ӘЛЕУМЕТТІК МАҢЫЗЫ БАР АЗЫҚ-ТҮЛІК БАҒАСЫ БАҚЫЛАУДА
Бүгінде бұғаусыз кеткен бағаны ауыздықтау шаралары қарқынды жүргізіліп келеді. Нарық заңдылықтарын ескерсек, базардағы бағаның құбылуын отандық өндірісті дамыту мен жергілікті кәсіпкерлермен етене жұмыс істеу арқылы шешуге болады. Өйткені импорттық тауардың бағасын реттеу мүмкін емес. Сондықтан да елімізде әлеуметтік маңызы бар азық-түлік тауарларын шығаратын кәсіпорындармен бірлесе жұмыс істеп, бағаны тұрақтандыру бойынша бірқатар бастамалар көтеріліп, сәтті жүзеге асып келеді. Бүгінгі материалымызда аталған тақырып турасында кеңінен тарқатуды жөн санап отырмыз.
Шымкент жұртшылығы бір жылда 500 мың тоннаға жуық әлеуметтік маңызы бар азық-түлік тауарларын тұтынады. Қазір қала аумағында халық жиі тұтынатын өнімдерден тапшылық байқалмайды. Әлеуметтік маңызы бар тауарлардың бағасы да бақылауда. Жуырда үшінші мегаполис әкімі Ғабит Сыздықбеков жауаптылармен «Meir-Trade Dirstibution Company» ЖШС-да болып, әлеуметтік маңызы бар азық-түлік тауарлар қоймасының жұмысын қадағалады. Көтерме сауда қызметімен айналысатын ірі дистрибьютор — «Meir-Trade Dirstibution Company» серіктестігінің қоймасы 2 600 шаршы метрді алып жатыр. 2013 жылы іске қосылған нысанда қазір 100 адам жұмыс істейді. Қоймада қант, ұн, қарақұмық жармасы, күнбағыс майы, тұз, макарон және кондитерлік өнімдер сақталады.
Тұрғындар бүгінде ұн, нан, рожки, күнбағыс майы және тауық жұмыртқасымен толық қамтамасыз етіліп жатыр. Қалған тауарларды қаламызға «Каис Инвест», «Ас-Ан» кәсіпорындары, «Сидельников» жеке кәсіпкерлігі, «Прима Дистрибьюшн» және «Meir-Trade Dirstibution Company» серіктестіктері секілді ірі дистрибьютерлік желілер жеткізіп отыр. Қала әкімі жауаптыларға тауарларды жеткізу барысында өзекті мәселелерді дер кезінде шешіп, бағаны тұрақтандыру тетіктерін назарда ұстауды тапсырды. Сондай-ақ сауда-логистикалық орталығында салынып жатқан көкөніс сақтау қоймасына инвестициялық-субсидиялау бағдарламасы шеңберінде мемлекеттік қолдау көрсету бойынша нақты тапсырмалар жүктеді.
Ж.БАЛАУСА.
