көргенін шегелей кетеді.
Тәуелсіздік кез келген ұлтқа бұйыра бермейтін қымбат құндылық. Елбасы «Тәуелсіздік тағылымы» атты мақаласында сол қымбат құндылық біздерге оңай келмегенін «Тәуелсіздікке барар қиын жолдардағы сансыз көп шайқастар мен көтерілістерде қаншама қаһарман бабаларымыз шейіт болды. Оларды еске алу, құрметтеу – біздің парызымыз» деген оймен сабақтайды.
Сол сөздердің жай риторика емес жүректен шыққан жолдар екенін «Мен миллиондаған адамды қанға бөктіріп, қисапсыз мол қиындықтардан тұратын XX ғасырдың ортасында дүниеге келдім. Бірінші дүниежүзілік соғысқа қазақтар қатыспаса да, патшаның 1916 жылғы маусым жарлығымен тыл жұмысы үшін әскерге шақырылды. Отаршыл өкіметтің өктемдігі мен зұлымдығы халықты ашындырып, төзімін тауысты. Сол кездегі Жетісу өлкесінің Қарқара, Қастек, Самсы өңірінде болған ұлт-азаттық көтерілістерге менің ата-бабаларым да қатысты» деген оймен айшықтайды.
Мақаласында одан өзге де тәрбиелік мәні бар тағылым келтірген Елбасы келешек ұрпаққа қарата «Азат еліміздің жастары тәуелсіздікке барар жолдың қандай азапты болғанын, қандай құрбандықтар мен сынақтар – 1916 жылғы ұлт-азаттық көтеріліс, азамат соғысы, ашаршылықтың алапат екі толқыны, қуғын-сүргін мен репрессиялар, Ұлы Отан соғысы, тың игеру жылдарындағы жаппай қоныс аударудың зардабы арқылы жеткенімізді білуі керек. Мұның өзі өткен тарихты қастерлеп, одан сабақ алу үшін қажет. Менің «Тәуелсіздік – бабалар қанымен келген киелі құндылық» дейтінім осыдан»,-деп үндеу айтады.
Қастерлі мереке қарсаңында жарияланған мақаласында Елбасы «Тәуелсіздікті жариялау оңай емес, оны бүкіл әлемге мойындату одан да қиын еді. Мен Қазақстан тәуелсіздігінің осындай биік деңгейде мойындалуын да алдын ала ойластырып қойған едім»,-дей келе, «Қазақстан тәуелсіздігін жариялаған күннің ертеңінде елімізге ресми сапармен АҚШ-тың мемлекеттік хатшысы Дж.Бейкердің өзі келді. Бұл оның Қазақстанға екінші сапары болатын. Осы уақыт ішінде екеуміз өзара сенімге негізделген достық қатынас орнатып үлгерген едік. АҚШ-тың сыртқы саясатына жауапты тұлға Қазақстанды тұңғыш Президент сайлауымен, тәуелсіздік жариялауымен шын жүректен құттықтады. Бұл ақпаратты онымен бірге келген шетелдік журналистер қауымы АҚШ пен Батыс елдеріне сол сәтте-ақ таратып жіберді»,- деп жазады.
Қазақстандықтар үшін ақжолтай жаңалықты АҚШ мойындап, танығаны туралы бұған дейін де айтылған. Мәселен, тәуелсіздік алғаннан кейін Сыртқы істер министрінің орынбасары қызметін атқарған, елдің сыртқы саясат тұжырымдамасы авторларының бірі Вячеслав Ғиззатов «1991 жылы желтоқсанның 16-сында Тәуелсіздігімізді жариялаған соң көптеген елдер оны мойындап, тани бастады. Сол жөнінде ресми мәлімдемелер бірінен соң бірі жарияланып жатты. Біздің көздегеніміз – дүниежүзілік саясатты құратын ірі де белді елдердің мойындауы болатын. Бұл сөз жоқ, бізге ары қарай сенімді қадам басуға қолғабыс болатыны анық. Қазақстан Тәуелсіздігін ең бірінші мойындап, таныған Құрама Штаттар болды. Бұл елдің дүние-жүзіндегі салмағы мен қуаты белгілі ғой. Екінші болып тағы бір белді ел – көршіміз Қытай мойындады. Одан кейін Ұлыбритания, сосын бөтендігі жоқ ағайын ел Моңғолия мойындады. Одан кейінгі кезек Франция, Жапония, Корея және Иранға тиді. Мұсылман елдерінің ішінен бірінші болып біздің Тәуелсіздігімізді Иран мойындады…Бірақ біздің елде елшілігін бірінші ашқан түріктер болды. Бұрынғы Кеңес Одағы елдерінен бірінші болып Литва, сосын Украина, Грузия мойындады. Ал империялық саясатқа еті үйренген Ресей тек жарты жылдан соң ғана, 1992 жылдың тамыз айында барып, біздің тәуелсіздігімізді мойындады»,-деді
Вячеслав Ғиззатовтың бұл сөзінен Тәуелсіздігімізді ең алғаш танымаса да Түркия Республикасының Қазақстанның егемен ел екенін нақты іспен мойындаған тұңғыш мемлекет екенін аңғаруға болады.
Жалпы Түркия Республикасының сол кезде Қазақстанға қарай мұндай қадам жасауына Ататүріктің «Мәңгі империялар жоқ… Кеңестік империя да күндердің күнінде құлайды. Оның қоластына кірген түркі республикалары да тәуелсіздік алады. Сонда біз олардың тарапынан өтініш түсуін күтпей, өз бауырларымызға көмектесуге тиістіміз»,-деген. Шежірелі тарихта жазылып қалған бұл сөзді Кемал Ататүрік 1933 жылы қазан айында Түркия Республикасының 10 жылдық мерейтойында айтқан.
Бұдан шығар мораль. Таңдаулы тұлғалардың толғана айтқан әрбір сөзі белгілі бір уақыттан соң салтанат құрады деп айтуға толық негіз бар. Тұңғыш Президент «Тәуелсіздік тағылымы» атты мақаласында Қазақстан өңірлері туралы «Астананың қарыштап дамуы еліміздің өзге өңірлерінің өркендеп өсуіне серпін берді. Шымкент халқының саны миллионнан асқан республикалық дербес үшінші қала қатарына қосылды. Екі мың жылдық тарихы бар көне Түркістан кейінгі екі жылдың ішінде айтарлықтай өзгеріп, әсем шаһарлардың біріне айналды. Еліміздің өзге өңірлері мен ірі қалаларын да дәл осындай болашақ күтіп тұр деп нық сеніммен айта аламын» деп болжам жасайды.
Дәл қазір Елбасының бұл сөзі жай айтылғандай болуы мүмкін. Бірақ Тұңғыш Президент-Елбасының халықпен бөліскен ойы өрілген «Тәуелсіздік тағылымы» атты мақаласындағы баянды болжамы алдағы күндерде орындалып, салтанат құруы әбден мүмкін. Солай дейік, солай боларына сенейік!

Садыбек БЕЙСЕНБАЕВ,
М.Әуезов атындағы Оңтүстік Қазақстан университетінің Қоғаммен байланыс және мәдениет жөніндегі проректоры.

Тәуелсіздіктің 30 жылдығы қарсаңында Арыс қаласында мемлекет және қоғам қайраткері Дінмұхаммед Қонаевтың бюсті орнатылды. Салтанатты шараға Арыс қаласының әкімі Гүлжан Құрманбекова, қайраткердің інісі Дияр Қонаев және зиялы қауым өкілдері қатысты.

Қала әкімі жиын барысында Дінмұхаммед Қонаевтың аймаққа сіңірген еңбегіне тоқталып өтті:
«Қазақ ССР Жоғарғы Кеңесінің 1956 жылғы 31 шілдедегі Жарлығымен Арыс — қала мәртебесіне ие болғаны белгілі. Мінекей, тура 65 жыл бұрын осы Жарлықтың күшіне енуіне Дінмұхамед Ахметұлы айрықша ықпал еткені ақиқат. Біз бүгін ел игілігі үшін ерен еңбек еткен ерлердің есімін ұлықтап, кейінгі ұрпаққа үлгі ету мақсатында осындай салтанатты шарада бас қосып тұрмыз. Бұл біз үшін зор мәртебе».
Ұлт тарихындағы көрнекті қайраткердің бейнесін айшықталған мүсінді Арыс қаласының тумасы, Суретшілер одағының мүшесі Тілеуберді Бинашев сыйға тартқан.