ТҮРКІСТАН ОБЛЫСЫНДА 794 ЕЛДІ МЕКЕН БАС ЖОСПАРМЕН ҚАМТЫЛҒАН

Кез келген аймақтың жүйелі дамуы мен экономикалық қуаты оның қала құрылысының дұрыс жоспарлануына тікелей байланысты. Бұл тұрғыдан алғанда, еліміздің рухани астанасы саналатын Түркістан облысы заман талабына сай, геометриялық тұрғыдан дәл есептелген жаңа дәуірге қадам басып келеді. Жақында Түркістан облысының әкімі Нұралхан Көшеровтің төрағалығымен өткен алқалы мәжілісте аймақтағы аудан-қалалардың бас жоспарлары мен егжей-тегжейлі жоспарлау жобаларының орындалу барысы қызу талқыланды.

Өңірдің сәулет және қала құрылысы саласындағы өзекті мәселелер ортаға салынған бұл жиын жай ғана есеп беру емес, Түркістанның алдағы ширек ғасырдағы тағдырын айқындайтын маңызды басқосу болды. Өңір басшысы аймақтың әрбір бұрышы кешенді әрі сапалы дамуы тиіс екенін шегелеп айтып, жауапты тұлғаларға нақты міндеттер жүктеді. Елді мекендерді жүйелі дамыту мақсатында 2023-2024 жылдары арнайы әзірленген облыс аумақтарының қала құрылысын жоспарлаудың кешенді сызбасы қазіргі таңда мемлекеттік сараптаманың елегінен өтуде. Бүгінгі күннің негізгі көрсеткішіне көз жүгіртсек, облыстағы 801 елді мекеннің 794-і бас жоспармен толық қамтылған, ал қалған 7 ауылдың құжаты бекітілген жол картасына сай қарқынды әзірленіп жатыр. Әсіресе, Үкіметтің 2026 жылғы 30 сәуірдегі қаулысымен бекітілген Түркістан қаласының жаңа Бас жоспарының негізгі бағыттары көпшіліктің назарын аударды. Жаңа құжатқа сәйкес, шаһар аумағы 22,3 мың гектарға кеңейіп, 2044 жылға қарай Түркістан халқының саны 400 мың адамға жетеді деп болжануда. Тұрғындар санының өсуіне байланысты көпқабатты тұрғын үйлердің құрылысы күш алып, туристер ағынын жылына 5 миллион адамға жеткізу көзделіп отыр. Бұл ретте өндірістік аймақтардың көлемін арттыру арқылы өңір экономикасын 500 миллиард теңгеге дейін өсіру жоспарланған.
Болашақтың бұл бағдарламасы тек облыс орталығымен ғана шектелмейді. Бесжылдық жол картасы аясында 387 елді мекеннің бас жоспарларын әзірлеу мен түзету жұмыстары нақты кезеңдерге бөлінген. Мәселен, өткен жылы 106 ауылдың құжаты реттелсе, биыл тағы 81 елді мекеннің бас жоспарына өзгерістер енгізілмек. Бұл үрдіс алдағы жылдары да жалғасын тауып, 2027 жылы 76, 2028 жылы 65 және 2029 жылы 59 ауыл заман талабына сай жаңа жоспарға көшеді. Сонымен қатар, бүгінде 7 қала мен халқы 5 мыңнан асатын ірі елді мекендер 58 егжей-тегжейлі жоспарлау жобасымен қамтамасыз етілген. Жиынды қорытындылаған Нұралхан Көшеров аудан мен қала әкімдеріне жұмысты созбалаңға салмай, мерзімінде әрі сапалы аяқтауды, әсіресе цифрландыру тетіктерін күшейтуді қатаң тапсырды. Сәулетті де сапалы құрылыс – елдің еңсесі мен болашағының кепілі екенін ескерткен облыс басшысы, жауапкершіліктен жалтарған лауазымды тұлғаларға қатаң шара қолданылатынын да ашық жеткізді.