ҚАУІП ҚАЙДАН ДЕМЕҢІЗ…

Балалар мен жастар, қала берді, үлкендер де жаз маусымын асыға күтеді. Өйткені қазір – серуендеу және шомылу уақыты. Осындай мезгілде көптеген ата-аналардың қауіпсіздік ережелерін ескере бермейтіні белгілі. Ал теңізде, бассейнде, су айдындарында аталған ережені ескермеудің ақыры, орны толмас өкінішпен аяқталуы мүмкін.

Өз кезегінде, біраз уақыттан бері Шымкент қаласында қауіпсіздік ережелерін түсіндіру жұмыстары жүргізіліп келеді. Мәселен, жуырда Қаратау ауданы әкімдігі мен аудандық төтенше жағдайлар басқармасымен бірге аудан аумағындағы бассейн аймағы бар нысандарды аралап, балаларға суда жүзу кезіндегі қауіпсіздік және жазатайым оқиға орын алған сәтте алғашқы көмек көрсету ережелерін кеңінен түсіндірді. «Ыстық күні суға түсу қауіпті, бұл жүректің тоқтауына және естен тану қаупіне әкелуі мүмкін. Балалар немесе ересектердің су астында қарсылас ретінде аяғынан ұстап тартып, ойын ойнау — бұл өте қауіпті. Шын мәнінде, оқыс оқиғаға орын алуы мүмкін. Ал ещқандай қауіп-қатер туындамаса, жалған дабыл көтеріп, суға батып бара жатқандай көрініс жасаудың қажеті жоқ. Себебі шын қауіп туындаған кезде сізге сенбей қалуы мүмкін. Бұл ережелерді суға шомылушы әрбір бала білуі тиіс» дейді аудандық төтенше жағдайлар басқармасы өкілдері.
Еске сала кетейік, аудан және аудандық төтенше жағдайлар басқармасы тарапынан шомылу маусымы кезеңіндегі қауіпсіздік ережелерін сақтау бойынша түсіндірме жұмыстары тұрақты жүргізілуде.