ЕРДОҒАН ТҮРІКМЕНСТАННЫҢ ҚҰРМЕТТІ АҚСАҚАЛЫ АТАНДЫ

26 ақпанда Түркия президенті Режеп Тайып Ердоған 70 жасқа толды. Осыған байланысты, Түрікменстан президенті Сердар Бердімұхамедов Ердоғанға «Түрікменстанның құрметті ақсақалы» атағын берді. Бұл туралы «Нейтральный Туркменистан» газеті хабарлады.

«Түрікмен халқына көп ғасырлық тату көршілік дәстүрін ұстана отырып және аға ұрпақ өкілдерін құрметтей отырып, Түрікменстан-Түркия қарым-қатынастарын дамытуға қосқан зор жеке үлесіңізді, халықтарымыздың бірлігі жолындағы қызметтеріңізді жоғары бағалай отырып, 70 жылдық мерейтойыңызға орай сізге Түрікменстанның «Hormatly il ýaşulusy» («Түркіменстанның құрметті ақсақалы») құрметті атағын беру туралы шешім қабылданды» делінген Бердімұхамедовтың Ердоғанға жолдаған құттықтау хатында. Бердімұхамедовтың айтуынша, елдің сыртқы саясатының маңызды бағыттарының бірі — Түркиямен түрлі салалардағы стратегиялық және ұзақмерзімді қарым-қатынастарды дәйекті түрде дамытып, нығайту. Түрікменстан Президенті сондай-ақ екі елдің халықаралық ұйымдар, соның ішінде Біріккен Ұлттар Ұйымы мен Түркі мемлекеттері ұйымы аясындағы табысты ынтымақтастығын атап өтті.
Оның айтуынша, Түркия Түрікменстанның ірі сыртқы сауда серіктестерінің бірі және елдегі экономикалық жобаларды жүзеге асыруға қатысатын көптеген түрік компаниялары мемлекеттің экономикасын әртараптандыруға және әлеуметтік жобаларды жүзеге асыруға үлес қосуда. Бердімұхамедов Ердоғанды барша түрікмен халқының атынан шын жүректен құттықтап, зор денсаулық, бақыт және отбасылық келісім, ал Түркия Республикасының халқына бейбітшілік, одан әрі даму мен гүлдену тіледі.
Айта кетейік, Режеп Тайып Ердоған 1954 жылы 26 ақпанда Ыстанбұлдың Бейоғлу ауданына қарасты Касимпаша ауданында жағалау күзетшісінің отбасында дүниеге келген. Ол — 2014 жылдың 28 тамызынан бері Түркияның президенті. Бұған дейін Ердоған 2003-2014 жылдары Түркия премьер-министрі, 1994-1998 жылдары Ыстанбұл мэрі қызметін атқарған. Ол — биліктегі «Әділет және даму» партиясының негізін қалаушы.