ДӘРІГЕРЛЕР ДЕРТТІҢ ДЕНДЕУІНЕ ЖОЛ БЕРМЕДІ

Шымкент қаласындағы №2 аурухана дəрігерлері коронарография əдісімен жүрек ауруы бар науқасқа алғаш рет диагностика жасады. Күрделі ота аурухананың бас дәрігерінің міндетін уақытша атқарушы рентген-хирург Асқар Рахматалиевтің жетекшілігімен өтті.

Аурухана базасында алғаш рет жасалған ота кезінде білікті мамандар жүрекке жіңішке катетер жіберіп, шаштың қылындай ғана қан тамырдағы ақауды дер кезінде анықтады. Аурухана дәрігерлері жүрек-қан тамырындағы ақауды толық анықтайтын коронаграфия əдісін сәтті іске асырды.
Коронарография мамандандырылған операциялық бөлмеде рентген сәулелерінің бақылауымен жасалады. Рентгенде қан және оның тамырлардағы қозғалысы көрінбейді. Ал рентгенконтрасты ерітінді қанмен араласып тек қана оны көрсетпей, бүкіл коронарлық тамырдың ішкі пішінін көрсетеді. Бұл дұрыс диагноз қоюға мүмкіндік береді. Аурухана дәрігерлері бұл әдісті жетік меңгеру арқылы кардиология саласындағы емдеу жұмыстарын одан әрі кеңейтуді, жүрек ауруына шалдыққан науқастарға жоғары мамандандырылған диагностикалық тексеру мен емдеу мүмкіндігін арттыруды, осылайша жүрек-қан тамырларынан пайда болатын өлім-жітім көрсеткішін азайтуды мақсат етеді. Ол үшін ауруханада білікті мамандармен қатар, қажетті заманауи техникалық жабдықтардың барлығы бар.
Өз кезегінде аурухананың бас дәрігері м.у.а. Асқар Рахматалиев:
– Аурухана базасында екі науқасқа коронарография жасадық. Науқастардың бірінің жүрегіне осыдан он жыл бұрын аорта коронарлық шунт отасы жасалып, стент қойылған. Сол стент қойғаннан кейінгі тамырдағы өзгерістерге нақты диагностика жасалды. Ал екінші науқастың жүрек ырғағының бұзылысы болғандықтан жүрек қан-тамырларындағы патологияны анықтай алдық. Нәтижесінде операциялық жолмен жасалған диагностикалық тексеруден кейін қос науқасқа да консервативті емдеу тағайындалды. Ауруханада кардиология саласын дамыту үшін басқа да республикалық деңгейдегі емдеу мекемесінен жоғары тәжірибелі мамандарын шақырттық. Білікті мамандар жасақталып, қазір осы саланы дамыту жағын мықтап қолға алдық, -дейді.
Шымкент қалалық №2 аурухана қаладағы көп бейінді, бәсекеге қабілетті ұйым. Аурухана базасында ашылған кардиология бөлімшесіндегі төсек-орын саны қазір 22-ге көбейтілген.