МЕКТЕПТЕРДЕГІ ҚАУІПСІЗДІК КҮШЕЙТІЛЕДІ

Білім саласының дамуы елдің болашақ даму бағытын айқындайды. Сондықтан аталған салаға айрықша назар аударылып келеді. Мәселен, алдағы уақытта Түркістан облысына қарасты мектептерде қауіпсіздік күшейтіледі. Мектепке дейінгі және орта білім беру ұйымдарын бейнебақылау жүйелерімен 100% қамтамасыз ету туралы мемлекет басшысының тапсырмасына сәйкес, облыстағы 1381 балабақша мен 983 мектеп бейнебақылау жүйелерімен 100% қамтамасыз етілді.

Жуырда өткен мәжіліс отырысында облыс әкімі Дархан Сатыбалды бұл бағытта атқарылып жатқан жұмыстармен танысып, жауапты басқармаларға нақты тапсырмалар берді. Түркістан облысының адами әлеуетті дамыту басқармасының басшысы Дінислам Болатханұлының баяндауынша, облыстағы 770 мемлекеттік мектептің бейнебақылау жүйелері Полиция департаментінің жедел басқару орталығына қосылады. Кей мектептер таулы аймақтар мен шалғай өңірлерде орналасқандықтан және интернет жылдамдығының төмендігінен байланыс арналарының техникалық мүмкіншілігі болмауда. Сондай-ақ ауысу мерзімі таяғаны тағы бар. Облыс басшысы білім ошақтарындағы мәселелерге көз жұма қараған әкімдерді қатаң сынға алды. «Тапсырманы орындау керек. Бұл – балалар үшін. Олар жайлы жағдайда өссе, болашақта да соған ұмтылады. Аудан, ауыл әкімдері, бұлар – сіздердің де балаларыңыз. Белсенді қатысып, ұсыныс беріп отырсаңыздар. Жиналыстан үнемі үнсіз кетесіздер. Не жұмыс жоқ, не ұсыныс жоқ. Мектептердегі мәселені «маған қатысы жоқ» деп құр отыра бермей, жанашырлық танытыңыздар. Интернет бойынша операторларға неге өздеріңіз шықпайсыздар? Халықпен кездесуде бұл мәселелер жиі көтеріледі. Сіздердің аумақта болып жатқаннан кейін, құрылыс болсын, жол болсын, мектептердегі проблема болсын, олар бойынша сіздер ұсыныс берулеріңіз керек» деді Дархан Сатыбалды.
Басқосуда мемлекеттік-жекешілік әріптестік шеңберінде білім ұяларындағы дабыл батырмаларын орнату барысы да баяндалды. Түркістан облысында жалпы 983 мектеп жұмыс істесе, онда 514 мыңнан астам оқушы білім алады. Ал облыстағы 52 колледжде 38 мыңға жуық студент білім алса, 1364 балабақшада 150 мыңнан астам бала тәрбиеленуде. Жалпы білім беру ұйымдарындағы қауіпсіздікті қамтамасыз ету мәселесі тұрақты бақылауда.