БИЛЕТСІЗ БАЛАЛАРДЫ АВТОБУСТАН МӘЖБҮРЛЕП ТҮСІРГЕНДЕР ЖАУАПҚА ТАРТЫЛАДЫ
Соңғы уақытта әлеуметтік желіде билеті жоқ балаларды қоғамдық көліктен түсіріп жатқан жағдайлар көбейді. Әрине, қоғамдық көлікте билет алып жүру қажет. Дегенмен қыстың қара суығында жас балаларды автобустан түсіріп кетудің соңы түрлі келеңсіз оқиғаларға ұрындыруы бек мүмкін. Енді мұндай қадамға барғандар заң алдында жауап береді. Тарқатайық…
Жаңа заң жобасы аясында автобус ақысын төлемеген 16 жасқа дейін балаларды қоғамдық көліктен мәжбүрлеп түсіргені үшін жауапкершілік қарастырылуда. Бұл туралы Ішкі істер министрлігінің ресми өкілі Шыңғыс Алекешев мәлім етті. Ішкі істер министрлігінің апталық баспасөз мәслихатында «Жаңа заң жобасында 16 жасқа дейінгі балаларды қоғамдық көліктен мәжбүрлеп шығарып жібергені үшін жауапкершілік қарастырылуда. Бұл өз кезегінде билетсіз жолаушылардың көбеюіне алып келмей ме?» деген сауал да қойылды.
Аталған сауалға «Бұл норма алдымен балалардың қауіпсіздігі үшін қарастырылып отыр. Менің ойымша, аталған шара билетсіз жүретін жолаушылардың санын көбейтуге жол бермейді.
Қоғамдық көлік жүргізушісі немесе кондуктор полицейлер мен қамқоршылық қорғау органдары өкілдерін шақырады, содан кейін баланың автобуста билетсіз жүру себебі анықталады. Себепті анықтау барысында ата-анасының кінәсі белгілі болса, яғни баласының қоғамдық көлік ақысын төлеуін қамтамасыз етпесе, онда ата-анаға жауапкершілік қаралуы мүмкін» деп жауап берді Шыңғыс Алекешев.
