Маңызды

Кезінде Марк Твен статистиканы үш өтіріктің бірі деп келтірген. Осы аптада отандық ақпарат құралдарында жарияланған қазақстандықтардың орташа жалақысы туралы дерек Твеннің сол сөзін көп еске түсірді.
Сонымен ranking.kz ұсынған дерек бойынша ағымдағы жылдың үшінші тоқсанында ел тұрғындарының орташа айлық жалақысы 243,7 мың теңгені құраған. Орташа айлық жалақы өткен жылдың осы кезеңімен салыстырғанда 19,3 пайызға артқан. Еліміз бойынша ең көп жалақыны Атырау тұрғындары алады екен. Атырау тұрғындарының орташа айлық табысы 419 122 теңгеге тең екен. Одан кейінгі орында 346 542 теңгемен Маңғыстау облысы тұр. Елордалықтардың орташа жалақысы 338 мыңнан асса, Алматы қаласындағы көрсеткіш 283 мыңнан көп.
Орташа еңбекақысы ең аз өңірлер тізімінің көшін Түркістан облысы (181092 теңге), Жамбыл облысы (184408 теңге) және үшінші мегаполис Шымкент қаласы (189613 теңге) бастайды.
Қарап отырсаңыз осы деректе келтірілген ең төмен деп көрсетілген 181 мыңнан аса жалақы түсіне кіретін қызметкерлер қаншама. Ал орташа жалақы деп көрсетілген 243 мың теңгені айына емес, тоқсанына таппайтын жұмысшылар жетерлік. Санаулы бір азаматтардың орташа айлық жалақысын алып, жалпы статистика жасау арқылы биліктегілер кімді алдайды?
Егер елімізде орташа айлық жалақы шынымен де 240 мыңнан асса Қазақстан суицид көрсеткіші жағынан әлемде үшінші орында тұрмас еді… Себебі Дүниежүзілік денсаулық сақтау ұйымының суицидке қатысты бұл дерегінің елімізде жиі тіркелуінің бір себебі материалдық жағдайдың қиындауымен байланысты екен.
Иә, Қазақстанның ең қымбат қазынасы – қарапайым халықтың тұрмысы тым қиындап кеткені өзекті мәселеге айналды. Баспана кезегін күтуден қажыған, қарызға батқан қаншама көпбалалы отбасының мұңы отандық БАҚ-да жиі айтылып, көрсетіліп жатыр. Көбі барар жер басар тауы қалмағанын айтып, қажыған. Айтпай, іштен тынып жүргендері қаншама. Кеше Алматыда тоғызыншы қабаттағы пәтердің терезесінен алдымен 6,5 және 2 жастағы балаларын тастап, сосын өзі құлап өлген бүтін бір отбасындағы трагедия, орны толмас қаза сол сөзімізге дәлел.
Сарапшылар өзін өлімге қиятындардың көпшілігі кедейлік қамытын кигендер екенін алға тартады. Десе де елімізде кедейлік қамытын кигендер еріксіз қаза тауып жататыны да жасырын емес. 2020 жылы Нұр-Сұлтанда уақытша баспанада шырт ұйқыда жатқан бір үйдің бес баласы тұтанған өрттен отқа оранып өлім құшқан еді. Дәл сол уақытта олардың ата-анасы жұмыста болған еді.
Айта берсең трагедия көп. Бірақ тығырықтан шығар жол қайсы?

 

С.НҰРАЙ.

Биыл Түркістан облысында «Ауыл – Ел бесігі» жобасы аясында 302 жобаны іске асыру көзделген. Бұл үшін бюджеттен жалпы 16,1 млрд теңге бөлінген. Атқарылған жұмыстардың есебінен өңірде қосымша 8 мектеп салынып, 10 мектеп күрделі жөндеуден өтеді. Бір дәрігерлік амбулатория бой көтеріп, 4 денсаулық сақтау нысаны күрделі жөндеу жұмысымен қамтылады.

Бұл туралы Түркістан облысының әкімі Өмірзақ Шөкеевтің төрағалығымен өткен аппарат отырысында айтылды.
Жоба аясында аймақта 2 спорт нысаны, 2 мәдениет нысаны, 15 табиғи газбен қамтамасыз ету және 13 электр қуатымен жабдықтау нысаны да жоспарға сай салынып жатыр. 300-ге жуық ішкі көшелерге орташа жөндеу жүргізілуде. Жобаның іске асыру барысы тұрақты бақылауда. Бүгінде жоба аясында 2 мыңнан астам жұмыс орны құрылған.
Жоғарыда «Ауыл – Ел бесігі» жобасы бойынша барлығы 302 жоба қолға алынғанын атап өттік. Оның ішінде жыл соңына дейін 291 нысанды пайдалануға тапсыру жоспарланса, 25 нысан келер жылға өтпелі. Бүгінгі таңда 209 нысанның жұмыстары аяқталып, пайдалануға қабылданды. Оның ішінде 4 мектеп, 3 денсаулық сақтау нысаны күрделі жөндеу, 201 көше орташа жөндеуден өтіп, 1 электрмен жабдықтау нысанының құрылысы аяқталды.
Қалған нысандар кестеге сәйкес жыл соңына дейін тапсырылады. Нәтижесінде жыл қорытындысымен 86 елді мекенге жаңғырту жұмыстары жүргізіледі. Жалпы 10 елді мекендегі мектеп және 4 елді мекендегі денсаулық сақтау ұйымдары күрделі жөндеуден өтіп, бір елді мекенде жаңадан 75 орындық дәрігерлік амбулатория, 1 елді мекенде спорт кешені және 2 елді мекенде мәдениет нысаны бой көтерді. Сондай-ақ, 10 елді мекен табиғи газбен қамтылып, 9 елді мекенге жаңа электр жүйелері тартылады. Одан өзге 49 елді мекенде ұзындығы 390 шақырымды құрайтын 255 көше орташа жөндеуден өтеді.
Өңір басшысы жауапты өкілдерге аталған нысандарды сапалы әрі уақтылы тапсыруды, ауылдың еңсесін тіктейтін жобаларға жауапкершілікпен қарауды жүктеді.

Былтыр қызыл су салдарынан Мақтааралдағы бүтіндей бес ауылдағы үйлер бұзылған болатын. Техногенді сипаттағы апаттан зардап шеккен тұрғындар үшін Болат Өтемұратов қоры 6 миллион АҚШ долларын бөліп, апат салдарынан баспанасы қираған 150 отбасыға үй салып берген болатын. Жуырда аталған қор сол үйлерден артылған 10 баспананы мұқтаж азаматтарға тарту етті.

Кәсіпкер-меценат, мемлекет және қоғам қайраткері Болат Өтемұратовтың қоры арқылы көптен күткен шаңыраққа қол жеткізен қуаныш иелеріне баспана кілтін аудан әкімі Бақыт Асанов табыстады. Үйлі болған отбасылардың барлығы әлеуметтік жағынан осал топтағы азаматтар. Бірі жетім болса, енді бірі ата-анасының қамқорлығынсыз қалған. Тағы бір жанұя көпбалалы отбасы ретінде үй кезегінде тіркелгендер.
Қор есебінен берілген 10 үйдің бәрі де Мырзакент кентінің жаңа мөлтек ауданында орналасқан. Бұған дейін дәл осы Мырзакенттің жаңа мөлтек ауданынан құрылысы аяқталған 16 тұрғын үй кезекте тұрған азаматтарға коммуналдық арендалық негізде берілген еді.
Бұдан бөлек, 2020-2025 жылдарға арналған «Нұрлы жер» бағдарламасы аясында биыл республикалық бюджеттен бөлінген 417,9 миллион теңгеге аудан аумағындағы көпбалалы аз қамтылған және тұрғын үй кезегінде тұрған отбасыларға 50 үй берілді. Осылайша биылдың өзінде 76 мақтааралдық отбасы мемлекеттік бағдарламалар арқылы және жеке қорлардың есебінен баспаналы болып отыр.
Айта кетейік, Болат Өтемұратов қоры 2014 жылы құрылған.

Биыл Түркістан облысында ауыл шаруашылығы саласында 3,3 млн тонна өнім жиналды. Сала мамандары мұндай рекордтық көрсеткішке қол жеткізу егістіктік әртараптандырудың нәтижесі деп санайды.

Бұл туралы ала жаз бойы атыз жағалаған облыс диқандарының еңбегі қорытындыланған «Altyn kúz-2021» мерекелік іс-шарасында айтылды.
Түркістандағы «Конгресс Холл» ғимаратында өткен шарада облыс әкімі Өмірзақ Шөкеев барша диқандар мен малшыларды, агросала өкілдерін ҚР Ауыл шаруашылығы қызметкерлері күнімен құттықтады. Аймақ басшысы:
– Тәуелсіздіктің арқасында мемлекетімізде сан саланы дамытуға мүмкіндік туды. Күні кеше Nur Otan партиясы саяси кеңесінің кеңейтілген отырысында Елбасы Нұрсұлтан Назарбаев «Елдіктің жеті тұғыры» атты қағидаттар жиынтығын ұсынды. Оның біріншісі – Тәуелсіздік. Тәуелсіздік – біздің басты байлығымыз және ең ұлы құндылығымыз. Биыл Тәуелсіздіктің 30 жылдығын қарсы алып отырмыз. Бірнеше жыл бұрын елімізге келген АҚШ өкілдері Қазақстанда мал шаруашылығын дамытуға мүмкіндік өте зор екенін айтқан болатын. Шын мәнінде біз осы мүмкіндікті толық пайдалануымыз керек. Өңірде мал шаруашылығы жақсы дамып келеді. Мал тұқымын асылдандыру ісі жанданды. Ет экспорты бойынша Түркістан облысы бірінші орынға шықты. Сонымен бірге суармалы жерді игеріп, көкөніс, бақша өнімдерін өсіруде де Түркістан облысының әлеуеті өте жоғары,-деді құттықтау сөзінде.
Сонымен қатар ол, іріленген әрі біріккен шаруа қожалықтары жаңбырлатып суғару технологиясын пайдаланудың арқасында мол жетістікке жетіп отырғанын, ал бірікпеген, орташа шаруа қожалықтары үшін бір жерден жылына 2-3 өнім алу жобасын тиімді пайдалану арқылы ілгері жылжып отырғанын атап өтті. Облыс әкімі үй іргесіндегі жерден ырыздық терген ағайынның тамшылатып суғару әдісін пайдалануын тоқтатпауға кеңес берді.
Бұдан өзге Өмірзақ Естайұлы жер анадан несібе айыруға климаты өте қолайлы күнгей аймағында ауыл шаруашылығы саласындағы өнімділікті тағы 2-3 есе өсіруге мүмкіндік бар екенін ескертті.
Биыл Қазақстан мен Өзбекстан Президенттері арасындағы келісімге сәйкес «Достық» каналына мол деңгейде су келген. Мұның өзі жылды табысты қорытындылауға көп әсерін тигізген.
Таңалакеуімнен бастап, күн ұясына батқанға дейін алқапта бел жазбай еңбек еткен диқандар мен шаруалардың мәртебесі асқақталған жиында өңір басшысы бір топ азаматты ҚР Ауыл шаруашылығы министрлігінің «Еңбек ардагері» медалімен және «Ауыл шаруашылығы үздігі» төс белгісімен марапаттады. Түрлі салада үздік атанған аудан, қала әкімдеріне де құрмет көрсетілді. Сонымен бірге салтанатты жиында Nur Otan партиясы Түркістан облыстық филиалы төрағасының бірінші орынбасары Бейсенбай Тәжібаев озат агроқұрылым өкілдерін марапаттаса, бір топ БАҚ өкіліне облыс әкімінің Алғыс хаттары тапсырылды.

Осы аптада Түркістан облыстық мәдениет басқармасының басшысы Әзімхан Қойлыбаев облыс әкімі Өмірзақ Шөкеевтің төрағалығымен өткен аппарат отырысында атқарылған жұмыстарды баяндады.

Басқарма басшысының сөзінше биыл Түркістан қаласында пайдалануға берілген «Ұлы Дала Елі» орталығы, Түркістан музыкалық драма театры және «Farab» кітапханасы өңір руханиятына тың серпін берген. Сонымен қатар Түркістан қаласында «Түрленген, гүлденген – Түркістан» республикалық ақындар айтысы, джаз музыкасының танымал орындаушылары қатысқан «Turkistan Jazz Party I» фестивалі, «Тайқазан» ұлттық киім дизайнерлердің республикалық байқауы, «Түркістан дауысы» республикалық ән байқауының ұйымдастырылуы да саланың тынысын ашқан.
Ауыл жастарының шығармашылығын насихаттау мақсатында арнайы жоспар түзіліп, әр аудан, қалаларда облыстық байқаулар мен фестивалдер өткізілген. Олардың қатарында суретшілердің шығармашылығына қанат бітірген «Түркістаным – Тұраным» халықаралық түркі суретшілерінің симпозиумы да бар. Бүгінге дейін облыстық кәсіби 3 театрда 6 жаңа қойылым сахналанған.
Өз сөзінде Ә.Қойлыбаев «Жыл басынан бері облыстағы 24 музейде 6020 экскурсия, 520 көрме, 528 көпшілік іс-шара ұйымдастырылды. Бүгінде 5 мыңдай жаңа экспонат жинақталып, жалпы қор 178927 данаға жетті. Облыстағы 395 кітапхана 361354 дана жаңа кітаппен толықтырылды»,- деді.
Облыс әкімі басқарма басшысына өңірде оның ішінде Түркістан қаласында өтетін әрбір мәдени іс-шаралардың сапасы мен мазмұны халықаралық талап деңгейіне сай болуы керектігін қадап айтты

Осы жылдың 15-қыркүйегінен бастап елімізде емханаға тіркелу науқаны басталған болатын. Бүгінде өңірлерде екі айға жалғасқан науқанның нәтижелері жариялануда.

Түркістан облысында ағымдағы жылдың 17-қарашасындағы жағдай бойынша алғашқы медициналық-санитарлық көмек ұйымдарына бекітілген тұрғындар саны 1 999 929 адамға жеткен. Емханаға тіркелгендердің басым көпшілігі дәлірегі, 1 641 199 адам ауыл тұрғындары. Науқанға облыс бойынша 46 медициналық ұйым қатысты.
Бұл туралы Өңірлік коммуникациялар қызметінде өткен брифингте «Әлеуметтік медициналық сақтандыру қоры» КЕАҚ Түркістан облысы бойынша филиалының бөлім басшысы Лаура Сапарбекова хабарлады.
Филиал өкілі белгілі бір аумақта тұрақты тұратын және тиісті құжаттарды алған шетелдік азаматтар емханаға тіркеле алатынын айтты. Сондай-ақ ол, Қазақстан Республикасы «Көші-қон туралы» Заңы бойынша Қазақстан аумағында жұмыс істейтін Ресей, Белорусь, Қырғызстан және Армения мемлекеті азаматтарын алғашқы медициналық-санитарлық көмек ұйымына бекіту және алғашқы медициналық-санитариялық көмек алу үшін тиісті медициналық сақтандыру шарты болуы тиістігін ескертті.
Бұдан бөлек ол, шетелдіктер аса қауіпті инфекциялар бойынша емделген жағдайда кепілдендірілген тегін медициналық көмек шеңберінде қажетті медициналық көмекті алатынын айтты.
Егер медициналық ұйымдарға қатысты қосымша сұрақтар болса, жақын аймақтағы емхананың анықтама қызметіне немесе қордың fms.kz ресми сайтына, 1406 байланыс орталығына, Telegram-дағы SaqtandyryBot, Qoldau 24/7 мобильді қосымшасына өтініш қалдыруға болады.

 

 С.ИБРАГИМОВА

Сарыағаш ауданында ағымдағы жылдың тоғыз айының қорытындысы бойынша 82,8 млрд теңгенің ауыл шаруашылығы өнімі өндірілген. Бұл туралы Түркістан облысының Өңірлік коммуникациялар қызметі мәлімдейді.

Биыл ауданда егіс көлемі 69,7 мың гектарға жетсе, жылыжай көлемі 705,6 гектарды құраған. Ал жылына бір алқаптан 2-3 өнім алу жобасы аясында ауданда 499 шаруа қожалық 1 010,7 гектар егістік жерге егін еккен. Нәтижесінде бірінші егістен — 21 187,3 тонна өнім, екінші егістен — 25 171 тонна өнім алынған. Қазіргі таңда үшінші өнімді жинап алу жұмыстары қарқынды жүруде.
Аудандағы ағын су жүйесін қалпына келтіру мақсатында 2021 жылдың 9 айында 119,1 шақырымды құрайтын 13 нысанға ағымды жөндеу жұмыстары жүргізілген. Нәтижесінде 344 гектар суармалы жер қайта айналымға қосылып, 3 665 га жерге су өткізу мүмкіндігі жақсарған.
Жалпы ауданда өндірілген аумақтық өнім көлемі 2021 жылдың 9 айында 148,5 млрд теңгені құрап, өткен жылмен салыстырғанда 116,8%-ға артқан. Жыл соңына дейін бұл көрсеткішті 200,8 млрд теңгеге жеткізу жоспарлануда.

Алдағы желтоқсан айында Ордабасы ауданында екі ауқымды жоба іске асады. «Индустрияландыру картасы» аясында іске қосылатын жобаның бірі – озық технологиямен жабдықталған «Bokei» қыш зауыты. Тәулігіне 120 мың қыш өндіретін өндіріс орнының тамырына қан жүгірту үшін 2 млрд 600 млн теңге жұмсалған. Кәсіпорын жергілікті 60 азаматты тұрақты жұмыспен қамтитын болады.

Жылжабар айда іске қосылатын келесі жоба «Александровский сад» көкөніс сақтау қоймасы. Нысанның жалпы құны 800 млн теңге. Онда 15 адам жұмыспен қамтылады. Аудан шаруаларының өнімдерін сақтауда аталған қойма таптырмас орынға айналады. Жалпы ауданға ағымдағы жылдың 9 айында 15 млрд 296 млн теңге инвестиция тартылған. Бұл 2020 жылдың тиісті кезеңімен салыстырғанда 2 млрд 731 млн теңгеге көп. Бүгінде аудан көлемінде 10 954 шағын және орта кәсіпкерлік нысаны жұмыс істейді. Оларда 16 669 адам жұмыспен қамтылған. Өндіріс саласында жалпы 39 кәсіпорын жұмыс жүргізуде. Есепті кезеңде осы кәсіпорындармен 1 млрд 599 млн теңгенің өнімі өндірілген. Бұл өткен жылдың ұқсас кезеңімен салыстырғанда 353 млн теңгеге артық.
Аудан экономикасының жетекші бағыттарының бірі ауыл шаруашылығы саласы. Ауыл шаруашылығы жалпы өнімінің көлемі 9 айда 50 млрд 372 млн теңгені құрап, өткен жылдың осы кезеңімен салыстырғанда 14 млрд 381 млн теңгеге ұлғайған.

Қоғамда нәзік иығымен нар тұлғаға бергісіз іс тындырып жүрген әйелдер жетерлік. Олардың біразы қолға кәсібін алға жылжытуда іскерлік қырымен танылып жататыны да белгілі.

Дегенмен де кәсібінің болғанын қалайтын, бірақ оған білімі мен қабілеті жете бермейтін нәзік жандылар қаншама. Оларға оң бағыт беріп, қолға алған ісінің көзін таба білуіне жәрдемдесу үшін Түркістанда «Әйелдер кәсіпкерлігін дамыту» орталығы ашылды. Аталған орталық кәсіпке ебі бар көп әйелге практикалық тұрғыдан көмек көрсететін ортақ алаңға айналады. Мұнда табыс табуды үйренуге талпынған кез келген әйел кеңес алып қана қоймай, қолдау мен көмекке де қол жеткізеді.
Орталықтың іске қосылуы Ынтымақтастық қорының, Ұлттық экономика министрлігінің, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның және «Атамекен» Ұлттық кәсіпкерлер палатасының әріптестігі аясында жүзеге асты.
Әу баста осы әріптестік арқылы мұндай орталықты еліміздің барлық орталығы мен республикалық маңызы бар қалаларда ашу жоспарланған. Түркістан қаласынан ашылған нысан алдағы уақытта ашылатын 17 орталықтың алғашқысы болып табылады. Бастама Азия Даму Банкінің қаражаты есебінен қаржыландырылады және оны Қазақстандағы БҰҰ Даму бағдарламасы жүзеге асырады. Нысанның салтанатты ашылуына ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның төрайымы Ләззат Рамазанова, Ұлттық экономика вице-министрі Әлішер Әбдіқадыров, Түркістан облысы әкімінің орынбасары Арман Жетпісбай, «Атамекен» Ұлттық кәсіпкерлер палатасы басқарма төрағасының орынбасары Олжас Ордабаев және халықаралық ұйымдардың, дипломатиялық корпустың өкілдері қатысты.
Айтулы іс шара Қазақстан Республикасы Тәуелсіздігінің 30-жылдығы және Әйелдер кәсіпкерлігінің халықаралық күніне орай ұйымдастырылды.
Айта кетейік, Ұлттық статистика деректері бойынша Қазақстанда әйелдер басқаратын кәсіпорындардың үлесі 42,3%-ды құрайды. Олардың көпшілігі осы саладағы жұмыс орындарының 31,4%-ын қамтамасыз ететін шағын және орта бизнес. Қолдау орталықтары арқылы кәсібін дөңгелетіп отырған іскер ханымдар мен жеке кәсіпті қолға алған қыз-келіншектерге қаржылай емес барлық қызмет түрлерінен қолдау көрсетіліп, жеке бизнес жобаларды іске асыруда практикалық көмек түрлері ұсынылатын болады. Онымен қоса оқыту тренингтері мен шебер-класстар ұйымдастыру, жеңілдетілген несие беру бағдарламаларына, кооперативтік қозғалыстарға тарту, дайын өнімдерді нарыққа өткізу аясын кеңейту жағынан көмек көрсету көзделген.
Айта кетейік, биыл мұндай орталық Алматы және Маңғыстау облыстарында, ал 2022 жылы еліміздің барлық өңірінде ашылады.

Облыс орталығы болған үш жылдан бері Түркістанда ауқымды жұмыстар қолға алынды. Осынау уақытта қаланы түркі әлемінің рухани-мәдени орталығы ретінде дамытудың бірінші кезеңі аяқталды. Нәтижесінде қаланың әлеуметтік-инфрақұрылымы қаланды.
Қаланы дамытудың бірінші кезеңін қамтитын алғашқы үш жыл ішінде жалпы
445 млрд. теңгеге жаңа 251 жоба іске асып, 123 нысанның құрылысы аяқталды. Қалада халықаралық әуежай, әкімшілік-іскерлік және рухани-мәдени орталықтары салынды. Оларды өзара байланыстыратын Б.Саттарханов даңғылы қайта жөндеуден өтті. Арнайы экономикалық және индустриалды аймақтар құрылды.
Қала аумағына «Жасыл белдеу» орнату мақсатында 13 мың га жерге 3,5 млн. түп ағаш егілді.
Былтырға дейін жылыту маусымы басталған уақыттан бастап Түркістан аспаны түтінге көмкерілетіні күн тәртібіндегі мәселе ретінде талай рет айтылған болатын. Қаланы дамытудың бірінші кезеңі аясында газдандыру жұмысы қолға алынып, қарқынды жүргізілді.
Енді қала дамуының екінші кезеңі бойынша атқарылатын жұмыстар 4 аумақта жүзеге асырылатын болады. Бірінші аумақта әуежай аумағына 100 орындық қонақ үй, 3 самолетке арналған ангар, 400 га қара өрік бағы, 50 га жерге жылыжай, 10 мың бас ірі қара бордақылау кешені, 1 200 бас тауарлы-сүт өндіру фермасы салынады.
Екінші аумақта әкімшілік-іскерлік орталығында теннис орталығы, мұз сарайы, ат-спорт кешені, демалыс орындары және инженерлік инфрақұрылымы жүзеге аспақ. Сондай-ақ, 4,8 млн. шаршы метр тұрғын үй салынып, 46 мың пәтер пайдалануға беріледі. Денсаулық сақтау саласында 570 орындық көпбейінді аурухана, жедел медициналық жәрдем станциясы және Ана мен бала орталығы салынады.
Үшінші аумақ бойынша Б.Саттарханов даңғылы бойында спорттық кешен, Яссы желілік саябағы, ірі сауда орталықтары, 182 га универститеттік ботаникалық бақ, Парк Лайн коттедж пайдалануға беріледі.
Төртінші аумақ бойынша мәдени-рухани орталықта Күлтөбе қалашығының тарихи нысандарын қалпына келтіру, «Әзірет Сұлтан» музей-қорығының аумағын абаттандыру жоспарлануда.
Бұдан бөлек, Керуен Сарай тұрғын үй кешені, Аманат коттеджі қалашығы, Medina Palace қонақ үйі, Хилует мәдени-рухани орталығы бой көтереді.
Жалпы, Түркістан қаласын дамытудың екінші кезеңінде инвестициялардың көлемі 1,3 трлн теңге, оның 1 трлн теңгесі немесе 77%-ы жеке инвестициялар болып табылады.
Жаңа кешенді жоспарды іске асыру нәтижесінде 2025 жылы жалпы өңірлік өнім көлемі 3,6 трлн теңгеге жетеді.