МАУСЫМДА 125 СЫБАЙЛАС ЖЕМҚОРЛЫҚ ДЕРЕГІ ӘШКЕРЕЛЕНГЕН

Мемлекеттің ішкі тұрақтылығы мен экономикалық қауіпсіздігіне қатер төндіретін, қоғамның жегі құртына айналған сыбайлас жемқорлықпен күрес — бүгінгі күннің ең басты мәселесі. Ұлттық қауіпсіздік комитетінің сыбайлас жемқорлыққа қарсы іс-қимыл қызметінің маусым айындағы атқарған жұмыс қорытындысы елдегі заңсыздықтың тамырын басуға бағытталған қадамдардың қаншалықты ауқымды екенін тағы бір мәрте айғақтап берді.

Ресми мәліметтерге сүйенсек, бір ғана маусым айының ішінде елімізде 125 сыбайлас жемқорлық құқықбұзушылық дерегі ресми түрде тіркелген. Бұл көрсеткіш заң бұзушылықтың әлі де болса тамыр жайып отырғанын көрсеткенімен, екінші жағынан заңның үстемдігін орнату жолындағы құзырлы органдардың сергектігін байқатса керек. Қоғамды індеттей жайлаған бұл кеселдің ішінде, өкінішке қарай, ең көп таралғаны және тамырын тереңге жайғаны парақорлық болып отыр. Анықталған қылмыстардың ішінде тура 97 жағдай дәл осы пара алу мен пара беру фактілеріне қатысты өрбіген. Бұдан бөлек, шенділер мен лауазым иелерінің арасында 9 алаяқтық әрекет, 8 қызметтік өкілеттікті теріс пайдалану, 7 мемлекет мүлкін жымқыру және 1 лауазымды асыра пайдалану деректері әшкереленді. Осы заңсыздықтардың бел ортасында жүрген 67 азамат бүгінде қылмыстық істер бойынша күдікті деп танылып, тергеу құрығына ілінді. Ұлттық қауіпсіздік комитеті мамандарының тынымсыз ізденісі мен заң шеңберіндегі қатал тексерістерінің нәтижесінде 149 қылмыстық істі тергеу амалдары толықтай аяқталып, оның ішіндегі 129 іс түпкілікті үкім кесу үшін сот құзырына жолданды. Осылайша, жең ұшынан жалғасқан істердің шиеленісі тарқатылып, кінәлілердің ісі заң таразысына түспек.
Осы кезеңде аяқталған қылмыстық істердің аясында мемлекетке және халық қазынасына келген залалдың көлемі де үлкен екенін айта кеткен жөн. Жалпы шығын сомасы 4,7 миллиард теңгені құраған. Десе де мемлекеттің бақылау тетіктерінің дер кезінде қимылдауының арқасында осы қыруар қаржының 2,1 миллиард теңгесі қазынаға, яғни бюджетке қайтарылды. Мұнымен қоса алдағы уақытта шығынды толық өтеу мақсатында заң бұзушыларға тиесілі құны 971,4 миллион теңге болатын дүние-мүлікке ресми түрде тыйым салынды. Ведомство өкілдері халық қазынасын тонауға бағытталған кез келген әрекеттің жолы кесілетінін және осы бағыттағы қатал да кешенді жұмыстардың еш толастамай, одан әрі жалғаса беретінін қадап айтты. Қош, нәтиженің жақсы боларына сенім артамыз.