Маңызды

Бұл аптаның келбеті әдеттегідей өтпеді. Сейсенбі түс ауа қаланың әкімі жаңарды. Ғабидолла Әбдірахымов қызметінен босатылып, мегаполис басшысы болып Ерлан Айтаханов тағайындалды. Ол оған дейін Түркістан облысы, Отырар ауданының әкімі болған.

Шыны керек Қазақстанның үшінші алып шаһары саналатын Шымкентке үш рет (авт.: 2015 жылдың тамыз айы, 2018 жылдың маусым айы, 2019 жылдың маусым айында Қазақстан Республикасы Конституциясының 87-бабының 4-тармағына сәйкес қайта тағайындалды) әкім болып тағайындалған Ғабидолла Әбдірахымовтың дәл бұлай «тақтан түсерін» ешкім білмеді. Ондай болжам да болмады.
«Отыз тісінен шыққан» біраз сөзі жұртқа тез тарап, әп-сәтте журналистер материалдарының тақырыптары болып шыға келетін Әбдірахымов түнеукүні Үкіметтің кеңейтілген отырысында «Шымкент қаласын дамытудың 2023 жылға дейінгі кешенді жоспарын» бекітіп, он бағытты қамтитын сол құжатты іс жүзіне асыруға білек сыбана атқаруға кірісіп кеткен еді. Ол аталған мерзімге дейін Шымкенттің ешбір тұрғыны жарық, жылу, ауыз су және көгілдір отын мәселесі үшін көңілдері күпті болмайтынын мәлімдеген-тін.
Таяуда ғана Лондонға барған сапары кезінде Еуропалық реконструкция және даму банкінің өкілдерімен болған келіссөздің түпкілікті мақсатын сол кешенді жоспарда көрсетілген бағыттарды іске асырумен сабақтастырған. Осы сапары кезінде болған сол келіссөзден кейін, бірер тәулік өткеннен соң ол, инстаграм желісі арқылы Лондоннан сәлем жолдап, барша жұртты Қазақстанда еңбек етіп, шетелде демалуға шақырған. Өз кезегінде оның бұл қылығын біраз жұрт «тойып секіредінің» керіне балаған. Кейбір КВН ойыншылары оның бұл әрекеті төңірегінде пародия жасап, онысын әлеуметтік желіге жүктеп жатты.
Ел арасында теріс пікір орнатқан бұл бейнежазбасы үшін Ғабидолла Рахметоллаұлы қандай да бір опық жеймін деп мүлдем ойламағаны анық. Себебі ол, Лондоннан келген бойда кримоногендік ахуалы алаңдатарлық «МЖК» аумағында ай-күннің аманында қараусыз қалған гараж ішінен 3 жасар қызының өлі денесін тауып, қайғыдан қан жұтып отырған шаңыраққа бас сұғып, көңіл айтып, балаларды қараусыз қалдырмас үшін ата-аналар жауапкершілігін арттыруға кірісіп кеткен-тін. Қаладағы бірқатар құрылыс нысандарын аралап, Арыс қаласын қалпына келтіру жұмыстарын пысықтап, сенбілік шараларына қатысып алаңсыз жүрген еді. Бірақ…
Аптаның екінші күні Қазақстан Республикасы Президенті әкімшілігінің басшысы Қырымбек Көшербаев Шымкентке келіп, қала активін шұғыл жинап, Ғабидолла Әбдірахымовты отставкаға жіберіп, Президент Жарлығымен оның орнына Ерлан Айтахановтың тағайындалғанын айтты. Қырымбек Көшербаев Ғабидолла Рахметоллаұлының орнынан алынуын Президент пен Үкімет артқан сенімді толық сезіне алмағанын, сондықтан да оған берілген сенім лимиті таусылғанын жасырмай жайып салды. Және де ол экс-әкімнің әлеуметтік желідегі қылықтары билік талаптарына кереғар келетінін айта келе, шен-шекпенділердің өздерін суда жүзген жайындай еркін ұстауы мемлекеттің абыройын түсіретінін ескертті.
Былайғы жұрт Ғабидолланың қызметтен кетуін оның әлем-жәлем болған әлеуметтік желіде жұрттан ештеңе жасырмай, әр қадамы жөнінде жазба қалдыруынан болды деп болжайды. Ал Қырымбек Көшербаев болса, Әбдірахымовтың бұл белсенділігін ұнамсыз әрекеті деп атап көрсетіп, биліктің оған деген саяси сенім лимитінің неге таусылғанын ашып айтпады. Жұртшылық бұл ауыс-түйісті саяси астары бар шешім деп те жорамалдады. Қайткен күнде де ақиқаттың ауылына қай нұсқаның енетінін тақсыр уақытқа салған дұрыс сияқты.

Экс-әкім топ жарған рейтингтер

«Қызмет қолдың кірі». Әкімдер келеді, кетеді. Бірақ олар халық жадында атқарған тірліктерімен есте қалады. Сонымен 2015-2019 жылдар аралығында Шымкент қаласын басқарған, оның арасында бірнеше ай «Нұр Отан» партиясының хатшысы болған Ғабидолла Рахметоллаұлы ел есінде несімен есте қалды? Және ол халыққа қандай уәде берді?
Әңгімені тым әріден созбай, тек осы жылды ғана қамтып, қозғасақ…
Жыл басында «Стратегия» әлеуметтік және саяси зерттеулер орталығы» қоғамдық қорының сарапшы мамандары еліміздегі 17 өңір әкімдерінің 2018 жылдың екінші жарты жылдығындағы жұмыс тиімділігі рейтінгісін жариялады. Әкімдердің іскерлігі 7 балдық шкала бойынша анықталған бұл рейтингте Ғабидолла Әбдірахымов үшінші орыннан көрінген. Алдын ала жүргізілген сауалнама кезінде халықтың басым көпшілігі экс-әкімнің жұмысын оң бағалайтыны баса айтылған.
Бұдан бөлек, қаңтар айының екінші онкүндігінде отандық БАҚ қай аймақтың әкімі сымбатты екені жөнінде онлайн түрде сауалнама жүргізген. «Еліміздің ең келбетті әкімі кім?» атты бұл сауалнамаға Қазақстан өңірлеріндегі 13 әкімнің суреттері ұсынылған. Сонда Ғабекең ең көп дауыспен (1800 дауыс) бәрінен озып, жеңіс тұғырынан көрінген.

Алға қойған жұмыстар жүзеге асты ма?

Түрлі рейтингте топ жарған экс-әкім жыл басында А. Байтұрсынов көшесі алдағы уақытта Шымкенттегі ең әдемі көше болатынын, ол жерде жаяу жүргіншілер мен велосипедке отырғандар үшін қолайлы жағдайдың барлығы қарастырылатынын баса айтқан. Қазіргі таңда аталған көшеде жұмыстар жүргізіліп жатыр. Мердігер мекемелердің орындаған жұмыстары экс-әкім айтқан болжамдармен қалай дөп келетінін уақыттың өзі көрсетеді.
Жалпы әкім айтқан сөздердің барлығы жүзеге асып жатыр ма әлде жоқ па? Солардың бірқатарына сараптау жасасақ…
Биыл ақпан айының бел ортасында Ғабидолла Әбдірахымов Шымкенттің сол кездегі басшысы ретінде 2018 жылы атқарылған жұмыстарын қорытындылап, алдағы жоспарымен бөлісіп, халыққа бірталай уәде берген.
Мәселен, ол үш ауысымда білім беретін мектеп мәселесі 2021 жылы түбегейлі шешілетінін, қуаты 220 кВ «Бозарық» подстанциясының құрылысы желтоқсанға дейін аяқталып, жарық барлық жерге жететінін мәлімдеген. Бұл бағытта қалада біраз жұмыстар атқарылғанмен, істі аяғына дейін жеткізу қазіргі әкімнің құзырына беріліп отырғаны анық.
Сонымен қатар ол, «Қошқар ата өзені бойында абаттандыру, көріктендіру жұмыстары үшін сүрілетін үйлердің иесімен келіссөз жүргізу кезінде олардың көңілдеріне қаяу түсірмеймін» деген сөзінің үдесінен шыға білген сыңайлы. Себебі, қазіргі таңда бұл бағыттағы жұмыстар ың-шыңсыз атқарылуда. Есеп беру жиыны кезінде Қажымұқан атындағы орталық стадионды УЕФА талаптарына сай қайта қалпына келтіру жұмыстары басталатынын да нық сеніммен айтқан. Алайда ол бойынша нақты жұмыстар қолға алынбады. Бұған кейбір спорт сарапшыларының «Еуропа елдеріне халықаралық талаптарға сай келетін алаңдарды қайта қалпына келтіру былай тұрсын, барлығын басынан бастап салу үшін де мұндай ақша жұмсалмайды» деп пікір білдіруі өзінің әсерін тигізгені құпия емес.
Осы халыққа берген есепті кездесуі кезінде ол көктемде «Асар-2» шағынауданында 1200 орынға лайықталған мектептің құрылысы басталатынын айтқан. Ол дәл көктемде басталмаса да, құрылысы кейіннен қолға алынған. Сондай-ақ ол, осы жылы «Фосфоршылар» емханасына биыл жөндеу жұмыстары қарқын алатынын мәлімдеген. Бірақ онысы сөзден іске көшпеді.

Аквапарк, аурухана…

Қиян-жоян жоспар құрдымға кетпей ме?
Жалпы экс-әкімнің алға қойған жоспары қиян-жоян еді. Айталық ол алдағы екі жылда непалдық миллиардер құйған инвестиция арқылы қалада аттракционы көп аквапарк бой көтерітінін, сингапурлық инвесторлар есебінен «Шымкент сити» қалашығынан бірнеше балабақша мен мектептер салынатынын, тамыз айында тағы да сол инвесторлардың есебінен 1000 орынға лайықталған аурухана мен бір ауысымда 700 адамды қабылдауға қауқарлы консультациялық-диагностикалық орталықтың құрылысы басталатыны және тағы басқа таңдай қақтырарлық жобаларын жұртқа жариялап үлгерген.
Экс-әкім өзіне жүктелген қызметтер мен міндеттердің орындалуы туралы мәслихат депутаттарына берген есебінде жыл аяғына дейін 3625 пәтерде қоныстой болатынын да қадап айтқан. Шымкент қаласы əуежайында жаңа жолаушылар терминалы іске қосылып, нәтижесінде ондағы жолаушылар ағымы 10 есеге артатынын, теміржол вокзалына жаңғырту жұмыстарын жүргізудің арқасында нысан 9 мыңға жуық жолаушыны қабылдай алатын қауқарға жететін жеткізген.
Олардың нәтижесі қалай болары алдағы уақыттың еншісінде.

Ұтырлы сөздері ұпай әкелді

Бұл жылы әкімнің аузынан шыққан біраз сөздері оған зор ұпай әкелді. Мәселен, халыққа 2018 жылы атқарған жұмыстары бойынша есеп беру жиыны кезінде, баяндамасын оқып болғаннан соң «Әдетте, депутаттар жарыссөзге шығып әкімді мақтап жатады. Олай жоғарыға шығып мені мақтаудың қажеті жоқ. Сол үшін де сұрақ-жауапқа тезірек көшейік. Уақытты да тиімді пайдаланайық» дегені тұрғындардың есінен біразға дейін кете қоймады. Жұрт оның бұл сөзін ду қол шапалақпен қолдап, қуаттап жатты. Себебі, депутаттар мен ардагерлердің мінберге шығып әкімдерді әсіре мақтаудан, оны жақсы сөз, жылы қабақпен демеуден халық әлдеқашан жалыққан.
Өткен айда Нұр-Сұлтанда Үкіметтің кеңейтілген отырысынан соң «Шымкентте алып қашу деген ескі дәстүрмен күрес қалай жүріп жатыр?» деп сұрақ жолдаған журналистке, «Бізде қызды еркінен тыс ешкім алып қашпайды. Бұл қала туралы қауесет. Меніңше кейбір қыздардың өздері алып қашқанды қалайтын сияқты» деп жауап қатқан. Оның ел арасына тез тарап, ғаламторға шығып кеткен бұл пікірі адамдардың жүзіне ерекше жымиыс орнатқанын да жаза кетейік.

Олқы тұстар, орындалмаған уәделер

Десе де, оның ағаттық танытқан әрекеттері де болды. Ақпан айында халыққа берген есебі кезінде өзіне сұрақ қою үшін микрофон жанында ұзын-сонар кезекке тұрған әйелдерді байқаған Ғ.Әбдірахымов «күні ертең яғни, сенбі күні сағат 11:00-де әкімдіктің екінші қабатында мен көп балалы аналарды қабылдаймын. Барлық көп балалы аналарды шақырамын. Сұрақтарыңызды сол жерге қойсаңыздар болады»-деп, келесі тәулікте белгіленген жерге айтқан уақытында ат ізін салмағаны біраз тұрғынның ашуын тудырды.
Тағдыры қыл үстінде тұрған балалар теміржолын қайта қалпына келтіру немесе оны сүру жөнінде де қоғамдық тыңдау өткіземін дегені де орындалмады. Көктем келіп, жер қарайған кезде велосипедке отырамын дегені де жәй сөз болып қала берді.
Кәсіпкерлерге аллея салу туралы кеңес берген Әбдірахымов 19-маусым қала күні қарсаңында әнші Қайрат Нұртасқа Шымкент қаласының Құрметті азаматы атағын бергеніне біраз журналистер мен блогерлер сыни пікір білдіргенін де айта кетейік. Блогер демекші қызметінен босаған оған кейбір желі қолданушылары әлеуметтік желідегі белсенділігін пайдалануға шақыруда. Яғни, блогер болу жайында кеңес беруде. Оған да негіз жоқ емес. Себебі, сәуір айында ашылған оның инстаграм парақшасына небары төрт айдың ішінде 200 мыңнан астам адам жазылып үлгерген. Мұндай жазылым жинау кез келгеннің қолынан келе бермейтіні айдан анық. Оған да белсенділік пен ізденістің қажет екені сөзсіз. Оның желідегі белсенділігі биліктегілерге ерсі көрінгенмен былайғы жұртқа сүйкім тудырған.
ТҮЙІН: Шымкенттің экс-әкімі Ғабидолла Әбдірахымов туралы жазылған бұл мақала арқылы біз пәлендей теріс ой тудыруды мақсат етпедік. Басты мақсат оның қол жеткізген жетістігін көрсетіп, жүзеге аспаған жұмыстарын баяндай отырып, оған қазіргі әкім Ерлан Айтахановтың назарын бұру болды. Қызметінен алынған соң Ғабидолла Әбдірахымов қала халқына ризалық білдіріп, әр нәрсенің соңы боларын айтып өткен. Сол сынды ешкім өзіне берілген қызметте өмір бойы қалмайды. Жұмсақ креслода мәңгілік отырмайды. Әкім қаралар кез келген уақытта «аттан ауып, тақтан түсері» анық. Ең бастысы, істелінген жұмыстар жұрт жадында мәңгі сақталатыны ақиқат. Осындай мақсатпен шымкенттіктердің көңілінен шығуға барын салған Ғабидолла Әбдірахымовқа біз тек сәттіліктер серік болсын деп тілейміз.

А. САТЫБАЛДЫ.

Президент Ерлан Айтахановқа қала тұрғындарының өмір сүру сапасын жақсарту туралы пәрмен берді

Президент Қасым-Жомарт Тоқаевтың Жарлығымен Түркістан облысы, Отырар ауданын 3 жыл 6 ай басқарған Ерлан Айтаханов Шымкент қаласының әкімі қызметінен босатылған Ғабидолла Әбдірахымовтың орнын алмастырды. Ерлан Қуанышұлы облыстан бөлініп, дербес қала атанған Шымкенттің мегаполис болып танылғаннан бергі 3-ші әкімі болды.

Ерлан Айтаханов 1971 жылы дүниеге келген. Түркістан облысының тумасы. Экономист, заңгер мамандықтары бойынша жоғары білім алған. Экономика ғылымдарының кандидаты атағы берілген. Еңбек жолын 1994 жылы «Alem Bank Kazakstan» кредит беру департаментінің экономисі болып бастаған. Бірнеше қаржы ұйымдарында абыройлы жұмыс істеген ол біраз уақыт «Қазақстан темір жолы» РМК-да түрлі лауазымдар бойынша қызмет еткен. Әр жылдары Қазақстан Республикасы көлік және коммуникация министрлігі қаржылық реттеу департаменті директорының орынбасары, Қазақстан Республикасы табиғи монополияларды реттеу және бәсекелестікті қорғау агенттігі төрағасының кеңесшісі, Алматы қаласы тарифтер жөніндегі басқармасының бастығы, табиғи монополияларды реттеу және бәсекелестікті қорғау департаментінің директоры, Қазақстан Республикасы Қаржы министрлігі Ақмола облысы бойынша қаржы бақылау инспекциясының бастығы, Оңтүстік Қазақстан облысы әкімінің орынбасары, Қазақстан Республикасы Президенті әкімшілігінің мемлекеттік инспекторы қызметтерін атқарған.
2014 жылдан бастап сол кездегі Оңтүстік Қазақстан облысы әкімінің орынбасары, одан соң Отырар ауданының әкімі болып еңбек еткен.
Қаржы саласының «жілігін шағып, майын ішкен» маман Отырарға әкім болған үш жарым жыл ішінде ауданның әлеуметтік экономикалық дамуына оң серпін бере алған. Яғни, соңғы үш жылда аудандағы бюджеттің бүйірі ұлғайған, тартылған инвестиция көлемі де көбейген. Индустриялық аймақ ашылып, онда кәсіпорындардың жұмыс істеуі жолға қойылған. Ерлан Қуанышұлының бас-көз болуымен білім саласында да оң өзгеріс байқалған. Инфрақұрылымды дамыту бойынша да жақсы нәтиже көрсеткен. Жалпы ол Отырар ауданын басқарған жылдарында барлық салаларға оң өзгеріс енгізе алып, оңай шағылатын маман емес екенін дәлелдеген.
Ал әзірге Ерлан Айтахановтың Шымкентке қандай серпін беретінін айту әлі ерте. Бірақ қызметіне кіріскен алғашқы күннен бастап ол орталықтан шалғай жатқан шағын аудандардағы инфрақұрылым мәселелерін шешуге назар аударып, бюджеттегі қаржы нақты осы бағытқа жұмсалатынын баса айтуда.
Күні кеше ол мемлекет басшысы Қасым-Жомарт Тоқаевтың қабылдауында болды. Өз кезегінде президент Ерлан Қуанышұлының Түркістан облысынан қалаға қосылған елді мекендерге жол салу, газ тарту, жарық және ауыз сумен қамту бойынша жоспарымен танысты. Сондай-ақ ол, қала әкіміне тұрғындардың өмір сүру сапасын арттыру бойынша нақты тапсырма берді.
Ерлан Айтахановтың бұл талаптың үдесінен қалай шығатыны келер күннің еншісінде.

М. Әбдірайым.

Жаңа оқу жылы да таяп қалды. Ата-аналардың мектепке баратын баласының оқу құралы мен киім-кешегін түгендеудің қамымен жүргенде тамыздың қалай түгесілгені де байқалмай қалады. Балаларды мектепке дайындау жүрдім-бардым қарайтын іс емес. Ол үлкен жауапкершілікті талап ететін тірлік. Жуырда еліміздің бас санитарлық дәрігері Жандарбек Бекшиннің мектеп формасы мен оқушылар ұстайтын сөмкенің қандай болуы керектегі туралы тапсырмасы соған дәлел.

Өз кезегінде ҚР Қоғамдық денсаулық сақтау комитетінің төрағасы Жандарбек Бекшин балалар дәріс кезінде ештеңеге алаңдамас үшін ыңғайлы әрі сапалы киімдерді алу керектігі жөнінде кеңес білдірді. Ол киім маталарының 75-85 пайызы мақта, жүн және тағы басқа табиғи өнімнен тұруы керектігін, ал синтетикалық қоспасының құрамы 25 пайыздан әрі аспауы қажеттігін ескертті. Синтетикалық құрамы одан жоғары матадан ауа өтпейтінін, оның салдары түрлі аллергиялық аурулардың пайда болуына әкеп соқтыратынын құлағдар етті.
Сонымен қатар ол, мектеп жасындағы балаларға қолда ұстайтын портфель емес, рюкзак алып беруді де баса айтты. Себебі қолмен ұстайтын портфельдер буыны әлі толық қатайып үлгермеген баланың тұла бойын бір жағына қарай еңкіш тартқызуы мүмкін екенін жасырмады.
Соңғы жылдары мектепте білім алатын балалардың, әсіресе бастауыш сыныптарда оқитын оқушылардың сөмкесі айтарлықай ауыр екені жиі айтылып келеді. Ол мәселе етіп қанша рет көтерілген. Бірақ білім алу емес, сөмкені көтеру мұңға айналған оқушылардың бұл жай-күйіне әлі күнге дейін нүкте қойылмай келе жатқаны анық. Бұл көз жұма қарайтын мәселе емес. Бұған Жандарбек Бекшиннің төмендегі мәлімдемесі айғақ.
– Мектеп сөмкесінің салмағы оқушының бойы мен жас ерекшелігіне сай болуы шарт. Мәселен, 1-3 сынып оқушыларының сөмкесі 2 келіден аспауы тиіс. 4-5 сыныпта – 2,5 келі, 6-7 сыныпта – 3,5 келі, ал жоғары сынып оқушылырының сөмкесі 4,5 келіден артық болмауы қажет. Ауыр рюкзактың салдарынан сколиоз, остеохондроз сияқты аурулардың туындайтынын ұмытпауымыз тиіс.
Ал тиісті мекемелер Бекшиннің бұл талабын биыл ескеретініне сену қиын.

Қ. ҚАЛИЕВ.

Қазақстан шетелдік мигранттар үшін тартымды мемлекеттердің біріне айналып отыр. Еңбек мигранттардың қай елде еңбек етуге көңіл құсы ауатыны анықталатын «Жаһандық таланттар нарығын талдау 2018» рейтингісінде еліміздің 77-орыннан көрінуі соған негіз. Бұл рейтингте Қазақстан 2014 жылы 129-орыннан көрінген болатын.
Жалпы өткен жылы 434 мың еңбек мигранттарына ел аумағында жұмыс істеуге рұқсат берілген екен. Ел аумағында еңбек ететін шетелдік азаматтардың ішінде Әзірбайжан, Армения, Грузия, Молдава, Тәжікстан, Өзбекстан және Украина азаматтарының қатары қалың екені байқалған. Өткен жылдың қорытындысы бойынше шетелдік мигранттардан бюджетке 6,2 млрд. теңге түскен.
Ал 2019 жылдың қаңтар-мамыр айларында көші қон қызметі арқылы елімізде 160 мыңнан астам еңбек мигранты тіркелген.

Қ. ҚАЛИЕВ.

Қарапайымдылық қасиет әрдайым көптің сүйкімін тудыратыны сөзсіз. Бейсенбі күні мемлекет басшысы Қасым-Жомарт Тоқаев өзінің твитінде Шымкенттен шығарылатан аяқ киімге тапсырыс беріп, сатып алғанын жазған. Бұдан хабардар болған «Спутник кз» сайтының журналистері зерттеуге кірісіп, президент алған аяқ киімнің құнын анықтаған.

Сөйтіп, компания өкілімен байланысқа шығып, одан телефон арқылы тиісті мәліметтерді сұраған. Өз кезегінде компания өкілі Қасым-Жомарт Тоқаев тапсырыс берген өнімнің бағасы 21 мың теңгені құрағанын, оның таңдауы қоңыр түсті былғары мезгіларалық туфлиге түскенін айтқан.
Сондай-ақ ол, Президент таңдаған туфлилерді шығаратын компанияның Елордада дүкені жоқ. Бірақ бұл сауда-саттық жасауға ешқандай кедергі тудырмайтынын, тапсырыс берсе, өнімдерін Қазақстанның барлық өңірлеріне, тіпті Ресей еліне дейін жеткізіп беруге қауқарлы екендіктерін хабарлаған.
Президент отандық өнімді қолдау бағытындағы бұл іске «Айқын» газетінде етік тігетін жас кәсіпкер туралы сұхбатты оқыған соң, бел буғанын жасырмаған.
Естеріңізге сала кетсек, жуырда президент Қасым-Жомарт Тоқаевтың баспасөз хатшысы Берік Уәли «Айқын» басылымын президенттің ең сүйікті мерзімді басылымдарының бірі болып табылатынын ашық айтқан-тын.
Жалпы мемлекет басшысы тиімді бағада босатылатын отандық өнімдерге осылай таңдау жасауы алғаш болып жатқан жағдай емес. Ол бұған дейін де ресейлік журналистерге берген сұхбаты кезінде отандық өндірістен шыққан галстуктерді тағатынын тілге тиек еткен болатын.

М. Әбдірайым.

Шымкент қаласы, Әл-Фараби ауданында санитарлық талаптардың сақталуы әрдайым жергілікті биліктің назарында болады. Бұл үшін аудан 7 учаскеге бөлінген.

Әр учаскеге аудан әкімі аппаратының жауапты мамандары мен тазалау жұмыстарымен шұғылданатын мердігер мекемелер бекітілген. Егер де аудан тұрғындары иісі қолқаны қабатын үйілген күл қоқысты, санитарлық ахуалы сын көтермейтін жерлерді байқаса өздерінің аумағына бекітілген әкімдік қызметкерлеріне немесе мердігер мекемелерге байланысқа шығуына әбден болады. Бұл үшін Әл-Фараби ауданының диспетчерлік байланыс нөміріне, атап айтқанда, 54-96-54 хабарласу қажет.
Бұл туралы Әл-Фараби ауданының әкімі Ғабит Мәуленқұлов өзінің инстаграм аккаунтында @gabit_maulenkulov хабарлаған. Сонымен қатар ол, бұл жазбасында осы бағытта қолға алынған 7 учаскенің карталық сызбасы мен оған жауапты мамандар көрсетілген суреттерді де жариялаған.

М. Әбдірайым.

Ағымдағы жылдың 6 айында Шымкент қалалық сотының азаматтық істер жөніндегі сот алқасына 15 196 талап-арыз түскен. Келіп түскен талап-арыздардың саны 2018 жылдың сәйкес мерзімімен салыстырғанда 23 пайызға артқан.

Бұл туралы Шымкент қалалық сотының азаматтық істер жөніндегі сот алқасының төрағасы Мұхтар Парменов мәлімдеді.
Ол Шымкент қаласының аудандық және оларға теңестірілген соттарына келіп түскен 15 мыңнан астам талап-арыздың 905-і медиация тәртібімен аяқталғанын айтты. Бұл келіп түскен барлық талап-арыздардың 12,2 пайызын құрайды.
Сонымен қатар, қалалық соттың қылмыстық істер жөніндегі сот алқасының төрағасы Ербол Жанғазин ағымдағы жылдың І жартыжылдығы жөнінде де мәлімет таратты. Ол есепті кезеңде қаладағы соттарға 1310 қылмыстық іс түсіп, бұл былтырғы 6 аймен салыстырғанда 1,8%-ға көп екенін алға тартты. Және де ол, қылмыстық істерді қарауда сот төрелігінің сапасы арта түскенін, сөйтіп алты айда шығарылған сот актілерінің саны өткен жылмен салыстырғанда 17,7% артқанын жеткізді.

М. Әбдірайым.

Шымкентте жолаушылар ағыны өзге қалалармен салыстырғанда айтарлықтай көп. Жергілікті билік тұрғындарға көсетілетін қызметті сапалы ету мақсатында 2019-2020 жылдары су жаңа 1000 автобустың келетінін уәде еткен болатын. 19-маусым қала күні қарсаңында сол автобустардың 160 жеткізілген-тін. Жүзден астам бұл жаңа техникалар қаладағы қоғамдық көлік бағытына шығарылуда.
Осы аптада Шымкентте №16, №45 автобус бағыттары ашылды. Қалалық жолаушылар көлігі және автомобиль жолдары басқармасы аталған автобустардың бағыт сызбасы орталықтан шалғай жатқан шағынаудандарды қамтығанын алға тартуда. Айталық, №45 автобустың жол жүру сызбасы «Достық» шағынауданынан басталып, «Бекжан» базарынан өтеді. Содан соң, Ю. Гагарин көшесін бойлай, Республика, Тәуке хан даңғылдары арқылы жүріп өтіп, Ж. Тәшенов көшесінен Төле би көшесінедегі «Орталық базарға» аялдап, ары қарай теміржол вокзалына барады.
Ал №16 қоғамдық көлігі жолаушыларды “Shymkent bus” – Ферма» бағыты бойынша тасымалдайтын болады.

М. Әбдірайым.

Шымкенттің жаңадан тағайындалған әкімі Ерлан Айтаханов алғашқы жұмыс сапарын қаланың орталығына шалғай жатқан шағын аудандарға барып, ондағы инфрақұрылым жұмыстарымен танысқан болатын. Мегаполис басшысы одан кейінгі кезекті сапарын апаттан соң қайта қалпына келтіру жұмыстары жүргізіліп жатқан Арыс қаласына арнады.

Ең әуелі ол қалпына келтіру жұмыстары 17 секторға бөлініп жүргізіліп жатқан шағын қаладағы Шымкент штабының жұмысымен танысты.
Атқарылып жатқан жұмыстарды көзбен көру үшін 10-секторды аралады. Оннан астам мердігер мекемелер мен 600-ден астам маман жұмылдырылған Шымкент секторында барлығы 652 тұрғын үй бар. Оның 604-і жөндеу жұмыстарын талап етсе, отыздан астамы қайта салынуды қажет етеді. Қайта салынатын үйлер алдағы екі ай ішінде толық аяқталып, пайдалануға берілетін болады.
Ағымды және күрделі жөндеуден өтетін жүздеген үйлерді ретке келтіру үшін жұмысшылар үш ауысыммен жұмыс істеуде.
Осыдан бір жеті бұрын Шымкент өңіріне тиесілі 10-секторда барлығы 161 үйдің жөндеу жұмыстары аяқталған болатын. Шымкент қаласы әкімінің орынбасары, штаб басшысы Б. Мамыталиев бүгінде олардың саны 225-ке жеткенін мәлімдеуде. Тәулік бойы жүріп жатқан тынымсыз тірліктің арқасында бұл бағыттағы жұмыстарды тамыздың орта шеніне дейін аяқтау жоспарлануда.
Сапар барысында құрылыстың басы-қасында жүрген жауапты мамандарға қала әкімі Ерлан Айтаханов шағын қаланы қалпына келтіру мемлекет басшысының назарында екенін, сондықтан да жұмысты тиянақты, тыңғылықты, ең бастысы, сапалы етіп жүргізуді тапсырды.
Ал жергілікті тұрғындар болса, 10-сектордағы жұмысшылардың тірлігінде шикілік жоқ екенін айтып, оң бағасын берді.

М. Әбдірайым.

Шымкент мегаполис болғанмен, орталықтан шалғай жатқан шағын аудандарда әлі жарық, жол, ауыз су және көгілдір отын мәселесі түбегейлі шешімін таппағаны жасырын емес. Бұл мәселені шешу мақсатында қазіргі таңда қаладағы «Асар-2», «Ақжар» және «Достық» шағынаудандарында инженерлік инфрақұрылым жұмыстары жүргізілуде.

Мәселен, 11 мыңға жуық тұрғыны бар «Асар-2» шағынауданын сапалы жарықпен қамтамасыз ету үшін құрылыс монтаж жұмыстары жүргізілуде. Алдағы қыркүйек айында шағынаудандағы 2765 тұрғын үйге жарық беріле бастайды. Электр желілерінің жалпы ұзындығы 87,1 шақырымға жалғасады. Бұдан бөлек асарлықтарды ауыз су, көгілдір отын кәріз жүйелерімен қамтамасыз ету үшін тиісті жобалық-сметалық құжаттар дайындалуда. Аталған шағын ауданда қоғамдық көлік мәселесі өзекті болып тұр. Сала мамандары ол үшін жолдарға асфальт төсеу жұмыстары жолға қойылуы керектігін айтуда. Осы бағытта барлығы 4,9 шақырымға жалғасатын бірқатар көшелерге (атауы жоқ №8 көшеден А-2 автожолына дейінгі аралықта) асфальт төсеу үшін құрылыс жұмыстары жоспарланып, оны қыркүйек айына дейін аяқтау межеленген. Жалпы алдағы уақытта «Асар-2» шағынауданында 47 шақырымды құрайтын жолға асфальт төсеу мақсат етілген. Ал аудандағы 3000-ға жуық үйге 2021 жылға дейін көгілдір отын жеткізілетін болады.
Сонымен қатар, «Ақжар» шағынауданына ауыз су жүйесі мен электр желілері тартылмақ. Келер жылы газ құбыры мен кәріз жүйесінің құрылысы қарқын алмақ.

М. Әбдірайым.