Маңызды

Түркістан облысына қарасты Сарыағаш ауданының әкімі Мұхит Баймұханбетұлы Ақжар ауылдық округінің тұрғындарымен кездесті. Кездесуде аудан басшысы ағымдағы жылы аудан көлемінде атқарылған жұмыстарға тоқталып, алдағы жоспарларды баяндады.

Кездесу барысында «Біздің мақсатымыз – сіздермен еркін пікір алмасып, маңызды мәселелерді талқылау. Себебі ауыл мәселесін сіздерден артық білетін ешкім жоқ. Айта кетсем, ауданымыз туризм және аграрлық салада аса қарқынмен дамуда. Кешегіде Түркістан қаласында өткен «Алтын күз-2022» мерекесінде жүлделі орын алғанымыз осының дәлелі. Алдағы уақытта да аудан көлемінде ауылдарды дамыту жұмыстары қарқынмен жалғасатын болады» деді Мұхит Баймұханбетұлы. Кездесуде тұрғындар тарапынан ортақ мал жайылымы, каналды бетондау, электр энергиясы, ағын су және ауыз су, табиғи газ мәселелері бойынша сұрақтар қойылып, өтініштер айтылды. Әр тұрғынның мәселесін мұқият тыңдаған аудан басшысы әрбір ұсыныс пен өтініш хаттамаға енгізіліп, алдағы уақытта тиісті жұмыс жүретінін айтты. Ашық пікір алмасу өтіп, күрделі мәселелердің түйіні тарқатылды.
Ақжар елді мекенін ауыз сумен қамтамасыз етіп отырған мембрана қондырғысында ауыз су сүзгісінің істен шығуы өзекті мәселенің біріне айналған болатын. Бүгінгі таңда қондырғыдағы 6 дана су сүзгіштері ауыстырылып, елді мекенге ауыз су беру қалпына келтірілді. Ағымдағы жылы Бағыс елді мекендегі қолданыстағы №23 Ғ.Мұратбаев мектебінің қосымша ғимараты апаттық жағдайда, ал негізгі ғимаратының сыйымдылығы төмен болуына байланысты жаңа 300 орындық мектептің құрылыс жұмыстары мердігер мекеме тарапынан жүргізілуде. Құрылыс жұмыстары келесі жылға өтпелі.
Сонымен қатар Ақжар елді мекеніндегі Д.Қонаев, Ешмат ата, О.Тұрғанбек көшелеріндегі 135 дана жарықшамдарды ағымдағы жөндеуден өткізу үшін бюджеттен қаржы бөлінді. Алдағы аптада мердігер мекеме тарапынан жөндеу жұмыстары басталып, ағымдағы жылдың желтоқсан айының соңына дейін жөндеу жұмыстарын аяқтау жоспарлануда.

Бүгінде Шардара ауданында 5 балық өңдеу зауыты жұмыс істейді. Аталған кәсіпорындар 420 адамды жұмыспен қамтып отыр. Сондай-ақ зауыттар жылына 5600 тонна балық өнімдерін өңдеп, 5,5 млрд теңгенің өнімін экспорттайды. Бұл туралы Шардара ауданының әкімі Қайрат Жолдыбай брифингте мәлімдеді.

Сондай-ақ балық өндірісі бойынша сырттан тасымалданатын шикізатқа тәуелділікті азайту, өнімділікті артыру мақсатында биыл құны 380 млн теңгені құрайтын 5 жоба жүзеге асқан. 2023 жылы жылына 1700 тонна балық өнімдерін өндіретін 13 жобаны іске қосу жоспарланып отыр. Жоба құны — 1 млрд 710 млн теңге. «Биылғы 10 айда өнеркәсіп өнім көлемі 12 млрд 196,6 млн теңгеге жетті. Ал өңірге тартылған инвестиция көлемі 18 млрд 178,8 млн теңгені құрап, өткен жылмен салыстырғанда 26,1%-ға өсіп отыр. Сондай-ақ Шардара ауданында есепті кезеңде 56 млрд 828 млн теңгенің ауыл шаруашылығы өнімі өндірілді» деді Қайрат Жолдыбайұлы.
Инфрақұрыммен қамту бойынша аудандағы 25 елді мекеннің 10-ы және Шардара қаласының 3 шағынауданы, яғни аудан тұрғындарының 55,4% табиғи газбен қамтамасыз етілген. 2023 жылы тұрғындарын табиғи газбен толық қамту жоспарланып отыр. Автомобиль жолдары саласында биыл жергілікті бюджеттен қаржы бөлініп, Шардара қаласындағы 21,2 шақырымды құрайтын 29 көшеге орта жөндеу және тас төсеу жұмыстары жүргізілуде. Жалпы жұмыстардың нәтижесінде аудан бойынша қанағаттанарлық жағдайдағы жолдардың үлесі жыл соңына дейін 76,9%-ға жетпек.

Сайрам ауданының агроөнеркәсіп саласында биылғы жылдың 10 айында 108 млрд теңгеден астам өнім өндіріліп, былтырғы жылдың осы кезеңімен салыстырғанда 4,5 млрд теңгеге артқан. Бұл туралы Сайрам ауданының әкімі Ұласбек Сәдібеков брифингте мәлімдеді.

Биыл Ауыл шаруашылығы, тамақ және өңдеу өнеркәсібі қызметкерлері күніне арналған «АLTYN KÚZ -2022» салтанатты мерекесінде Сайрам ауданы «Агроөнеркәсіп кешенін даму көрсеткіштерін орындау» бойынша облыста көш бастаған болатын. «Жалпы өңірлік өнім көлемі биылғы 10 айда 202 млрд теңгеге жетті. Жалпы өнімнің 53 пайызы — ауылшаруашылығы саласына тиесілі болса, 24 пайызы — өнеркәсіп саласының, ал 5,8 пайызы — құрылыс саласының үлесінде. «Бір жерден бір жылда екі рет өнім алу» жобасы биыл 306,2 гектарға жетті. Өңдеу өнеркәсіп саласында 41 млрд теңгенің өнімі шығарылып, облыс бойынша аудан 2-орында» деді аудан басшысы.
Аудан экономикасына жыл басынан 32,9 млрд теңгеге инвестиция тартылған. Инвестиция тарту көрсеткіші бойынша облыс көлемінде аудан 3-орында тұр. Инфрақұрылым бойынша, табиғи газбен қамту көрсеткіші 73,8%-ға жеткен. 2023 жылы аудан халқын газбен қамтамасыз ету көрсеткішін 88%-ға, ал 2024 жылы 100%-ға жеткіземіз деп жоспарланған. Сонымен қатар аудан көлеміндегі 1 298,1 шақырым автокөлік жолдардың 59,9%-ы қанағаттанарлық жағдайда. Қазіргі таңда 12 ішкі көше орташа жөндеуден өтіп, аудандық маңызы бар 4 автомобиль жолында күрделі жөндеу жұмыстары жалғасып жатыр. Нәтижесінде, жыл соңында пайдаланымдағы жолдардың қанағаттанарлық жағдайдағы үлесі 61,6%-ға жеткізілмек.

Сайрам ауданында Қ.Жандарбеков атындағы аудандық мәдениет үйінде күзгі жиын-терімді қорытындылау және ауыл шаруашылығының еңбеккерлерінің құрметіне орай, «Алтын күз — 2022» мерекелік іс-шарасы аталып өтілді. Іс-шараға келген қонақтар мен тұрғындар мәдениет үйінің кіреберісінде ауыл шаруашылығы өнімдерінің көрмесі мен ауыл шаруашылығының биылғы жетістіктері туралы дайындалған арнайы бейнероликті тамашалады.

Содан кейін Ұлы Жібек жолы бойынан сауда, мәдениет пен өнер адамдарының өңірден жүріп өткен керуеннің көші мен тарихы сахналанды. Іс-шараға қатысқан аудан әкімі Ұласбек Сәдібеков ауданның ауыл шаруашылығы және кәсіпкерлік саласында елеулі үлес қосқан сайрамдықтарды құттықтап, марапаттады. «Құрметті ауыл шаруашылығының еңбеккерлері! Бүгін ауданымызда «Алтын күз — 2022» дәстүрлі мерекесі аталып өтуде. Көктем шыға кетпенін күнге сүйдіріп, еңбектенген шаруалар ала жаздай алқабын баптап, қоңыр күзде жиын-терімнің қызу уақытында жылдық азығын еселеп, еңсеріп алды. Бұл еңбеккерлеріміз үшін молшылық айы болып саналады. Егінін жинап, төл басын көбейтіп, еңбегінің жемісін, табиғаттың сарқылмас сыйын көретін де осы шақ. Өйткені төккен тер мен еткен еңбектеріңіз көп. Бұл ретте, игі дәстүр бойынша «Алтын күз» мерекесі ауданымызда аталып өтуде. «Алтын күз» тек той тойлау ғана емес, еткен еңбектің есебін де беретін кез. Биылғы жыл сайрамдықтар үшін табысты болды. Аудандағы басты сала агроөнеркәсіп кешені тұрақты дамуда. Соңғы 3 жылда 1,2 есеге артық өнім өндірілген» деді аудан әкімі.
Сайрамда 2022 жылдың 10 айында 108 млрд теңгеден астам өнім өндіріліп, былтырғы жылдың осы кезеңімен салыстырғанда 4,5 млрд теңгеге артық өнім алынған. Жаңадан 103,3 га жерге тамшылатып суғару жүйесі ендірілсе, 10,4 га жерге жылыжайлар салынып, 35 га жерге қарқынды бау егілді. Биыл егіс көлемі 52,8 мың гектарға жеткізілді. Шаруалар тарапынан күздік бидай, арпа толығымен жиналып біткен. Былтыр «Бір жерден бір жылда екі рет өнім алу» жобасы 280 гектарда жүзеге асырылса, биыл бұл көрсеткіш 306,2 гектарға жетті. Агроөнеркәсіп кешенінде жалпы 75 жұмыс орнымен қамтылған 2,7 млрд теңгелік 4 жоба іске қосылды. Аудандағы 68 өнеркәсіп кәсіпорынмен 47,9 млрд теңгенің өнімі өндіріліп, былтырғы жылға қарағанда 12,2 млрд теңгеге артық өнім өндірілген. Оның ішінде өңдеу саласы дамып келеді. Өңдеудің өнеркәсіп саласындағы үлесі 86%-ға жетті, яғни 41 млрд теңгенің өнімі шығарылды. Жалпы, өнеркәсіп саласының тұрақты дамуын қамтамасыз ете отырып, жыл қорытындысымен өнім көлемін 52,7 млрд теңгеге жеткізу мақсатында жұмыс жүріп жатыр. Мемлекет басшысының Жолдауында халықтың көкейінде жүрген өзекті әлеуметтік-экономикалық мәселелер бойынша нақты тапсырмалар берген болатын. Соның бірі кәсіпкер жастарға 2,5%-бен шағын несие беру бағытында жастардың іскерлік бастамаларына қайтарымсыз 161 азаматқа мемлекеттік грант берілді. Ауданда, әсіресе, ауыл шаруашылық бағытында кәсіпкерлік дамып жатыр. Жұмыс істеп тұрған кәсіпкерлік субъектілердің саны 17 мыңнан асты. Салада 26 мыңнан астам адам жұмыспен қамтылып, 156,1 млрд теңгенің өнімі өндірілді. Көрсеткіштердің өсімі сақталды.
«Бизнестің жол картасы 2025» бағдарламасы аясында 175 млн теңгелік 2 жоба, «Қарапайым заттар экономикасы» бағдарламасымен құны 240 млн теңгелік 4 жоба қаржыландырылған, микрокредиттік ұйымдар арқылы 2494 адам 1,9 млрд теңгеге несиеленді. Аудан еңбеккерлерінің жемісті еңбегі облыс көлемінде бағаланып, ауыл шаруашылығы еңбеккерлерінің «ALTYN KÚZ — 2022» мерекесінде жыл қорытындысымен аудан екінші жыл қатарынан үздік болып танылды. Атап айтқанда, агроөнеркәсіп кешенін даму көрсеткіштерін орындаудан 1-орын, сонымен қатар ет өнімдерін экспорттаудан, сүт өндіруден және ауыл шаруашылығы өнімдерін қайта өңдеу саласын дамытудан озат аудан деген облыс әкімінің арнайы дипломымен марапатталды. Сондай-ақ облыс марапаттарының ішінде ет өнімдерін экспорттаудан озат агроқұрылым «Туран Агро Ет-Сүт» АШӨК және озат мал бордақылаушы «Курбантай ата» шаруа қожалығы болды. Сайрам ауданында игерілмеген шаруашылық пен кәсіп жоқ. Шара барысында ауыл шаруашылығы саласында елеулі еңбегімен танылған ауыл еңбеккерлері мен кәсіпкерлерді марапаттау рәсімі өтті. Іс-шарада өнерпаздар барша қауымға әсем ән шашып, тамаша көңіл-күй сыйлады.

Түркістан облысы әкімінің жанындағы әйелдер істері және отбасылық-демографиялық саясат жөніндегі комиссия отырысы өтті. Мәжілісті комиссия төрағасының орынбасары Динара Егамбердиева жүргізіп отырды. Комиссия отырысына облыс әкімі жанындағы әйелдер істері және отбасылық-демографиялық саясат жөніндегі комиссия мүшелері, басқарма өкілдері және аудан, қала комиссия төрағалары мен мүшелері қатысты.

Жиында дәріханалық нашақорлық және синтетикалық есірткінің мектеп пен студент жастар арасында таралуы қаупі, әке институтын нығайту және отбасылық тәрбиеде әкенің рөлін арттыру жөніндегі шаралар туралы талқыланды. Синтетикалық есірткіні тұтынудың артуы ұлт денсаулығына үлкен қауіп төндіретіні жайлы айтылды.
Нашақорлық проблемасы әлемдік қоғамдастықта өзекті болып қалуда және оның салдары ретінде жастар мен жасөспірімдер арасында есірткіні пайдаланумен байланысты ахуал барлық елдер үкіметтерінің алаңдаушылығын арттырып отыр. Елімізде жыл басынан бері есірткіге қатысы 600-ге жуық әкімшілік құқық бұзушылық әрекет анықталған. Жиында сондай-ақ бүгінгі таңда отбасы тәрбиесіндегі әкенің рөлін арттыру жолдары талқыланды. Әке институтын нығайту арқылы балалардың бойында патриоттық сезімді, рухани-адамгершілік құндылықтарды қалыптастыру жұмысын күшейтуге болады. Отбасының қалыптасуында, балаларды тәрбиелеу мен дамытуда, ерлердің мінез-құлқын қалыптастыруда әкелер үлкен рөл атқарады.
Жиналыс соңында жауапты басқармалар мен аудан әкімдіктеріне бірқатар ұсыныс беріліп, орындалуы бақылауға алынды.

Түркістан облысына қарасты Төлеби ауданының орталығы Ленгір қаласында 180 пәтерлі 9 көпқабатты тұрғын үйдің құрылысы жүріп, былтыр оның 6-ы пайдалануға берілді. Нәтижесінде 7316 шаршы метр ел игілігіне тапсырылды. Ал қалған 3 тұрғын үй биыл желтоқсан айында пайдалануға беріліп, 3 658 шаршы метр тұрғын үй тапсырылмақ. Бұл туралы өңірлік коммуникациялар қызметі алаңында өткен брифингте аудан әкімі Төлеген Телғараев мәлімдеді.

Брифингте мәлім болғандай, экономиканың басты көрсеткіші саналатын жалпы өңірлік өнім көлемі 2022 жылдың 10 айында аудан бойынша 109 млрд 948 млн теңгеге жетіп, өткен жылмен салыстырғанда өсім 2,5%-ға артқан. Аймақта 2 ірі, 15 шағын және 3 қосалқы кәсіпорындар жұмыс істеп тұр. Өнеркәсіп саласында 2022 жылдың басынан 35 млрд 687 млн теңгенің өнімі өндірілген. «Негізгі капиталға бағытталған инвестициялар көлемі есепті кезеңде 14 млрд 624 млн теңгені құрады. Бизнестің әлеуметтік жауапкершілігі аясында аудан әкімдігі мен «SHYMKENTCEMENT» АҚ арасындағы үш жақты меморандумға сәйкес, 10 айда 21 шақырымды құрайтын Ақбастау, Киелітас, Алғабас елді мекендерін түнгі жарықтандыру жұмыстары толық аяқталды» деді Төлеген Тұртайұлы.
Жалпы аудан бойынша экономикалық белсенді халық саны — 48,6 мың адам. Жұмыспен қамтылғандар саны — 46,2 мың. «Биыл ауданда тұрақты жұмыс орындарына жалпы 1700 азаматты жолдау жоспарланып, 1 957 азамат жұмыспен қамтылды. Жастар практикасына оқу орнын тәмамдаған жас түлектерді тәжірибе алу мақсатында 300 орын жоспарланып, аудандағы 54 мекемеге 306 азамат жолданды. Ал «Алғашқы жұмыс орны» жобасы аясында нақты 38 азамат мекемелерге жолдама алды. Сонымен қатар, 200 АЕК мөлшеріндегі грантты 173 азамат алып, барлығы өз кәсіптерін жүргізуде» деді аудан әкімі.
«Ауыл – Ел бесігі» жобасы аясында 2022 жылы 6 елді мекенде 6 жоба іске асырылуда. Сонымен қатар ауданның инженерлік инфрақұрылым жүйесін дамыту мақсатында 19 бюджеттік инвестициялық жоба жүзеге асырылып жатыр. Сондай-ақ аудан орталығында №3 кәріз-тазарту құрылыс жұмыстары басталды. «Биыл тұмса табиғатымен талайларды таңғалдырған Төлеби ауданына 90 жыл толып отыр. Аудан тұрғындарының тұрмыстық жағдайын жақсарту мақсатында көптеген жобалар жүзеге асырылып келеді. Мұнда туризмді дамытуға мүмкіндік мол. Бұл сала айтарлықтай дамып келеді. «Қасқасу» туристік-рекреациялық кешенінің инженерлік-коммуникациялық желілерінің құрылыс жұмыстары жүргізілуде. Биыл ауданда екі мектеп бой көтерді. Мемлекет басшысының арнайы тапсырмасы аясында «Жайлы мектеп» пилоттык ұлттық жобасы әзірленуде. Жоба аясында Ленгірде 1500 орындық, Бірінші Мамырда 1500 орындық, Достықта 900 орындық, Көксәйекте 600 орындық, сондай-ақ Қосағашта 600 орындық жаңа мектептердің кұрылысы жоспарлануда» деді аудан әкімі.

Түркістан облысының әкімі Дархан Сатыбалды Венгрияның Қазақстандағы төтенше және өкілетті елшісі Отто Иван Ронамен кездесті. Өңір басшысы Қазақстан мен Венгрия арасындағы байланыстың жоғары деңгейде екенін айта келе Венгрия инвестициясын тартуға, екі жақты қарым-қатынасты тереңдете түсуге мүдделі екенін айтты.

Жиында «Түркістанға қош келдіңіз! Бүгін біздің облыс пен Венгрия арасындағы екіжақты қарым-қатынастарды дамытуға қатысты пікір алмасуға жақсы мүмкіндігіміз бар. Өздеріңіз білетіндей, 2018 жылғы Түркістан облысы құрылды, оның әкімшілік орталығы Түркістан қаласы болып бекітілді. Қалаға облыс орталығы мәртебесін беру қалаға ғана емес, бүкіл өңірге инвестиция тартуға айтарлықтай серпін берді. Нәтижесінде өткен жылы инвестиция көлемі 60%-ға өсіп, 1,7 млрд АҚШ долларын құрады. Біз Венгрия инвесторларын қарсы алуға, бірлесе жұмыс істеуге дайынбыз. Бұл ретте «TURAN» арнайы экономикалық аймағы құрылып жатыр. Ауыл шаруашылығы бойынша өңірдің әлеуеті зор. Инвестициямен қатар мәдениет, білім салаларында да әріптестік орнатуды жөн деп білемін. Осындай кездесулер арқылы байланыстар көкжиегі кеңейе түседі» деді Дархан Сатыбалды.
Венгрияның Қазақстандағы төтенше және өкілетті елшісі Отто Иван Рона да Түркістандағы мүмкіндіктерді қарастырып, өз елінің бизнес өкілдеріне мәлімет ұсынатынын жеткізді. «Жаңа Қазақстанды құру үрдісі жүріп жатқанын білеміз. Түркістанның тарихи рөлі туралы да хабардармыз. Жалпы Венгрия мен Қазақстанның тарихында ортақ дүниелер бар. Арнайы экономикалық аймақтарыңыз бен ұсынылатын мүмкіндіктер туралы толық ақпарат берсеңіздер оны зерделеуге дайынбыз. Әрине, бизнеске тікелей әсер ете алмаспыз, бірақ екі ортада байланыс орнатушы ретінде инвестиция салуға да, тартуға да ниеттіміз. Біз ақпараттық технология, ауыл шаруашылығы, фармацевтика, балық шаруашылығы, жүгері шаруашылығы, құс фабрикаларын дамыту бойынша ұсыныстар бере аламыз деп ойлаймын. Келесі кездесуімізде нақты ұсыныстарды қарастырып, келісім жасаймыз деген сенімдемін» деді Венгрия елшісі. Кездесу соңында екі тарап естелік сыйлықтар алмасып, екіжақты байланысты нығайта түсу жөнінде уағдаласты.

Түркістанда «Ардагерлер ұйымы» республикалық қоғамдық бірлестігінің 35 жылдығына арналған мерекелік іс-шара өтті. Алдымен қоғам қайраткері Асанбай Асқаровтың өмірінен сыр шертетін «Алаш рухты азамат» атты кітаптың таныстырылымы өтті. Кітапта ұлтын сүйген перзенттің болмысын ашатын дүниелер, естеліктер енгізілген.

Іс-шара аясында қоғам қайраткері мен ардагерлерге арналған көрме ұйымдастырылды. Өңір ардагерлерін құттықтауға облыс әкімі Дархан Сатыбалды арнайы келіп, құрметін көрсетті. Жиын барысында «Мемлекет басшысы Қасым-Жомарт Тоқаев өз Жолдауларында аға буынға қолдау көрсету мәселесін үнемі назарда ұстап келеді. Түркістан облысында 180 мыңға жуық зейнет жасындағы қарттарымыз бар. Олар қоғамды дамыту жолында үлес қоса білді. Өздеріңіз білетіндей, Түркістан облысын құру жөніндегі жарлықтың шыққанына 4 жылдан аса уақыт болды. Осы уақыт көлемінде өңірімізде ауқымды жобалар қолға алынды. Құрылыс жұмыстары қарқынды жүріп жатыр. Бірақ жылдар бойы кезең-кезеңімен жалғасатын ең маңызды жұмыс бар. Ол – руханият. Бүгінгі таңда облыстық ардагерлер ұйымы осы мақсатта жемісті еңбек етіп жүр. Біз әрқашан қарттарымызды құрметтеп, ардагерлерімізді ардақтау арқылы жарқын болашаққа бет аламыз. Бүгінгі мерекелік жиынды пайдаланып, еліміздің дамуына қосқан үлестеріңіз бен үлгі-өнегелеріңіз үшін алғысымды білдіремін. Облыс руханиятының жандануы жолындағы барлық бастамаларыңызға сәттілік, дендеріңізге саулық тілеймін!» деген облыс әкімі өңірдің дамуына үлес қосып жүрген ардагерлердің бірқатарын марапаттады.
Мерекелік жиында еңбегімен дараланған ақсақалдар мен ел аналарына облыстық мәслихат хатшысы Қайрат Балабиев пен «Ардагерлер ұйымы» республикалық қоғамдық бірлестігінің Түркістан облыстық филиалының төрағасы Жеңісбек Мәуленқұловтың да алғыс хаттары тапсырылды. Жеңісбек Мәуленқұлов Ардагерлер кеңесінің атқарған жұмыстарына тоқталып, елді бірлікке, жастарды отансүйгіштікке шақыру бағытындағы тірліктерді баяндады. Игі іс-шара мерекелік концертпен жалғасын тапты.
1987 жылы Алматыдағы құрылтай аясында Қазақстанның ардагерлер ұйымы құрылған болатын. Биыл еліміздегі ең үлкен әрі аса маңызды қоғамдық бірлестіктің құрылғанына 35 жыл толып отыр. Ұйымның негізгі мақсаты – ардагерлердің құқықтарын қорғау, лайықты әлеуметтік-тұрмыстық жағдайын қамтамасыз етуге ықпал жасау, оларға мәдени, медициналық және басқа да көмек түрлерін жақсартуға жәрдемдесу, жастарды отаншылдыққа тәрбиелеу.

Бұл туралы бүгін Өңірлік коммуникациялар қызметінде Жетісай ауданының әкімі Мұрат Қадырбек 10 айда атқарылған жұмыстардың қорытындысы туралы өткен брифингте айтты.

Аудан басшысы өз сөзінде «Биылғы жылдың 10 айында Жетісай ауданында өңірлік өнім көлемі 133,8 млрд теңгені, өнеркәсіп өнімінің көлемі 9,8 млрд теңгені, өңдеу өнеркәсібіндегі өнім көлемі 7,7 млрд теңгені құрады. Ал негізгі капиталға бағытталған инвестиция 11,7 млрд теңгені құраса, бөлшек сауда 16,8 млрд теңгеге жетті. Бұдан бөлек, аудандағы шағын және орта кәсіпкерлік субъектілерінің саны 18 534 бірлікке жетіп, өткен жылдың тиісті мерзімімен салыстырғанда 3039 субъектіге артты. Кәсіпкерлік нысандарда 21 386 азамат жұмыспен қамтылып, салада 49,6 млрд тенгенің өнімі өндірілді» деді. Спикердің сөзінше, «Ырыс» МҚҰ арқылы жыл басынан бері 132 кәсіпкерге 431,2 млн теңге несие берілген. Оның жалпы суммасы 105,5 млн теңгені құрайтын 11 жобасы мал шаруашылығы мен шағын кәсіпкерлік саласын дамыту бойынша болса, 325,7 млн теңгені құрайтын 121 жоба көктемгі егін егу және жинау жұмыстарына арналған.
Сондай-ақ екінші деңгейлі банктер арқылы «Бизнестің жол картасы 2025» және «Қарапайым заттар экономикасы» мемлекеттік бағдарламалары аясында 1,4 млрд теңгеге қоғамдық тамақтану орындарын, балабақша, қонақ үй, бизнес нысандарын дамытуға, одан бөлек жиһаз өндірісі, ет өндірісі, полиэтилен мен жемісті қайта өңдеу сынды жобалар қаржыландырылған. Сонымен қатар, «Еңбек» мемлекеттік бағдарламасы аясында 7306 азамат тұрақты және уақытша жұмыстармен қамтылса, 344 азамат әлеуметтік жұмыс орындарына, 81 азамат алғашқы жұмыс орындарына, 887 жас жастар практикасына, 2273 тұлға ақылы қоғамдық жұмыстарға, 25 адам «Ұрпақтар келісім шарты» және «Күміс жас» жобалары аясында жұмысқа жолданған.

Мемлекет басшысының Түркітілдес елдерді біріктіретін арнайы экономикалық аймақ құру туралы тапсырмасы аясында Түркістан қаласында «TURAN» арнайы экономикалық аймағы құрылмақ. Ол қолданыстағы «TURKISTAN» арнайы экономикалық аймағы аумағында құрылатын болады.

«TURAN» АЭА аумағында қолданыстағы заңнамада шектеу қойылған қызмет түрлерінен басқа экономикалық қызмет түрлерінің «өңдеу өнеркәсібі» секциясына жататын қызметтің барлық түрі қамтылады. Аймақта халықаралық, өңірлік стандарттары және дауларды шешуде британдық құқықты қолдану мүмкіндігі қарастырылған. Түркістан облысының әкімі Дархан Сатыбалды маңызды жобаның жүзеге асыру барысын талқылау мақсатында жауапты сала басшыларының басын қосты. «Біздің басым бағыттарымыздың бірі – өндіріс және жұмыс орындарын ашу. Осы бағытта бар мүмкіндікті қарастырамыз. Бұл ретте Түркі мемлекеттерінен де инвестиция тартудың маңызы зор» деді жиын барысында өңір басшысы.
Қараша айында Самарқанд қаласында Түркітілдес Мемлекеттер Ұйымына мүше елдердің мемлекет басшыларының қатысуымен өткізілген Саммитінде «TURAN» АЭА құру туралы Қазақстан Республикасының бастамасы барлық мүшелер тарапынан қолдау тапты. Негізгі мақсат – Түркістан қаласын жеделдете дамыту және Түркістан қаласының инвестициялық әлеуетін жоғарылату. Оның аумағы 4 гектарды құрап, 6 қосалқы аймақтан тұрады. Олар – Тарихи орталық, Әкімшілік-іскерлік орталық, Greenfield (Оранғай ауылы), Brownfield өнеркәсіптік қосалқы аймағы (Кентау қаласы) және Түркістан қаласы мен халықаралық әуежай аумағы.
Облыста 2022-2026 жылдар аралығында жүзеге асырылатын жалпы құны 1,9 трлн теңгеге 9596 жаңа жұмыс орынын құрайтын 71 инвестициялық жобаның тізбесі қайта өзектендірілді. Оның ішінде шетелдік капиталдың қатысуымен жалпы құны 225,6 млрд теңгеге 915 жұмыс орнын құрумен 9 жоба бар. Жыл соңына дейін жалпы құны 29,9 млрд теңгеге 1197 жұмыс орнын құрумен 25 инвестициялық жобаны жүзеге асыру жоспарланған. Қазіргі уақытта жалпы құны 17,7 млрд теңгеге 1 мыңға жуық жұмыс орнын ашумен 18 инвестициялық жоба іске қосылды. Одан бөлек, облыста өңдеу өнеркәсібін дамыту үшін жалпы құны 1,4 трлн теңгеге 3595 жұмыс орнын ашатын ірі инвестициялық жобалар жүзеге асырылуда.