ТЕМІРЖОЛ ВОКЗАЛЫНЫҢ ҒИМАРАТЫ ПАЙДАЛАНУҒА БЕРІЛДІ
Шымкент қаласы елімізегі экономикалық тұрғыда маңызды стратегиялық орталықтардың біріне айналып келе жатыр. Сондықтан да қаланың көркі заманауи талаптарға сай көркеюі керек. Бұл тұрғыдан келгенде, үшінші мегаполисте жүзеге асып жатқан жұмыстардың қатары қалың. Мәселен, күн бүгінге дейін қаладағы әуежай мен темір жол вокзалының жаңғырып жатқанын жазған едік. Енді міне әлеуметтік маңызы бар нысанның бірінде жұмыстар аяқталып, пайдалануға беріліп отыр.
Тарқата баяндасақ, қала көркін арттырып, тұрғындар мен қонақтарға заманауи талапқа сай жайлы жағдай жасау мақсатында теміржол вокзалының ғимараты қайта жаңартылды. 10 жылға жоспарланған инвестиция қаражаты 1 жыл ішінде қарастырылып, былтыр 10 маусымда басталған жұмыстар 2024 жылдың 10 мамырында толық аяқталды. Сенімгерлік басқаруға нысанды беру арқылы қайта жаңғырту жұмыстары тиімді жүзеге асқанын атап өткен жөн. Мұнда тәулігіне 27 бағыт бойынша поездардың қызметі ұйымдастырылған. 1968 жылы салынған ескі вокзалдың жалпы ғимарат алаңы 1 770,2 шаршы метрді, жолаушыларды өткізу қабілеті тәулігіне 2 мың жолаушыны құраса, бүгінде қайта жаңғырту жұмыстарынан кейін теміржол вокзалының аумағы 2 249,33 шаршы метрге ұлғайып, өткізу қабілеті тәулігіне 6 мың адамға дейін артты. Сондай-ақ жолаушыларды күту залының аумағы 898,3 шаршы метрден 1 982,3 шаршы метрге дейін көбейді.
Жобада ғимараттың екінші кіреберісі, жолаушыларға жайлы қызмет көрсететін заманауи талапқа сай 2 күту залы және екінші қабатта фудкорт қарастырылды. Вокзал ғимаратының қасбеті мегаполистің сәулеттік келбетіне сай жабдықталып, шыны витражды жүйелерден және металл кассеталардан жасалды.
