ТҮЛЕКТЕР ТАРТУЫ

Тұңғыш Президентіміз-Елбасының «Болашаққа бағдар: рухани жаңғыру» бағдарламалық мақаласының «Атамекен», «Туған жер» арнайы жобасы аясында Жуантөбе ауылында С.Сейфуллин атындағы жалпы орта мектебінің 2000 жылы (1983 жылғы) мектеп бітіруші түлектері 20 жылдық кездесулеріне орай өз қаржыларына ауылымызға керемет, ел сүйсінетін тірлік жасап, 0,5 шақырымды құрайтын көше аралық топырақ жол мен ауылдық мешіт алдына тас жол төсеп, жарықтандыру жүйесін жүргізіп берді.

Мектеп бітіруші түлектердің кездесуіне орай ауылға тарту жасау үрдісі жылда жалғасын тауып келеді. Атап айтқанда, 1998 жылы (1981 жылғы) бітіруші түлектер ауылға керемет «Бәйтерек» монументін тарту етсе, 1999 жылы (1982 жылғы) бітіруші түлектері 20 жылдық кездесуі қарсаңында мешіт алдына күннен қалқа конструкциясын (навес) орнатып, мешітке арнайы ас өткізуге толық керекті ыдыс-аяқпен қамтамасыз етті.

Ауылда атқарылатын жұмыстардың ауқымды екені белгілі. Әрине барлық мәселелерді бюджет есебінен шешіледі деп артып қою жөн емес. Сондықтан да алдағы жұмыстарды да мүмкіндігінше жергілікті бюджеттен, демеушілік есебінен және мектеп бітіруші түлектерді тарта оттырып, бірге атқаратын боламыз.

Бұл маңызды бастамалар келешекте өскелең ұрпаққа үлгі, өнеге болады деп ойлаймыз.

«IGI QADAM» ЖШС-нің (басшысы ауылымыздың азаматы, көптеген игі істерге бастамашы болып, қолдап, көмек беріп жүрген кәсіпкер Тұрғанбайұлы Нұрбақыт) демеушілігімен «Бәйтерек» кешеніндегі ғимараттың төбесін қайта жауып беріп, тұрақты әлеуметтік көмектер көрсетуде.

Еріктілердің бастамасымен ауыл тұрғындарының қолдауымен ұйымдастырылған қажетті отбасыға үй салып беру мәселесі одан ары жанданып, үй құрылысының жұмысын бітіру қолға алынуда.

Мақсат ҚАРҒАБАЙ.