ОРДАБАСЫ АУДАНЫНДА ЖАҢА ПЕРИНАТАЛДЫҚ ОРТАЛЫҚТЫҢ ҚҰРЫЛЫСЫ БАСТАЛДЫ

Түркістан облысында денсаулық сақтау инфрақұрылымын жаңғырту және халыққа көрсетілетін медициналық қызмет сапасын арттыру бағытындағы жұмыстар кезең-кезеңімен жүзеге асырылып келеді. Соның аясында Ордабасы ауданында заманауи талаптарға сай перинаталдық орталықтың құрылысы басталды. Бұл жоба өңір үшін әлеуметтік маңызы жоғары нысандардың бірі саналады және ана мен бала денсаулығын қорғауға бағытталған.

Жаңа перинаталдық орталықтың салынуы Мемлекет басшысы Қасым-Жомарт Тоқаевтың ел дамуына арналған Жолдауларында айқындалған міндеттерді орындау шеңберінде қолға алынған. Жол картасына енгізілген бұл бастама елімізде перинаталдық көмектің қолжетімділігі мен сапасын арттыруды, заманауи медициналық жабдықтармен қамтамасыз етілген орталықтар желісін қалыптастыруды көздейді. Мұндай орталықтарда білікті дәрігерлер мен орта медициналық қызметкерлер жұмыс істеп, күрделі жағдайларда жоғары деңгейдегі көмек көрсету мүмкіндігі кеңейеді. Жобаның тапсырыс берушісі ретінде «Түркістан облысының құрылыс басқармасы» мемлекеттік мекемесі белгіленген. Құрылыс жобасын «ЦАПСК» жауапкершілігі шектеулі серіктестігі әзірлеген болса, нысанды салу жұмыстарын «ВД Строй-Инжиниринг» ЖШС жүзеге асырады. Құрылыстың сапалы әрі белгіленген талаптарға сай жүргізілуі үшін техникалық және авторлық қадағалау ұйымдары тарапынан тұрақты бақылау жүргізіледі.
Жоспарға сәйкес, перинаталдық орталықтың құрылысы 2028 жылы толық аяқталады. Ғимараттың жалпы аумағы 32 мың шаршы метрден асады, ал нысан 8 гектар жер телімінде орналасады. Жобаның жалпы құны 45,8 миллиард теңгені құрайды. Бұл көрсеткіш орталықтың ауқымы мен техникалық жарақталу деңгейінің жоғары болатынын аңғартады. Аталған медициналық мекеме пайдалануға берілген соң тек Ордабасы ауданының тұрғындары ғана емес, оған көршілес елді мекендердегі халық та сапалы перинаталдық қызмет алу мүмкіндігіне ие болады. Әсіресе, жүктілігі ауыр өтіп жатқан аналар мен жаңа туған нәрестелерге көрсетілетін медициналық көмектің қолжетімділігі артып, асқынған жағдайларда дер кезінде көмек көрсету деңгейі жақсарады.
Қазіргі уақытта құрылыс алаңында жер қазу және дайындық жұмыстары басталып, тиісті инженерлік шаралар атқарылуда. Жоба белгіленген мерзімде әрі сапалы аяқталса, бұл нысан өңірдегі денсаулық сақтау жүйесін нығайтуға, ана мен бала өлімін азайтуға және медициналық қызмет сапасын жаңа деңгейге көтеруге елеулі үлес қосады.