«КӘСІПОДАҚ — ЕҢБЕК АДАМЫНЫҢ СЕНІМДІ ТІРЕГІ» АТТЫ ІС ШАРА ӨТТІ
Кәсіподақ – еңбек адамының тірегі. Бүгінде аталған ұйымдар түрлі мекемелердегі қызметкерлердің құқығын қорғау мен олардың қажырлы еңбек етуі үшін ауқымды шараларды атқарып келеді. Осы орайда, 10 қазан Қазақстан кәсіподақтары күні мерекесіне орай Ордабасы аудандық мәдениет үйінде «Кәсіподақ-еңбек адамының сенімді тірегі» тақырыбында мерекелік іс-шара өтті. Іс-шараға аудан әкімінің орынбасары Мейрамбек Ақмұратов, аудандық мәслихаттың төрағасы Бақдәулет Жұмабеков, Түркістан облыстық кәсіподақ комитетінің төрағасы Бақыт Еркінбек қатысып, жиынға келгендерді мерекемен құттықтады.
Жиын барысында «Құрметті кәсіподақ қызметкерлері! Баршаңызды 10 қазан – «Қазақстан кәсіптік одақтарының күні» кәсіби мерекелеріңізбен құттықтаймын! Сіздер еңбек ұжымдарының қызметкерлері мен жұмысшыларын әлеуметтік қорғауға, қолайлы еңбек шартымен әділеттілікті қамтамасыз етуге, қоғамда тұрақтылықты сақтауға зор үлес қосып келесіздер. Сіздердің кәсіби біліктіліктеріңізбен отандастарымыз лайықты жұмыс жағдайларын пайдаланып, өз құқықтары мен заңды мүдделерін қорғауда. Кәсіподақ қозғалысының дамуына қосқан сүбелі үлестеріңіз үшін алғысымды білдіремін. Сіздерге зор денсаулық, отбасыларыңызға амандық пен бақ-береке тілеймін» деген аудан әкімінің орынбасары Мейрамбек Ақмұратов бірқатар ұзтазды аудан әкімінің «Алғыс хатымен» марапаттады. Мерекелік іс-шара кезінде аудандық Мәдениет үйінің өнерпаздары кәсіподақ белсенділеріне өз өнерлерін көрсетті.
Айта кетейік, зайырлы қоғамда әлеуметтік тепе-теңдік пен әділдік жолында еңбек адамының мүддесін қорғайтын кәсіподақтар қызметінің маңызы зор. Олардың елімізге жасаған еңбегін бағалау мақсатында қазан айының 10 жұлдызында «Қазақстанның Кәсіподақтар күні» аталып өтіледі.
