Маңызды

Шымкент қаласы әкімі Мұрат Әйтеновтің Абай ауданындағы жұмыс сапары жалғасуда. Ендігі кезекте «Құрсай» шағын ауданының тұрғындарымен кездесіп, әрбірінің сұрағына нақты жауап берді.

Тұрғындар көтерген мәселелер қатарында жарықтандыру, абаттандыру, әлеуметтік нысандар, жол салу, инженерлік желілер жүргізу, көгалдандыру және т.б. мәселелер бар. Сонымен бірге олар елді мекенді одан әрі дамыту жөнінде ұсыныстар мен идеяларын да айтты.

Алдағы уақытта елді мекен тұрғындарымен бетпе-бет тұрақты кездесіп тұратынын айтқан қала басшысы мұндай кездесулер халықтың қажеттіліктері ескеріліп, шағын аудандардың дамуына оң ықпал ететінін жеткізді.

Кездесуде айтылған өтініштер мен сауалдар бойынша қала әкімі аудан әкімі мен сала жетекшілеріне бірқатар нақты тапсырмалар берді.

Бүгінде «Құрсай» шағынауданында және 282, 283 орамда инфрақұрылым жүйелерімен қамту, абаттандыру жұмыстары жүргізілуде. Шағынауданда 1480 үй (80%) ауыз сумен қамтылған. Қазіргі таңда «Реголит» ЖШС шағынауданда және 282, 283 орамда ауыз су жүйелерінің құрылысын жүргізуде. Құрылыс жұмыстарын осы жылдың төртінші маусымында аяқтау жоспарлануда. Шағынауданға электр жарығы және табиғи газ толық жеткізілген.

Сонымен бірге, биыл 7 көшеге шағал тас, Қарнақ көшесі мен осы көшенің 4 тұйығына асфальт төселеді. Және Жеті жар мен З.Сатқанбайұлы көшесі жарықтандырылады. Бюджет есебінен 3 спорт және балалар алаңшасы салынады. 2021 жылы шағынауданды сапалы интернетпен қамту мақсатында базалық станция орнатылды.

Бүгін Шымкент қаласының әкімі М.Әйтенов Абай ауданына қарасты «Қазығұрт» шағынауданының тұрғындарымен кездесу барысында осылай деді.

«Мемлекет басшысы халықтың әл-ауқатын арттыру бойынша нақты тапсырмалар міндеттеді. Сондықтан қалада инвестиция тарту, жаңа жұмыс орындарын ашу, инфрақұрылымды дамыту, шағын және орта бизнестің өркендеуіне, тұрғындардың жайлы өмір сүруіне қолайлы жағдай жасау міндеті басты назарда. Яғни халықтың мәселесін күн тәртібінен түсірмек емеспіз. Бұл бағытта бар күш-жігерімізді салып жұмыс жасайтын боламыз»,-деді қала басшысы тұрғындармен тілдесу барысында.

Әкім шағынаудан электр жарығы, ауыз су және табиғи газбен толық қамтылғанын атап өтіп, алдағы уақытта Мақталы, Жұлдыз, Баянауыл көшелерін жарықтандыру, екі балалар ойын алаңшасын салу, Жастар, Қазына, Алмалы, атауы жоқ 1,2,3,4 өткелдерге бюджет есебінен асфальт төсеу жұмыстарын жүргізу жоспарланып жатқанын айтты.

Сонымен қатар, Мұрат Әйтенов елді мекен инфрақұрылымын одан әрі дамытып, сауда және әлеуметтік нысандарды салу керектігіне назар аударды.

Өз кезегінде тұрғындар шағынауданды дамыту бойынша атқарылған жұмыстар үшін қала әкіміне алғыстарын жеткізді.

Қазіргі уақытта елді мекен тұрғындарына №34 және №60 бағыттағы автобустар тұрақты қызмет көрсетеді. Сонымен қатар, А-2 тас жолы бойынан №21,56,96 маршруттар қатынайды.

Бұдан бөлек, шаһар басшысы Қазығұрт» шағынауданындағы инфрақұрылым жүйелерімен қамту жұмыстарының барысын қадағалады.

Шымкент қаласының әкімі Мұрат Әйтенов Абай ауданы аумағындағы елді мекендерде атқарылған жұмыстардың барысын пысықтап, тұрғындармен кездесті.

Қала әкімі «Агрофирма-Қарасу» шағынауданы тұрғындарымен кездесіп, инфрақұрылыммен қамту жұмыстарының барысын жан-жақты түсіндірді.
Шағынаудан электр жарығы, ауыз су жүйелерімен толық қамтамасыз етілген. 65 үй жекеменшік табиғи газбен қамтылған. 2022 жылы газ жүйелерінің құрылысын жүргізу үшін ЖСҚ әзірлеу жоспарлануда.

2021 жылы Ақүйік, Ақшат, Көксәйек, Кеңестөбе, Ақбастөбе, Шарбұлақ, Аққанбұлақ, Ақтекше, Аққия көшелеріне шағал тас төсеу жұмыстары жүргізілді. Сарытау көшесі жарықтандырылды. Сондай-ақ, 1 спорт алаңшасы орнатылып, пайдалануға берілді.
2022 жылы Ақбұлым көшесіне шағал тас төсеу жұмыстары атқарылмақ.

Қала әкімі тұрғындарды нысандардың сапасын бақылауда атсалысуға шақырды. Жұмыстар барысында кемшіліктерді, аудан әкіміне жеткізу қажеттігін атап өтті.

Өз кезегінде тұрғындар қоғамдық көлік, балалар ойын алаңшасы және жалпы инфрақұрылым саласында атқарылып жатқан жұмыстар бойынша қала әкіміне алғысын білдірді.

Елімізде қаралы қаңтар оқиғасының зардабы мен зауалы әлі айтылып түгесілмеді. Жұрт енді есін жиып, бейбіт заман деген сөздің қадірін терең түсіне бастады. Биліктегілер болса бұқарадан асып ешқайда бара алмайтынын енді түсініп, қай жерде «қамысты бос ұстағандарын» түгендеп әлек. Шаш етек шығынға батқан бизнес субъектілері болса «шығыс болмай кіріс болмас» деп өздерін жұбатып, келер күннен жақсылық күтуде. Белсенділер бұл оқиғадан қандай сабақ алуымыз керек екенін айтудан жалықпауда. Оны бұқаралық ақпарат құралдары жарыса жазуда.  Бөле-жара айта кететін мәселе жыл басындағы дүрбелеңнен соң депутаттардың белсенділігі өзгеше реңк алды. Олар бұрынғыдай журналистердің сұрағына керенау емес, көсіле жауап беруге көшкен. Олардың сөзі «Кезінде Үкіметке қымбатшылықпен күресуді талай айттық. Тыңдамады» дегенге саяды. Және оған  негіз ретінде осы бағытта Үкіметке жолданған депутаттық сауалдарын еске алады. 

Осы жетіде Сенатор Ақылбек Күрішбаев ауылдағы әлеуметтік жағдайды жақсарту керек екенін, себебі қаңтардағы оқиға кезінде митингге шыққан жастардың дені ауылдан келгенін айтып, мәселе көтерді.

Ол алтын бесік ауылда біраз отбасы «шықпа жаным шықпа» деп өмір сүріп отырғанын, ал биліктегілердің ауыл ахуалы туралы статистикасы шындықтың ауылынан алыс жатқанын ашық айтты. Сондай-ақ ол сенаторлардың аудандар мен ауыл тұрғындары арасында жүргізілген арнайы әлеуметтік сауалнама нәтижесінде ауыл тұрғындары үшін бас ауыртар басты мәселе тұрақты жұмыстың табылмайтыны екенін атап өтті. Өз сөзінде А. Күрішбаев «Сауалнамада ауыл тұрғындары бір айдағы нақты табысы 35 мың теңге құрайтынын көрсеткен. Мұндай ақшаға қалай өмір сүруге болады? Жыл сайын ауыл халқының қалаларға көшуі артуда. Біз жүргізген әлеуметтік сауалнама нәтижелері көрсеткендей еңбекке қабілетті халықтың 41 пайызы ауылдардан қалаға көшуді қалайды» деді. Сенатор егер ондағы тұрғындар қалаға қарай үдере көше берсе, ауылда жұмыс істейтін ешкім қалмай қаңырап бос қалса, елді азық-түлікпен қамтамасыз ету, шекаралас аудандарды қорғау мәселелері алға шығатынын ескертеді.

Бұдан өзге А. Күрішбаев осыдан бір жыл бұрын Жоғарғы палата депутаттары ауылдық аймақтарды дамыту бойынша Үкіметке нақты ұсыныстар жолдағанын, бірақ оның негізгі тармақтарының бірде бірі орындалмағанын айта келе «Неге Үкімет Сенатқа құлақ аспайды?» деді.

Өкінішке орай Қазақстан Үкіметін Асқар Мамин басқарған үш жылға жуық уақыт ішінде Сенатордың дәл осы сұрағы басы ашық күйінде қала берді. Енді Смайылов тізгіндейтін министрлер кабинеті депутаттардың дегеніне нақты қандай қадамдарға баратынына көп ұзамай куә боламыз.

Елімізде Ұжымдық қауіпсіздік туралы шарт ұйымының бітімгершілік күштерін елден шығару операциясы аяқталды. Сәрсенбіде бітімгершілік әскердің соңғы легі елден кетті. Осылайша 13-қаңтардағы Қазақстан аумағындағы үш облысқа орналастырылған ҰҚШҰ әскерлерінің елден шығару он күнге созылады деген меже мерзімінен бұрын орындалды.

Еліміздің Сыртқы істер министрлігі Еуразиялық интеграция департаментінің директоры Александр Синяговский ҰҚШҰ бітімгершілік күштерінің миссиясы сәтті аяқталғанын хабарлайды.

Айта кетейік, алты мемлекет мүше болып табылатын Ұжымдық қауіпсіздік туралы шарт ұйымы құрылғаннан бері 30 жылдың ішінде бітімгершілік күштерді алғаш рет Қазақстан пайдаланылып отыр.

Қазақстанның Үкімет үйіндегі ең жас министр 38-де болса, ең үлкені 59 жаста. Жалпы Үкіметтегі министрлердің орташа жасы шамамен 49 жасты құрап отыр. Бір жыл бұрын министрлердің орташа жасы 48 жасты құраған.

Бұл туралы ranking.kz жазады.

Аталған компания осылайша бір жыл уақытпен салыстырғанда ел Үкіметі қартаюда деген тұжырым жасайды. Бірақ Еуразиялық Экономикалық Одақ елдерімен салыстырғанда елімізде министрлер кабинетінде егде тартқандардың үлесі аз екенін байқауға болады. Мысалы, Ресейдегі министрлердің орташа жасы 53,6 болса, Беларуссияда 51,2, Қырғызстанда 50,7, Арменияда 45,7-ні құрайды.

Армениядан бір саты жоғары тұрған Қазақстандағы Үкімет үйіндегі жасы ең үлкен министр Ерлан Тұрғымбаев болып табылады. Ішкі істер министрі қызметін 2019 жылдан бері атқарып келе жатқан ол 59 жаста. Одан кейінгі орында 57 жастағы Индустрия және инфрақұрылымдық даму министрі Қайырбек Өскенбаев болып табылады.

Ал ең жас кадрлар – Ұлттық экономика министрі Әлібек Қуантыров пен Цифрлық даму, инновация және аэроғарыш министрі Бағдат Мусин. Олар әлі қамал алар қырыққа да келмеді. Жастары 38-де.

Жалпы Еуразиялық Экономикалық Одақ елдері арасында ең жас министр Арменияда қызмет етеді. Аталған елдің Еңбек және әлеуметтік мәселелер жөніндегі ведомства басшысы 32,6 жаста екен.  Ал Одаққа мүше елдер арасында жасы ең үлкен министр Ресейде жұмыс істейді. Ол 71 жастағы Сергей Лавров. Айта кетейік Сергей Викторович көрші елдің Сыртқы істер министрі болып табылады.

Аптаның сәрсенбісінде Мәжіліс депутаттары Тұңғыш Президент, Елбасына қатысты бірқатар заңға түзетулер енгізді. Соған сәйкес Нұрсұлтан Назарбаев Қазақстан халқы Ассамблеясы мен Қауіпсіздік кеңесіне өмір бойы төраға болу құқығынан айырылды. Құжат Сенатқа жолданған.

Бұл туралы Мәжіліс депутаты Қанат Нұров өзінің фейсбуктегі парақшасында хабарлады. Депутат бұл ұйымдарға төрағалық ету енді лауазымы бойынша мемлекет басшысы Қасым-Жомарт Тоқаевқа тиесілі екенін нақтылай кеткен. Өзінің жазбасында Қанат Нұров Мәжілістің осындай тарихи шешім қабылдауына қатысқанын айта келе, мемлекет басшысының Парламенттегі мәлімдемесін (11-қаңтардағы) революциялық  сәтке теңеді. Және де Парламент пен Үкімет оның барлық уәделерін толық, шұғыл және дәл жүзеге асыруы тиістігін тілге тиек еткен.

Жазбасының соңында Төменгі палата депутаты «Тұңғыш Президент саясатқа қайта оралмауы керек, оның «отбасының» барлық ресми және бейресми саяси монополиялары экономикада кеңінен жойылуы керек» деп келтірген.

Ағымдағы жылдың 5-қаңтарында еліміздің үш өңірі (Маңғыстау, Алматы облысы мен Алматы қаласында) төтенше жағдай режиміне көшкен болатын. Келесі күннен бастап яғни, 6-қаңтарда еліміздің барлық аумағында 19-қаңтарға дейін төтенше жағдай режимі енгізілген еді. Осы уақыт ішінде ел тыныштығын күзеткен Ұлттық ұланның сарбаздары мен тәртіп сақшыларының әрбіріне 150 теңге көлемінде үстемақы төленеді.

Бұл туралы Ішкі істер министрі Ерлан Тұрғымбаев мәлімдеді.

Ведомства басшысы ішкі істер министрлігіне қарасты жоғары оқу орындарында оқитын студент-курсанттар мен ішкі әскер сарбаздарына қаржылай емес, бағалы сыйлық берілетінін жеткізді. Бірақ тарту түрі қандай болатынын ашып айтпады.

Айта кетейік, қаңтар оқиғасы кезінде террористер қолынан полиция мен Ұлттық  ұланның  8 қызметкері қайтыс болды. 2911-і жарақат алған болатын. Ерлікпен қаза тапқандарды Президент орденмен марапаттаған.

Өткен жылдың 31-тамызында мемлекет басшысының Жарлығымен Мұрат Бектанов ҚР Қорғаныс министрі болып тағайындалған еді. Ол оған дейін ведомства басшысының орынбасары қызметін атқарған. Сол кезде Бектанов атқарған ісінен гөрі, қит етсе отставкаға кетуге әзірмін деген сөзімен ел есінде қалған Нұрлан Ермекбаевтың орнына тағайындалған еді.

Ермекбаев өзін Қорғаныс министір қызметінен босату туралы Президентке рапорт жазуына 26-тамызда Жамбыл облысында Байзақтағы инженерлік оқ-дәрілер сақталған қоймадағы жарылыс  түрткі болған. Экс-министр ай күннің аманында жарылысқа жол бергені үшін өзіне қарата айтылған сындардан шығар жалғыз жолды осылай шешкен еді.  Оның орнын басқан Бектановтан былайғы жұрт нәтижелі жұмыстар күткен болатын. Бірақ қандай да бір сеңнің қозғалғаны осы күнге дейін байқалмады. Керісінше кешегі қаңтар оқиғасы кезінде Мұрат Бектановтың көшбасшылық қабілетіне ел куә бола алмады. Бұл туралы ойды мемлекет басшысы Қасым-Жомарт Тоқаев «сын сағатта армия әлеуетін көрсете алмады» деген сөздермен жеткізді.

Президент бұл сөзіне ҰҚШҰ мүше елдерден бітімгершілік күштерін елге алдырту содан туған мәжбүрлік болғанын негіз ретінде келтірді. Осылайша бес айға жуық уақыт елдің Қорғаныс министрі қызметін атқарған Мұрат Бектанов лауазымынан  босатылды. Оның орнына Қорғаныс министрі болып Руслан Жақсылықов тағайындалды. Ол бұған дейін Ішкі істер министрінің орынбасары әрі Ұлттық ұланның Бас қолбасшысы қызметінде болған.

Мемлекет басшысы ендігі кезекте еліміздің қарулы күштеріне бақылау күшейіп, талап артатын жеткізді. Ол жаңа басшыға Арыс, Байзақтағыдай қару жарақ сақтайтын нысандарда төтенше жағдайлардың орын алуын алдын алу шараларын мүлтіксіз орындау қажеттігін айтты. Ол үшін қоймалардағы қажетсіз оқ-дәрілерді жою шараларын жүзеге асыруды шегеледі. Сонымен қатар қолданысқа жүргеніне жарты ғасыр уақыт толған Кеңес дәуіріндегі техникаларды жаңартуды жеткізді.

Былтыр қаңтар-қараша айларында елімізден шетелге ақша аудару жүйелері арқылы жөнелтілген жеке тұлғалардың халықаралық қаржы аударымдарының жалпы көлемі 921,3 млрд теңгені құраған. Яғни 1 триллион теңгеге жуықтаған. 2020 жылдың  ұқсас кезеңінде бұл көрсеткіш 712,8 млрд теңге болған.

Бұл деректі ranking.kz таратты.

Ал шетелден алынған ақша көлемі 256,2 млрд теңгеге жетіп, өткен жылдың сәйкес кезеңімен салыстырғанда 0,8 пайызға азайған.

Қазақстанда жеке тұлғалар есебінен жасалған халықаралық қаржы аударымының ең көп үлесі немесе 278,5 млрд теңгесі Өзбекстанға жөнелтілсе, 189,2 млрд теңге Түркия еліне, 162,1 млрд теңге Ресейге аударылған.