ТҮРКІСТАН ДӘЛЕЛДЕДІ, ЕНДІГІ КЕЗЕК — ӨЗГЕ ӨҢІРЛЕРДЕ

Елімізде өндірісті өрге сүйреудің соны соқпағы белгілі болды. Түркістан облысында сәтті сынақтан өткен «Шағын өндірістік парктер» жобасы енді жалпыұлттық деңгейге көтерілмек. ҚР Премьер-министрінің орынбасары Қанат Бозымбаевтың тапсырмасына сәйкес, өңірдегі өндірістік серпіліс өзге облыстарға үлгі ретінде ұсынылды. Бұл тек зауыт салу емес, бұл – ауылдағы ағайынның табысын арттырып, импортқа тәуелділіктен арылудың нақты жолы.

Өткен аптада Түркістан топырағына Қаржы, Өнеркәсіп және құрылыс министрліктері мен еліміздің барлық облыстарынан келген 40-қа жуық делегация өкілдері табан тіреді. Олардың мақсаты — Түркістанның жетістіктерін көзбен көру емес, тәжірибені өз өңірлеріне бейімдеу. Делегация мүшелері ең алдымен Сауран ауданындағы «SAURAN» өндірістік паркінің тыныс-тіршілігімен танысты. Мұндағы жұмыс қарқыны көңіл қуантады. Мәселен, «BNK Group» кәсіпорны егістікке жан бітіретін жаңбырлатып суғару технологияларын шығаруды жолға қойса, «Aqniet Holding» отандық жиһаз өндірісінің сапасын жаңа деңгейге көтерді. Ал «UBC Групп» өндірістік тоңазытқыштар жасау арқылы нарықтағы бос орынды толтырып үлгерген. Бұдан бөлек, Сауран аумағындағы «Иассы», «Ескі Иқан», «Дәморда» және «Қарашық» сынды парктер де құрылыс қарқынымен таңғалдырды. Бұл нысандар — ертеңгі күннің ірі кәсіпорындарының бастауы.
Түркістан облысының бұл бағыттағы қадамы — құрғақ уәде емес, нақты есепке негізделген стратегия. Бүгінде облыстың барлық аудандары мен қалаларында 214 гектар аумақта 25 шағын өндірістік алаң құрылды. Бұл дегеніміз — бүкіл өңірді қамтыған тұтас бір өндірістік желі. Қазіргі таңда аталған алаңдарда 258 өндірістік ғимараттың құрылыс жұмыстары жүргізілуде. Ең бастысы, бұл ғимараттар қаңқасы қаланбай жатып-ақ өз иелерін тапқан. Яғни, 251 жоба бойынша нақты келісімдер жасалып қойды. Жобалардың жалпы инвестициялық құны 192 миллиард теңгені құрайды. Бұл ауқымды жұмыстың нәтижесінде 5 218 тұрақты жұмыс орны ашылып, жылына шамамен 96 миллиард теңгенің импортты алмастыратын өнімдері өндіріледі деп болжануда. Яғни, сыртқа кетіп жатқан қыруар қаржы ел ішінде қалып, жергілікті бюджеттің бүйірін толтырады.
Шағын өндірістік парктердің негізгі артықшылығы — инфрақұрылымның дайындығында. Кәсіпкерге жер телімін беріп, «не істесең оны істе» демей, оған дайын ғимарат пен қажетті коммуналдық желілер ұсынылады. Бұл шағын және орта бизнес өкілдері үшін істі бастауға кететін уақыт пен шығынды екі есе азайтады. Екіншіден, бұл жоба — урбанизацияны тежеудің құралы. Ауылды жерде өндіріс орындарының ашылуы жастардың қалаға ағылуын тоқтатып, ауыл экономикасын тіктейді. Сауран, Иқан сияқты елді мекендерде зауыт түтінінің түзу шығуы — әлеуметтік тұрақтылықтың кепілі. Делегация өкілдері өңірдегі бұл бастаманың бизнес климатқа оң ықпал ететінін атап өтіп, жоғары баға берді.
Ендігі кезекте Түркістанның бұл моделі еліміздің барлық өңірлеріне енгізілмек. Үкіметтің бұл шешімі — экономиканы әртараптандыру жолындағы ең дұрыс қадамдардың бірі. Түркістандағы бұл парктер — тек қабырғасы қаланған ғимараттар емес, жаңа экономикалық жетістіктің кілті. Егер өзге облыстар бұл мүмкіндікті тиімді пайдалана алса, Қазақстанның өңдеу өнеркәсібіндегі үлесі еселеп артатыны анық. Түркістан жол бастады, ендігі сөз — өзге өңірлерде.