КҮНГЕЙДЕ ТУРИСТІК ЖӘНЕ КӘСІПКЕРЛІК ӘЛЕУЕТІН КӨТЕРЕТІН НЫСАНДАР САЛЫНАДЫ
![](https://uaqyt.kz/wp-content/uploads/2024/07/2-17.jpg)
Түркістан облысында туризм саласын дамыту бойынша ауқымды шаралар атқарылып жатыр. Сәйкесінше, күнгейге келетін шетелдік туристер мен саяхатшылар саны да артып келеді. Мұның өзі облыстағы әлеуметтік һәм туристік нысандарға ауқымды салмақ салады. Сондықтан көптеген жаңа ғимараттар бой көтеріп жатыр.
Түркістан облысында, әсіресе, облыс орталығында бой көтеріп жатқан нысандардың сәулеті қала кейіпіне сай болуы тиіс. Бұл туралы облыс әкімі Дархан Сатыбалдының төрағалығымен өткен жиында айтылды. Жиын барысында облыстағы сәулеттік жобалар жан-жақты талқыланды. Атап айтқанда, әкімшілік-іскерлік орталығындағы тұрғын үй кешендері мен коммерциялық нысандардың қасбеті, аулаларды абаттандыру, көше бойына салынатын саябақ дизайны қаралды. «Қолөнершілер орталығы» мен «Күлтебе қалашығы» жобасы пысықталып, ұсыныстар айтылды. Өңір басшысы әрбір нысанның құрылысы талапқа сай әрі сәнді жүргізілуі тиіс екенін ескертті.
Жиын барысында «Түркістан қаласының өзіндік келбеті қалыптасқан. Нысандардың сәулеттік жобалары талапқа сай болуы тиіс. Әрбір құрылысты зерделеңіздер. Құрылыстың тарихи нысандарға зияны келмеуі басты назарға алынсын. Әрбір нысанға жауапты әкім мен басқарма басшылары жобаның басы-қасында жүріп, тиісті жұмысты атқарсын» деді Дархан Сатыбалды. Жиында әлеуметтік нысандар мен туристік ғимараттардың жобасы қаралды. Әрбір жобаны жіті қарап, ұсыныстарды тыңдаған Дархан Амангелдіұлы кемшіліктер бойынша ескертпелер айтты. Жауапты тұлғаларға жобаны жетілдіру жөнінде нақты тапсырмалар жүктеді.