Маңызды

Жылдағы дәстүр бойынша Шымкентте жаңажылдық бас шыршаның шамы жағылды. Жұрт жақсылық пен жылымық күтетін Жаңа жыл мерекесінің басты нышаны болып табылатын бұл бас шырша Шымкенттің Әл-Фараби алаңына орнатылды. 

Бас шырша 120 дана әсем ойыншықтармен, 150 дана алтын шармен және 1000 метр көздің жауын алатын шамдармен безендірілген. Мерекелік шара қала әкімі Ерлан Айтахановтың қатысумен өтті. Өз кезегінде ол қала тұрғындарына игі тілектер айтты. Салтанатты шараның куәсі болған қала тұрғындарының ішінде балалар да болды.
Шара соңы концерттік бағдарламаға ұласты. Онда жүздеген өнерпаздар ән айтып, әдемі би биледі. Түрлі образдағы ертегі кейіпкерлері де балаларды шат-шадыман көңіл-күйге бөледі.
Әл-Фараби алаңындағы бұл бас шырша үшін бюджеттен 14 млн. теңге жұмсалған. Бұл деректі Otyrar.kz жариялады.

С. НҰРАЙ.

Ал, Әбдірахымовтың «жыл аяғына дейін мың автобус келеді» дегені құр сөз болды ма?

Осы аптада Шымкент қаласының әкімі Ерлан Айтаханов Нұр-Сұлтандағы орталық коммуникациялар қызметінде өткен брифингте ағымдағы жылдың 11 айында атқарған жұмыстарын қорытындылады.

Бас қалада болған баспасөз конференциясында Ерлан Қуанышұлы біраз сандарды сөйлетті. Атқарылған жұмыстарды тарқатып айтты. Шыны керек, әкімнің орындалған жұмыстарға емес, алдағы уақытта атқарылатын тірліктерге екпін түсіруі көп байқалды. Солардың бірі келер жылы Шымкенттегі Бадам өзенінің бойынан Диснейлендтің салынатындығы. Жобаны Сингапурден келген инвестор іске асырады. Қазіргі таңда олар құны 20 млрд. теңгені құрайтын бұл жобаны бірлесе атқаратын серіктес іздестіруде екен. Естеріңізде болса, дәл осы Диснейлендтің 2019 жылы салынатындығы туралы былтыр сол кездегі қала әкімі Ғабидолла Әбдірахымов нақ осы орталық коммуникациялар қызметінде өткен жиында кеуде кере мәлімдеген болатын. Бірақ 2019 жылы диснейлендтің салынуы былай тұрсын, қазығы да қағылмағаны айдан анық. Сонымен қатар, Әбдірахымов осы жылдың басынан бастап халықпен өткен қаншама кездесулерде қоғамдық көліктің ескіргендігіне де, ондағы сапаның жоқтығына да шағым айтқан сан жұртты жыл аяғына дейін қалаға 1000 жаңа автобустың жеткізілетінін айтып, жұбатқаны есімізде. Бірақ ол сөз де өз үдесінен шықпағанын төреші уақыт көрсетіп отыр. Биыл үшінші мегаполиске келеді деген сол мың автобустың тек 300-і ғана жеткізілді. Ал қалғаны ше?
Бұл сұраққа Ерлан Айтаханов елордада болған баспасөз конференциясында нақты жауап берді. Өз кезегінде ол қалада жолаушыларды тасымалдайтын 25 компанияда 1621 автобустың бар екенін, бірақ олардың 60 пайызы ескіргенін айта келе, «Жолаушыларға қызмет көрсету сапасын жақсарту үшін ағымдағы жылы 300 жаңа автобус алынды. Бұл жерде Нұр-Сұлтан қаласының тәжірибесі қолданылады. Алдағы жылы арнайы мамандармен бірлесе жұмыс тобы құрылып, жол картасы бекітілді. Келер жылы көлік саласының даму схемасы әзірленеді. Және 2020 жылы 590 жаңа автобус алынады»,-деді.
Сонымен қатар ол, келер жылдан бастап Түркістан облысында өндірілетін мақта өнімінің 50 пайызы жуырда ғана өзбекстандық инвесторлардың арқасында қайта қосылған Шымкенттегі «Альянс» жіп иіру фабрикасында өңделетінін айтты. Қазіргі таңда бұл көрсеткіш небары 20 пайызды құрайтынын айта кетейік. Алдағы жылы атқарылады деген тағы бір іс жалпы аумағы 306 гектарды құрайтын «Жұлдыз» индустриалды аймағы мен 136 гектарды алатын «Агроиндустриалдық аймақтың» құрылатындығы болды. Әкім «Жұлдыз» индустриалды аймағының болашағы баянды боларына сенімді. Оның сөзінше, аталған аймаққа қазірдің өзінде 20 млрд. теңгеге 1 мыңға жуық жаңа жұмыс орнымен 20 жобаны жүзеге асыруға инвесторлар ниет білдіріп отыр екен.
Бұдан бөлек, мегаполис басшысы 2020 жылы жаңа әуежай терминалының құрылысы аяқталатынын да хабарлады. Сондай-ақ, қаладағы теміржол вокзалының ғимараты қайта қалпына келтіруден өткізілетінін жеткізді. Әкімнің айтқан сөзіне сенсек, келер жылы Шымкентте көлік инфрақұрылымын дамыту мақсатында 2 жерде (Рысқұлов-Қонаев және Бәйдібек би-Арғынбеков көшелерінде) үлкен жолайрықтардың құрылысы басталып, 7 магистралды көше (Республика, Рысқұлов, Гагарин, Сырым батыр, Түркістан, Құрманбеков көшелері мен №1 автожолы) орташа жөндеуден өтіп, 11 көшені кеңейту және 5 көпірді қайта құру жұмыстары жүргізіледі. Қаланың сәулетін арттыратын 2200 орындық Конгресс-холл, Оқушылар сарайы және Медиа-орталық құрылысы бастау алады.
Жиында Ерлан Айтаханов Шымкентте өнеркәсіп саласы өрге басып келе жатқанын айтты. Өз сөзінде ол: «Салада ағымдағы жылы 26 млрд. теңгеге 7 жоба жүзеге асырылып, 389 жаңа жұмыс орындары ашылды. Кәсіпкерлік санмен ғана емес, жаңа технологиямен жабдықталған сапалы өніммен де толығуда. Мәселен, «Рахат Шымкент» ЖШС оңтүстіккореялық компанияның қаржысы есебінен құны 1,8 млрд. теңгеге мармелад өндіру желісін іске қосты. Шымкенттің экономикасына тартылған инвестиция көлемі артып келеді. Қалада жұмыс істейтін 2 индустриалдық аймақтың жерлері 100% игерілді»,-деді.
Әкімнің айтуынша, Шымкентте 2019 жылдың 11 айында өнеркәсіп өнімі 16,4 пайызға, ауыл шаруашылық өнімі 5,5 пайыз, пайдалануға берілген тұрғын үйлер көлемі 15,3 пайыз, бөлшек сауда көлемі 7,1 пайызға артқан.
Баспасөз жиынында әкім өз баяндамасында бұдан өзге де сандарды сөйлетті. Яғни ол, денсаулық сақтау саласы бойынша Шымкентте ана өлім-жітімі 63,6%-ға, қатерлі ісіктен қайтыс болғандар 4,6%-ға, туберкулезден көз жұмғандар саны 6,6%-ға төмендегенін мәлімдеді. Сондай-ақ ол, қаладағы индустриалды аймақтардағы өндіріс орындарынан мемлекеттік бюджетке 16 млрд. теңге көлемінде салық түскенін сүйіншілей жеткізді.

Қ. ҚАЛИЕВ.

P.S. Қателеспесек осы жылдың басында қаланың бас салықшысы Нұралхан Көшеров кәсіпкерлерге көлеңкелі экономикамен күрес күшейетінін ескерткен болатын. Сол кезде ол бұл ескерту тойхана ашып, кәсібін дөңгелетіп жүрген бизнесмендерге тікелей қатысты екенін ашып айтқан. Оған кәсіпкерлердің мүлік салығынан жалтару үшін кәсіпкерлік мақсатта пайдаланатын ғимараттарының құнын айтарлықтай аз көрсетуі, тиісті төлемдер жасауы үшін жалдамалы жұмысшыларының барлығын тіркей бермейтіндігі негіз болған. Бірақ сол ескертуден нақты нәтиже көрсеткендер немесе оған мұрын шүйіре қарағандар туралы ақпараттар ашып айтылмады. Бұл көлеңкелі бизнеспен күрес жұмыстарының қарқын алып, көлемді көрсеткіш болмағанын айқын аңғартатындай. Егер Ерлан Айтаханов немесе оның есепті жілікше шағатын орынбасары Ербол Садыр осы жәйтті бақылауға алса, салыққа түсетін сома да еселене түсер еді…

Түркістан қалалық мәслихатының кезекті 60-сессиясында депутаттар облыс орталығындағы қоғамдық көліктерде жүру бағасын 50 теңгеден 70 теңгеге көтеру туралы ұсынысты бірауыздан қолдады.

Жергілікті билік жұртты жол ақысын 40 пайызға көтеру арқылы халыққа сапалы қызмет көрсету бағытындағы жұмыстар жандана түсетініне бек сендіріп отыр. Қала әкімі Рашид Аюпов жол ақысын көтеру бойынша жергілікті тасымалдаушы компаниялармен тиісті келісім шарт түзілгенін, соның негізінде автобус жүргізушілерінің тізгінде отырып, темекі тартуы, бейәдеп сөздер мен телефонмен тілдесуіне тыйым салынып отырғанын жеткізді. Сонымен қатар ол, келер жылдан бастап қалаға қоршаған ортаға зияны жоқ автобустар келетінін, жолаушыларды тасымалдайтын автобустарды жаңарту, элекронды билет енгізу жұмыстары қолға алынатынын алға тартты.
Естеріңізге сала кетсек, бұған дейін Түркістан қаласы еліміз бойынша жол ақысы ең төмен аумақ ретінде ерекшеленетін. Киелі қалада соңғы рет 2018 жылдың 1-қарашасында жол ақы құны 50 теңгеге көтерілген болатын. Оған дейін ол 40 теңге болған-тын.

Жаңа жыл мерекесін тойлау барысында тұрғындардың пиротехникалық бұйымдарды қолдануы қалыпты құбылысқа айналғаны белгілі. Бірақ мереке ажарын аша түсетін сол бұйымдарды қолдану кезінде жазатайым жағдайлардың да орын алғандығы туралы деректер тіркеліп жатады.

мкент қалалық Төтенше жағдайлар департаменті ағымдағы жылдың 25-желтоқсанынан бастап, 5-қаңтарға дейін күшейтілген режимде жұмыс істейтін болады. Соған сәйкес департамент қызметкерлері төтенше жағдайларды алдын алу бойынша ірі сауда орталықтарында, базарларда кәсіпкерлер мен қала тұрғындарына түсіндіру жұмыстарын жүргізуді бастап кетті.
Бұл туралы Шымкенттегі ақпараттық-коммуникациялық орталықта өткен брифингте қалалық Төтенше жағдайлар департаменті басшысының орынбасары Мадияр Жақсыбаев мәлімдеді.
Өз кезегінде Мадияр Есенгелдіұлы қалалық Төтенше жағдайлар департаменті жыл сайын Жаңа жыл мейрамын тойлау кезінде пиротехникалық заттарды қолдану барысында жазатайым жағдайларды алдын алу бағытындағы іс-шараларды ұйымдастыратынын, осыған орай ағымдағы жылдың 10-желтоқсанынан бастап Шымкент қалалық полиция департаментімен бірлесіп, қала аумағында болуы мүмкін төтенше жағдайларды алдын алу бойынша бірлесіп әрекет ету бұйрығы шығарылғанын, соған сәйкес тиісті іс-шаралар екі кезеңде өткізілетінін айтты. Бірінші кезеңде ірі сауда үйлері мен базарларда, халық нөпірі көп аумақтарда үгіт-насихат жұмыстары жүргізіледі. Пиротехникалық бұйымдарды сақтау кезінде қауіпсіздікті қамтамасыз ету шаралары пысықталады. Екінші кезеңде қалалық тәртіп сақшыларымен бірлесіп пиротехникалық заттарды сататын базарлар мен ірі сауда орындарында рейдтік іс-шаралар өткізіледі. Қазіргі таңда бұл бағыттағы жұмыстар басталып, қаладағы «Бекжан», «Алаш», «Айна», «Акбар», «Орталық Қырғы базары» мен «Магнум», «Баян сұлу», «Мега орталық», «Метро» сынды сауда үйлерінде рейдтік іс-шаралар ұйымдастырылған.

Сонымен қатар
Мадияр Есенгелдіұлы:
– Қазіргі таңда қала аумағында Жаңа жыл мерекесін өткізетін 528 орын мен 1 президенттік шырша өткізетін алаң белгіленген. Оның біреуі алаң болса, 504-і білім беру нысаны, 10-ы мәдени ошақ, 8-і ойын-сауық орны, 3-уі интернат, 2-уі балалар үйі болып табылады. Аталған орындардың барлығында қауіпсіздік жұмыстары жүргізіліп, кезекшіліктер ұйымдастырылды,-деді.
Дей тұрғанмен, брифинг барысында Мадияр Есенгелдіұлы рейдтік жұмыстар кезінде пиротехникалық бұйымдарды лицензиясыз сату деректері қандай сауда орындарында анықталып жатқандығы туралы жақ ашпады. Ол бұл туралы нақты мәліметтерді алдағы уақытта қосымша хабарлайтынын тілге тиек етті. Және де ол «Пиротехникалық заттарды тұрғындар мына базардан немесе сауда үйлерінен алғаны дұрыс» деп шорт кесіп айта алмайтынын, қауіпсіздікті алдын алу үшін ең дұрысы, сатып алушы саудагерден лицензия талап етуі қажеттігін ескертті.
Сөз соңында аталған департамент берген дерекке сүйеніп, 2017-2018 жылдары Шымкентте Жаңа жыл мерекесін тойлау кезінде пиротехникалық заттарды пайдалану бойынша жазатайым оқиға тіркелмегенін айта кетейік.

Ж. АРМАНОВА.

Жаңа жыл қарсаңында Шымкентте көзайым жаңалықтардың қатары әдеттегіден арта түсті. Солардың қатарында «Нұрсәт» шағынауданында 240 орындық жатақхананың ашылуы болды. Нысан Оңтүстік Қазақстан мемлекеттік педагогикалық университетіне тиесілі. Енді онда аталған оқу орнының жаратылыстану факультетінің студенттері жайғасатын болады. Жатақхана Елбасының бес әлеуметтік бастамасы бойынша салынып, пайдалануа беріліп отыр.

Ғимараттың салтанатты жағдайда пайдалануға берілуі қала әкімі Ерлан Айтахановтың қатысуымен өтті. Өз кезегінде қала әкімі «Баршаңызды мейрам алдында жайлы орынға қоныстануларыңызбен құттықтаймын. Елбасы 2023 жылға дейін барлық студенттерді жатақханамен қамту туралы тапсырма берген болатын. Осы бағытта тиісті жұмыстар атқарылып жатыр. Мәселен, осы жылы бүгінгі 240 және 350 орындық екі жатақхана құрылысы аяқталып, Оңтүстік Қазақстан мемлекеттік педагогикалық университетіне пайдалануға берілді. Келесі жылы «Шымкент» ӘКК арқылы 2 500 орындық жатақхана салу жоспарлануда», — деді.
Мемлекеттік-жекешелік әріптестік аясында салынған бұл нысанда студенттер үшін тиісті жағдайдың барлығы жасалған. Ғимарат қажетті құрал-жабдықтармен қамтылған. Онда кітапхана, оқу залы, демалыс бөлмесі, медициналық пункт пен ас бөлмесі бар.
Бүгінде Шымкенттегі Оңтүстік Қазақстан мемлекеттік педагогикалық университетінде 6 мыңға жуық студент білім алады. Оқу орнының ректоры Анар Қайырбекова бұл университет студенттеріне арналған бесінші жатақхана екенін алға тартады. Соңғы нысанның ашылуы оқу ордасындағы студенттердің 100 пайыз жатақханамен қамтылуына ықпал еткен.

Ж. АРМАНОВА.

«2020 жылы Шымкент – ТМД елдерінің мәдени астанасы» болатыны белгілі. Осыған байланысты 2020 жылдың сәуір айынан бастап Шымкентте «Шымкент –ТМД елдерінің мәдени астанасы» жылының ашылу рәсімі салтанатты жағдайда өтеді.

Онда ТМД елдері өнер шеберлерінің мерекелік концерті, «Жібек жолы» ұлттық салт-дәстүр мен заманауи қолөнер көрмесі, «Шымкент – қызғалдақтар қаласы» ТМД және басқа да елдердің суретшілер және фотосуретшілер байқауы болады. Сонымен қатар драма театрлар, анимациялық фильмдер, опера жұлдыздарының фестивалі өткізіледі. Халықаралық ақындар айтысын жоғары деңгейде өткізу жоспары да межеленген. «Шымкент – ТМД елдерінің мәдени астанасы» жылы аясында алғаш рет «Душа Евразии» І-халықаралық эстрада әндерін орындаушылардың фестивалі, ақын-жазушылардың оқырмандармен кездесулері мен тағы басқа 40-тан астам іс-шара ұйымдастырылады.
«Шымкент – Достастықтың мәдени астанасы» жылының салтанатты жабылуы қараша айында болады деп күтілуде.

Қыс мезгілінде дауылды ескертулер туралы хабарламалар жиі таратылады.

Соған қарамастан жолаушылардың алыс жолдарға шығып, қар құрсауында қалып қою жағдайлары жиі кездеседі. Осындай оқыс жағдайларға тап болмас үшін тұрғындар синоптиктердің болжамын қадағалап, көктайғақ, боран мен бұрқасын болады деп хабарланған жолдар туралы ақпараттарға құлақ түріп жүруі қажет. Бұл ретте «Дәрмен» мобильді қосымшасын пайдаланудың тиімділігі көп.
Ақысыз әрі тиімді қосымшада төтенше жағдайлар туралы хабарламалар СМС хабарламаларға қарағанда жылдам келеді. Смартфондар мен планшеттерге арналған мобильді қосымша өз қолданушыларына оқыс жағдайлардың туындауы мен қаупі, ауа райы құбылыстары туралы дер шағында хабар береді. «Дәрмен» қосымшасы қазақ, орыс және ағылшын тілдерінде жұмыс істейді.
Бұл туралы мәліметті Шымкенттегі ақпараттық-коммуникациялық орталықта өткен брифингте қалалық Төтенше жағдайлар департаменті басшысының орынбасары Мадияр Жақсыбаев айтты.
Өз кезегінде ол тұрғындардың облыстық, республикалық маңызы бар жолдардың жай-күйі туралы мәліметті қосымшадан бөлек, «112» немесе 33-74-84 телефондары арқылы да білуге болатынын мәлімдеді.

Тарих қойнауына еніп бара жатқан доңыз жылы «Жастар жылы» ретінде де қорытындыланғаны белгілі. Келешек тұтқасын ұстайтын ұрпақтар үшін осы жылы не тындырылды? 

Бұл ретте ойға келетін ең баянды істердің бірі Нұр-Сұлтан, Алматы және Шымкент қалаларында жұмыс істейтін жастарға сатып алу құқығынсыз жалдамалы бір мың пәтерден берілетіндігі.
Осы аптада Шымкентт қаласының әкімі Ерлан Айтаханов Елбасының тапсырмасымен жалдамалы пәтерге ие болған Шымкент жастарына пәтер кілттерін табыстады. «Жастар жылы» аясында жүзеге асқан бұл бастама бойынша Шымкенттегі 904 жас баспанамен қамтамасыз етілді.
Бұдан бөлек, қоныс тойын тойлағандардың қатарында көп балалы аналарда болды. Жаңа жыл қарсаңы кезінде мегаполистегі 450 көп балалы анаға тұрғын үйдің кілті табысталды. Өз кезегінде қала әкімі Ерлан Қуанышұлы қуаныш иелерін құттықтап, құтты мекендеріне бақыт пен береке орнай беруіне тілектестік білдірді.
Осы жылы Шымкент қаласында бюджет есебінен 27 көпқабатты тұрғын үй пайдалануға беріледі. Онда барлығы 1554 пәтер бар. Тұрғын үйлердің 11-і несиелік болса, 16-сы арендалық болып табылады

Түркістан облысында үш балалар үйі бар. Онда 200-ге жуық өрендер тәрбиеленуде. Солардың бірі Төлеби ауданында орналасқан. Онда ата-ана қамқорлығынан айырылған 60-қа жуық өрен тәрбиеленуде. «Балам дейтін ел болмаса, жұртым дейтін бала қайдан болады» дегендей, оларға әрдайым қамқорлық көрсетіп, мейірім таныту, қолдан келсе көмек беру қайырымды істердің төресі екені баршаға белгілі. Мұндай ілтипат олардың өмірде өз кетігін тауып, қоғам дамуына өзіндік қолтаңба қалдыруына жасалған басты қадамдардың бірі болмақ. Осы мақсатта Түркістан облысының прокуроры Нұрғалым Әбдіров Жаңа жыл мерекесіне Төлеби ауданындағы балалар үйіне бет алып, ондағы өрендерге базарлық жасады.
Мерекелік шара аясында өткізілген мұндай тарту-таралғыға балалар мәз-мейрам болып, шат-шадыман қуанды. Қуанышты еселеу үшін балалар үйінде шырша безендірілді. Түрлі анимациялық фильмдердің кейіпкерлерін сомдаған өнерпаздар да балаларға көтеріңкі көңіл-күй сыйлады. Ал Аяз ата мен Ақшақардың тақпақ айтып, ән салғандарға сыйлық үлестіруі балаларды таңғажайып ертегінің арасында жүргендей әсерге бөледі.

Биыл «Nur Otan» партиясының құрылғанына 20 жыл толып отыр. 

Осы мерзім ішінде билеуші партия дәрежесіне көтерілген «Nur Otan» мемлекетке, жалпы қоғамға үлкен саяси күш ретінде танылса, оның Парламент Мәжілісі мен облыс, қала, аудан мәслихаттарындағы фракциясы жұртшылықтың сөзін сөйлеп, мұң-мұқтажын жоқтайтын, халық пен биліктің бірлігін ұштастыратын буын ретінде қызмет жасап келе жатқанын қалың бұқара жақсы біледі.
«Nur Otan» партиясының ең басты мақсаты – ұлт Тәуелсіздігінің тірегі болу, дамыған 30 елдің қатарынан табылуды көздеген мемлекетіміздің әлеуметтік-экономикалық күш-қуатын еселеуге күш салу. Бүгінде Елбасы, партия Төрағасы Нұрсұлтан Назарбаевтың жетекшілігімен осы бағытта бірқатар нақты стратегиялық міндеттер белгіленіп, оларды жүзеге асырудың тиімді тетіктері белгіленді. Жұмыс жан-жақты, жүйелі жүргізіліп жатыр. Осыған орай, партия Төрағасы соңғы екі айдың ішінде екі рет республикалық көлемде үлкен басқосу өткізді. Екі жиында да Нұрсұлтан Назарбаев елдің дамуы мен халықтың әл-ауқатын арттырудағы «Nur Оtаn» партиясының айрықша рөл атқаратынын атап өтіп, партия мен оның фракцияларының қызметін күшейтуге байланысты жаңа міндеттер жүктеді.
– Біз – ел болашағына жауапты бүкіл Қазақстан халқының партиясымыз, нақты істер партиясымыз. Бізде Қазақстанның дамуына қатысты нақты ұстаным бар, тиісті стратегия мен жұмыс жоспарлары бекітілді, қажетті ресурстар қарастырылған, – деді Елбасы сөйлеген сөзінде.
Партия Төрағасы партия мүшелерін, тұтас қоғамды Мемлекет басшысы алға қойған ұзақ мерзімді міндеттерді жүзеге асыруда белсенділік танытуға және Қасым-Жомарт Тоқаевтың төңірегінде топтасуға шақырды. Елбасының «100 нақты қадам – Ұлт жоспары» мен Президент Қасым-Жомарт Тоқаевтың «Сабақтастық. Әділдік. Өрлеу» атты үш бағыттан тұратын бағдарламасымен сабақтас тапсырмаларды орындау партия филиалдары мен мәслихаттардағы фракциялардың жауапкершілігін арттыра түседі.
Партия үшін адам тағдыры әрқашан бірінші орында тұрады. Депутаттық фракция бюджеттік шығындардың басым бөлігінің әлеуметтік салаға жұмсалуын тұрақты назарда ұстап келеді. Соның нәтижесінде облыста жаңа мектептер, медицина нысандары, балабақшалар, мәдениет сарайлары, спорт алаңдары салынып, қарапайым адамдардың игілігі үшін қызмет етуде. Қаншама тұрғын үйлер бой көтеріп, пәтер кезегінде тұрғандар баспаналы болып жатыр. Мұндай әлеуметтік қолдау барша Түркістан облысы халқына тың күш-жігер беріп, жайлы өмір сүруіне, қоғам дамуы үшін алаңсыз еңбек етуге жұмылдырады деп ойлаймын.
Елбасы «Депутаттар – партияның діңгегі, белсенді электораттың негізі» дей отырып, фракция мүшелеріне азаматтар көтерген тиісті мәселелерді мемлекеттік органдардың қатысуымен нақты шешуде бюрократияға жол бермеуді қатаң тапсырды. Бұл ретте Партиялық бақылау комиссиясы мен Сыбайлас жемқорлыққа қарсы іс-әрекет жөніндегі қоғамдық кеңес құрамына кіретін депутаттардың белсендірек әрекет етуі қажет екенін де ескертті. Түркістан облыстық мәслихатындағы фракция мүшелері өз тарапынан бұл тапсырманы бұлжытпай жүзеге асыруды қолдайды және тұрғындармен, еңбек ұжымдарымен жүйелі кездесу өткізу арқылы халыққа жақын болудың жолдарын берік ұстанады. Тәжірибе көрсеткендей, азаматтармен тікелей жүздесу, ашық пікірлесу тұрғындарды мазалайтын әлеуметтік, тұрмыстық мәселелерді оңды шешуге мүмкіндік береді.
Бұл бағытты «Nur Otan» партиясы Түркістан облыстық филиалының төрағасы, облыс әкімі Өмірзақ Шөкеев филиал қызметкерлерімен тұрақты түрде аппарат жиынын өткізіп, азаматтар ұсынған тақырыптарды ашық талқылау бастамасы баршаның қолдауына ие болды. Төрағаның мемлекеттік орган басшыларына бюрократтық кедергіні жойып, тұрғындардың талап-тілектерін жедел шешіп отыруды тапсыруы фракцияға да жаңа серпін берді. Кейбір шұғыл мәселелер азаматтардың тұрғылықты жерінде, депутаттар мен аудандық әкімдік қызметкерлерінің қатысумен бірлесе шешілетін болды.
Фракция мүшелері партияның «Мектепке жол», «Мобильді халыққа көмек» акцияларына, басқа да іс-шараларға белсене қатысып келеді. «Nur Otan» партиясының басты міндеті қоғамдағы ұзақ мерзімді көшбасшылықты сақтау болғандықтан, фракциямыз Сайлауалды бағдарламада халыққа берілген партия уәдесін орындауды тұрақты назарда ұстайды. Партияның 2030 жылға дейінгі бағдарламасын, «Ардагерлерді ардақтайық», «Кедергісіз келешек», «Мектеп асханаларын жаңғырту» жобаларын, мемлекеттік «Рухани жаңғыру» бағдарламасын жүзеге асыруда жетекшілік жасап, үлгі көрсетуде. Жалпы, «Nur Оtаn» партиясының ортақ рейтингісі барлық деңгейдегі депутаттар жұмыстарының нәтижесінде қалыптасатыны айқын. Әрине, фракциямыз алдағы уақытта да партия талабына сәйкес, әлеуметтік қолдау, жаңа еңбек орындарын ашу, елді дамытуда өзінің көшбасшылық, қадағалаушылық қызметін жалғастыра беретін болады. Партия мен қоғам өзара сенім арқылы бірлесе жұмыс атқарғанда, алар асуымыз бен шығар биігіміз қашан да нәтижелі болмақ. Еліміздің жасампаз істері еселеніп, халқымыздың бақуатты тірлігі арта берсін.

Алмас САЛИМОВ,
Түркістан облыстық
мәслихатының депутаты.