ШЫМКЕНТТЕГІ ЖИТС-ТІҢ АЛДЫН АЛУ ЖӘНЕ ОҒАН ҚАРСЫ КҮРЕС ОРТАЛЫҒЫ ҮЗДІК ҮШТІККЕ ЕНДІ
Шымкент қаласында медицина саласын дамытуға айрықша көңіл бөлініп келеді. Күні бүгінге дейін қала аумағындағы көптеген медициналық нысандарға күрделі жөндеу жұмыстары жүргізілді. Материалдық-техникалық база да заман талабына сай жаңғырып, жаңарып келеді. Дәрігерлердің біліктілігін арттыру ісіне де жіті көңіл бөлінген. Ақ халаттылар тәжірибесін арттыру мақсатында шетелдің үздік денсаулық сақтау мекемелерінде біліктілігін арттыруда. Нәтиже де жоқ емес.
Шымкент қаласының денсаулық сақтау басқармасына қарасты «ЖИТС-тің алдын алу және оған қарсы күрес жөніндегі орталығы» АИТВ-ның алдын алу, күту және емдеу бойынша халықтың негізгі топтары мен АИТВ-мен өмір сүретін адамдарға көрсетілетін қызметтердің тұрақтылығы бойынша елімізде үздік үштікке еніп отыр. Үздік атанған мекемені ҚР Денсаулық сақтау министрлігінің Қазақ дерматология және инфекциялық аурулар ғылыми орталығы марапаттап, алғысын білдірді. Сондай-ақ 2023 жылдың қорытындысы бойынша Шымкенттегі ЖИТС орталықтарының қызметін бағалаудың жоғары рейтингтік көрсеткіштері бойынша ҚР ЖИТС-тің алдын алу және оған қарсы күрес жөніндегі 20 орталықтың арасында III орынды иемденді.
Қазіргі уақытта АИТВ-мен өмір сүретін адамдарды тегін антиретровирустық терапиямен (АРТ) қамтуды арттыру мүмкіндігі туып отыр. Орталықтың аккредиттелген зертханасында инфекциядан кейін АИТВ-инфекциясын диагностикалау уақытын қысқартуға мүмкіндік беретін 4 буынды жоғары сезімтал тест жүйелерін пайдалана отырып, жалпы халықты және негізгі топтарды АИТВ-ға тестілеу, мемлекеттік және халықаралық стандарттар ұсынымдарына сәйкес жүргізілетін профилактикалық іс-шаралар жүргізуде. ЖИТС орталығы жоғарыда аталған мақсаттарға қол жеткізу үшін барлық күш-жігерін жұмсауды, сондай-ақ АИТВ-мен байланысты стигма мен кемсітушілікті азайту бойынша жұмыстар жасауда.
