АЛТЫН БАҒАСЫ РЕКОРДТЫҚ ДЕҢГЕЙГЕ ЖЕТТІ

Алтын – ежелден бері ең құнды металдардың бірі. Ол тек зергерлік бұйымдар жасауда ғана емес, сонымен қатар экономикада, қаржы жүйесінде және өнеркәсіпте маңызды рөл атқарады. Бүгінде алтын нарығы — әлемдік экономикадағы тұрақтылықтың маңызды көрсеткіштерінің бірі.

Осы орайда, дүйсенбіде алтынның бағасы бір унция үшін 3 106,50 долларды құрап, рекордтық деңгейге жетті. АҚШ президенті Дональд Трамптың тарифтеріне және геосаяси тұрақсыздықпен бірге ықтимал экономикалық құлдырауға қатысты алаңдаушылық аталған инвестиция түріне деген сұранысты арттырды. Алтын жыл басынан бері 18 пайыздан астам қымбаттады. Осы айдың басында баға алғаш рет унция үшін 3 мың доллардан асты. Сарапшылар мұны экономикалық тұрақсыздық, геосаяси шиеленіс пен инфляцияға қатысты өсіп келе жатқан алаңдаушылықпен байланыстырып отыр. Сонымен қатар алтын бағасының көтерілуі бірқатар банктерді өз болжамдарын көтеруге итермеледі.
«Goldman Sachs», «Bank of America» және «UBS» осы айда алтынның мақсатты бағаларын көтерді. «Goldman» болжамынша, жыл соңына дейін баға унция үшін 3300 долларға жетеді, бұл оның бұрынғы 3100 доллар болжамынан жоғары. «Bank of America» 2025 жылы унция үшін баға 3 063 доллар және 2026 жылы 3 350 доллар болады деп болжайды, оның бұрынғы бағалауы сәйкесінше 2 750 және 2 625 доллар болған еді. Қорыта айтқанда, алтынның бағасы алдағы уақытта шарықтай түсуі бек мүмкін…