РУСЛАН БЕРДЕНОВ – ШЫМКЕНТ ҚАЛАСЫ ӘКІМІНІҢ ОРЫНБАСАРЫ
Бұл аптада Шымкентте бірқатар маңызды оқиғалар болды. Қалың оқырманның жадында болса, бұған дейін Шымкент қаласы әкімінің орынбасары лауазымының бос тұрғаны турасында дерек тараған болатын. Енді бұл орын өз иесін тауып отыр. Тарқатсақ, бұдан былай бұрынғы мәжілісмен Руслан Берденов ҚР Президенті Әкімшілігінің келісімімен және Шымкент қаласы әкімінің өкімімен қала әкімінің орынбасары болып тағайындалды.
Бұл есімді бизнес саласының өкілдері жақсы біледі. Мәжіліс қабырғасында жүргенде де бірқатар маңызды мәлімдемелер жасағанын ұмыта қойғанымыз жоқ. Қала берді, Шымкенттің топырағынан түлеп ұшқан төл перзенті десек, қателеспеген болар едік. Тарқатсақ, Руслан Арысбекұлы 1985 жылы 6 наурызда Шымкент қаласында дүниеге келген. Ұлты – қазақ. Жоғары білімі және магистрлік дәрежесі бар. Әл-Фараби атындағы Қазақ ұлттық университетін және КИМЭП университетін «Іскерлік басқару магистрі, қаржылық менеджмент маманы» мамандығы бойынша тәмамдаған.
Еңбек жолын 2007 жылы «Procter & Gamble LLP» компаниясында бастаған. 2010-2012 жылдары «EASTCOMTRANS» ЖШС-ның жылжымалы құрамды жалға беру департаментінің директоры, 2012-2018 жылдары «Ақ ниет» ЖШС-ның бас директоры, 2018-2019 жылдары «Ақ ниет» ЖШС-ның бақылау кеңесінің мүшесі, 2019-2023 жылдары «Aq Niet Group» бақылау кеңесі төрағасының орынбасары қызметтерін атқарды. 2023 жылдың наурыз айынан бастап жаңа қызметке тағайындалғанға дейін Қазақстан Республикасы Парламенті Мәжілісінің VIII шақырылым депутаты, Қаржы және бюджет комитетінің мүшесі болды. Қош делік, қызмет алып, Ақорданың сенімін арқалаған азаматқа артылар жауапкершіліктің жүгі ауыр екені айтпаса да белгілі. Шымкент – еліміздегі халық саны миллионнан асатын үш қаланың бірі. Мегаполистің мәселесі де, мүмкіндігі де жетерлік. Ендеше газет редакциясы тарапынан Руслан Арысбекұлының алдағы бастамаларына табыс тілейміз! Шымкент жұртшылығының алғысын алуына тілекшіміз!
«Уақыт».
