ЕҢБЕК ҚАУІПСІЗДІГІ ЕСКЕРУСІЗ ҚАЛМАУЫ КЕРЕК

Шымкентте шағын және орта кәсіпкерлік қанат жайып келеді. Сәйкесінше, азаматтардың дені дәл осы салада жұмыс істейді. Десе де барша жұмысшылар бірдей өз құқығын біледі деп айта алмасымыз анық. Осы орайда, салаға жауапты басқарма мен аумақтық кәсіподақтар бірлестігі бірлесе отырып, әрбір мекеменің қызметкерлерімен жиын өткізіп келеді.

Өткен аптада «Шымкент қаласы кәсіподақтар орталығы» аумақтық кәсіподақтар бірлестігі төрағасы Бауыржан Әлтеев пен Шымкент қаласы мемлекеттік еңбек инспекциясы басқармасының басшысы Бауыржан Қалжанов Шымкент қаласындағы ірі көпсалалы құрылыс компаниялары «Әділет құрылыс LTD» және «А.Р.Т.-Құрылыс» жауапкершілігі шектеулі серіктестіктерінің қызметкерлерімен кездесті. Мақсат – еңбек қауіпсіздігін сақтау, еңбек жағдайлары және еңбекті қорғау тақырыптары бойынша пікір алмасу. Сонымен қатар семинарда қолданыстағы еңбек заңнамалары, оның ішінде еңбек қауіпсіздігі және еңбекті қорғау талаптары, жұмыскерлер мен жұмыс берушілердің арасында еңбекақы, әлеуметтік төлемдерді кешіктірудің, әлеуметтік шиеленістердің, еңбек жанжалдарының алдын алу, еңбек шарттарын электронды форматқа көшіруді қамтамасыз ету мәселелері талқыланып, түсіндірме жүргізілді. Еңбек ұжымы кәсіби пайдалы дәрісті тыңдап, еңбек жағдайында орын алатын мағлұматтар мен ақпараттарға қанық болды.
Жиын соңында Бауыржан Ілімшеұлы компания қызметкерлерін кәсіподаққа мүшелікке кіруге шақырып, бастауыш кәсіподақ ұйымын ашу жолдары мен кәсіподақ ұйымы бар мекемелердің артықшылықтары жайлы айтып өтті.