АЛҒАШҚЫ ЖАЙЛЫ МЕКТЕП ЖҰМЫСЫН БАСТАДЫ

«Жайлы мектеп» ұлттық жобасы — Қазақстан Республикасында білім беру инфрақұрылымын жетілдіруге бағытталған маңызды бастама. Бұл жоба апатты және үшауысымды мектептер мәселесін шешіп, оқушыларға заманауи және қауіпсіз білім беру ортасын құруды көздейді. Осы орайда, жуырда Шымкент қаласында алғашқы екі жайлы мектептің техникалық ашылуы өтті.

Нұршуақ шағынауданындағы 2000 орындық жаңа білім беру мекемесіне 1130 оқушы қабылданды. Ал Қарабастау тұрғын алабындағы 1200 орындық мектепте 950 бала білім алып жатыр. Айта кетейік, жайлы мектептердегі сабақ оқу жылының екінші тоқсанынан басталды. Заманауи мектептерде бастауыш және жоғарғы сынып оқушыларына арналған бөлек блоктар қарастырылып, олардың дамуы мен оқуына қолайлы жағдай жасалған. Бұдан бөлек, ерекше қажеттілігі бар балалар үшін кедергісіз орта ұйымдастырылып, заманауи пәндік кабинеттер, STEM-зертханалары және робототехника сыныптарымен жабдықталған.
Сонымен қатар, қауіпсіздік шараларына ерекше көңіл бөлініп, цифрлық бейнекамералар мен турникеттер орнатылған. Білім беру мекемесінде хореография залы, төрт спорт залы, демалыс аймақтары, воркаут және нетворкинг аймақтары да бар. Мұнда балалар өзара еркін араласып, қызығушылықтарын дамыта алады. Жалпы, Шымкентте ұлттық жоба аясында 18 қолайлы мектеп ашу жоспарланған. Еске салайық, Мемлекет басшысының бастамасымен елімізде апатты және үшауысымды мектеп пен орын тапшылығы мәселесін шешуге бағытталған «Жайлы мектеп» ұлттық жобасы жүзеге асырылып жатыр.