ҚАЗАҚСТАНДА ҚАНША ЭЛЕКТРОМОБИЛЬ БАР?
Қазіргі таңда электромобильдер өндірісі қарқынды дамып, әлемдік көлік индустриясында маңызды орын ала бастады. Ғаламдық экологиялық мәселелердің ушығуы, мұнай қорының азаюы және жаңа технологиялардың дамуы дәстүрлі жанармаймен жүретін көліктерді электр қуатымен жұмыс істейтін көліктермен алмастыру қажеттігін туындатты.
Осы орайда, жуырда ҚР Көлік министрлігі электр көліктерін дамыту және олардың инфрақұрылымын құру бойынша қандай мемлекеттік қолдау шаралары қарастырылғанын түсіндірді. Статистикалық деректерге сәйкес, бүгінгі таңда Қазақстанда электр қозғалтқыштары бар 12120 автокөлік тіркелген. Сондай-ақ, қазіргі уақытта елімізде 426 электр зарядтау станциясы жұмыс істеп тұр. 2024 жылғы 18 шілдеде «Қазақстан Республикасының кейбір заңнамалық актілеріне көлік және электромобильдерге арналған инфрақұрылымды дамыту мәселелері бойынша өзгерістер мен толықтырулар енгізу туралы» Заңы қабылданды. Онда елімізде электромобильдерге арналған инфрақұрылымды құру және халықты электромобильдерге көшуді ынталандыру бойынша нормалар ескерілген. Сондай-ақ елімізде электромобильдерді дамыту үшін бірқатар шара қабылданды. Яғни электромобильдер кәдеге жарату алымынан босатылды. Электромобильдер үшін бастапқы мемлекеттік тіркеу үшін алым мөлшерлемесі көліктің басқа түрлеріне қарағанда шамамен 2 есе төмен белгіленген.
Бұл ғана емес, тұрақты маршруттарға қызмет көрсету құқығына конкурстық іріктеуде электробустары бар тасымалдаушыларға артықшылықтар белгіленген. 2018-2024 жылдары жеңілдетілген лизингтік қаржыландыру бағдарламасы аясында өңірлерге 125 электробус жеткізілді. Жалпы электромобильдер – болашақтың көлігі. Олардың экологиялық тазалығы, үнемділігі және техникалық артықшылықтары бүкіл әлемде танылып, сұраныс артып келеді. Бұл технологияны дамыту арқылы адамзат қоршаған ортаны сақтап, энергия тиімділігін арттыра алады. Сондықтан электромобиль өндірісін қолдау – жаһандық деңгейдегі маңызды қадам.
