ТӨТЕНШЕ ЖАҒДАЙЛАР ДЕПАРТАМЕНТІНІҢ КӨРМЕСІ ӨТТІ

Қазіргі заманғы қоғамда төтенше жағдай қызметінің рөлі өте маңызды. Бұл қызмет табиғи апаттар, техногендік апаттар немесе басқа да төтенше жағдайлар кезінде адамдардың өмірін қорғауға және қауіп-қатерді азайтуға бағытталған. Төтенше жағдай қызметкерлері түрлі қиындықтарға дайын болуы керек. Олар өрт сөндіру, су тасқыны, жер сілкінісі, жол-көлік апаттары сияқты жағдайларда жедел көмек көрсетеді. Сонымен қатар медициналық жәрдем беру, эвакуация жұмыстарын жүргізу және адамдарды қауіпсіз жерге шығару сияқты маңызды міндеттерді атқарады.

Осы орайда, 1 наурыз — Дүниежүзілік Азаматтық қорғаныс күніне орай, Төтенше жағдайлар департаментінің күш-құралдарын таныстыруға арналған көрме әрі келушілерге ашық есік күні ұйымдастырылды. Қала қонақтары мен тұрғындары құтқарушылардың күнделікті қызметімен танысып, қызықтырған сауалдарына жауап алды. Әсіресе, құтқару қызметінің құрал-саймандары мен техникаларына отырып қызық көрген балалар «өскенде осы салада қызмет еткім келеді» деген арман-тілектерін де ақтарып жатты. Шымкент қалалық Төтенше жағдайлар департаменті Азаматтық қорғаныс басқармасының бастығы Нұржан Нұрханұлының айтуынша, жыл сайын Алғыс айту күнімен тұспа-тұс келетін сала қызметкерлерінің кәсіби мерекесі де ерекше аталып өтіліп келеді. Биыл да «Азаматтық қорғаныс – халықтың қауіпсіздік кепілі» атты ұранмен ұйымдастырылып отырған іс-шара тек ашық есік күнімен аяқталмайды. Наурыз айында қаладағы барлық білім ордасында, денсаулық сақтау орындары мен әкімшілікте, өзінің қамтамасыз етілетін нысандары, сол сияқты өндірістік орындарда халық пен аумақтағы қауіпсіздікті қамтамасыз ету мақсатында азаматтық қорғаныстың іс-шаралары ұйымдастырылмақ. Ал Шымкент қаласындағы орталық цирктің аумағында өткен ашық есік күніне Жедел құтқару жасағы, Апаттар медициналық орталығы, өрт сөндірушілердің техникалары мен құрал-саймандары қойылған.
«Біздің іс-шарамыздың мақсаты – мерекелік көңіл-күй ғана сыйлау емес, өскелең ұрпақ бойындағы патриоттық сезімді оятуға негізделген. Себебі бүгін құтқарушылардың қызметін көзбен көріп, жүрекпен сезінген балалар өскенде ел қорғау жолында аянбай қызмет етуді мақсат етпек. Көріп отырғандарыңыздай, бүгін біз халыққа жұмысымызбен жақын таныстырып, қандай аспаптармен, қандай техникамен қолданатынын кеңінен жариялап, түсіндіріп жатырмыз» деді басқарма басшысы. Алдағы уақытта мұндай ашық есік күндері Шымкент қаласындағы барлық өрт сөндіру бөлімдерінде жалғасын табады. Ал бүгінгі көрмеге Төтенше жағдайлар департаментінің құрылымдық бөліністерінен 56 адам, 8 техника, бұдан бөлек, 10 ерікті жас келіп, халыққа түсіндірме жұмыстарын жүргізуге көмек көрсетіп жатыр.