ТҮРКІСТАН ОБЛЫСЫ ТҰРҒЫНДАРЫН ҚАНДАЙ ТҮЙТКІЛДЕР ТОЛҒАНДЫРАДЫ?
Түркістан – еліміздегі халық тығыз қоныстанған өңірлердің бірі. Сәйкесінше, жұртшылық тарапынан түсетін арыз-шағымның да қатары қалың. Бірін ауыз су мәселесі толғандырады. Енді бірі сапалы жолға қол жеткізе алмай жүр. Жарықтан қысылған жұртшылық та бар. Жалпы қай өңірлерде мәселе көп? Бұқара қандай түйткілмен жиі жүгінеді? Тарқатайық…
Түркістан облысының әрбір аймағында тұрғындарды алаңдатқан мәселелер көп. Мысалы, Төлеби ауданындағы Зағамбар, Көксәйек, Зертас ауылдары мен Леңгір қаласының тұрғындары 109 бірыңғай байланыс телефонына 83 рет хабарласып, ауыз су құбырының жарылғанын айтқан. Сондай-ақ иесіз иттердің көше кезіп жүруі бойынша 122 рет хабарлама қалдырған. Сауран ауданы, Шорнақ ауылындағы Темірбаев көшесінің тұрғындары жолдың жоқтығынан лай кешіп жүруге мәжбүр. Бұл бойынша 18 рет өтінім берілген. Ал Түркістан қаласында жер қазып, кәріз жұмыстарын жөндеген мамандар жұмыс орнын қалпына келтірмей кетіп қалған. Шауғар, Бекзат, Отырар мөлтекаудандарында осы іс қайталанған. Аталған жағдай бойынша 210 хабарлама тіркелген.
Жалпы орталықтағы хабарламаларды саралайтын болсақ, ең көп өтініш Түркістан, Кентау қаласы мен Төлеби, Бәйдібек, Сайрам аудандарынан түсетініне көз жеткізуге болады. Ал негізгі мәселелердің қатарына электр жарығымен жабдықтау, ауыз су, ветеринариялық қызмет, көше жарықшамдары, тұрмыстық қалдықтарға қатысты түйткілдер жатады.
Облыстық цифрландыру, мемлекеттік қызметтер көрсету және архивтер басқармасының басшысы Марат Айнабековтің айтуынша, жыл басынан бері 11 358 қоңырау түскен. Ал қаңтар айы бойынша түскен өтінім 15 пайызға артқан. Өз сөзінде «Өткен жылы 130 224 қоңырау түсіп, 126 887 өтінім дер кезінде, 3337 өтінім мерзімі өтіп жабылды. Қазіргі таңда орталықтың қызметін насихаттау бойынша жұмыс қарқынды істеліп жатыр. Атап айтқанда, облыс аумағында орналасқан аудан-қалалардың барлығында инфобаннерлер орналастырылып, әлеуметтік желілерде 109-дың қызметі жайлы посттар күнделікті жарыққа шығып жатыр» деді Марат Айнабеков. Тағы бір айта кетерлігі, 109 желісінің жұмысына жасанды интеллект мүмкіндіктерін қолдану жоспарланып отыр. Бұл өз кезегінде өтініштердің сапалы орындалуын арттырады және мәселелердің тез әрі тиімді шешілуіне ықпал етпек.
Ж.БАЛАУСА.
