СЫҢҒЫРЛАҒАН ҚОҢЫРАУ ЖАҢА ОҚУ ЖЫЛЫНА ШАҚЫРДЫ

«Білімді ұрпақ – ел болашағының берік іргетасы» деген Мемлекет басшысы Қасым-Жомарт Тоқаевтың сөзі – әрбір жаңа оқу жылының мәні мен маңызын айқындайтын даналық тұжырым. Шын мәнінде, жас ұрпақтың білімді, саналы, отаншыл болып қалыптасуы – мемлекеттің ертеңгі күніне салынған берік іргетас. Осы орайда 1 қыркүйек – барша ата-ана, ұстаздар мен оқушылар үшін қуаныш пен толқу сезімін тоғыстыратын мерейлі күн. Дәл осы күні Шымкент қаласындағы Мұхамед Хайдар Дулати атындағы №8 мектеп-гимназиясында алғашқы қоңырау соғылып, жаңа оқу жылы басталды.

Мектеп ауласы бұл күні ерекше шаттыққа бөленді. Қолына гүл ұстаған бүлдіршіндер мен толқып тұрған ата-аналар, жүрегі лүпілдеген түлектер – барлығы да алғашқы қоңыраудың үніне құлақ түріп, жаңа бастаманың куәсі болды. Мектеп сахнасына шыққан жоғары сынып оқушылары болашаққа қадам басар шақтың таяп қалғанын сезгендей. Бұл – әр түлектің жүрегіне алабөтен әсер сыйлайтын, көңілге қимастық ұялататын сәт. Биыл бұл алтын ұяны 143 түлек тәмамдамақ. Олардың 14-і «Алтын белгіге» үміткер атанып отыр. Бұл көрсеткіш – мектептің білім сапасының жоғары екенін айғақтайды. Өткен оқу жылында да бұл білім ошағы үлкен жетістікке жеткен еді. Тарқатсақ, 198 түлектің 25-і мемлекеттік аттестаттауды «Алтын белгімен» аяқтады. Мұндай табыстар кездейсоқ емес. Ол – ұстаздардың қажырлы еңбегі мен оқушылардың үздіксіз ізденісінің нәтижесі. Алғашқы қоңырау салтанатының тағы бір маңызды бөлігі – мектеп табалдырығын алғаш аттаған бүлдіршіндер. Биыл №8 мектеп-гимназиясына 111 жаңа оқушы қабылданып отыр. Олардың жүрегіндегі толқу, көзіндегі үміт – ата-ана үшін де, ұстаз үшін де үлкен жауапкершілік. Себебі әрбір бала – ел болашағы, ал олардың білім жолындағы алғашқы қадамдары – мемлекет дамуының жаңа парағы.
№8 мектеп-гимназиясы – талай буынға білім нәрін дарытып, елге еңбегі сіңген азаматтарды тәрбиелеп шығарған киелі шаңырақ. Бұл мектептен түлеп ұшқан түлектердің арасында түрлі салада абыройлы қызмет атқарып жүрген жандар аз емес. Сондықтан да алғашқы қоңыраудың сыңғыры тек жаңа оқу жылының басталғанын ғана білдірмейді, ол – ұстаз бен шәкірттің, ата-ана мен қоғамның ортақ үмітін бір арнаға тоғыстырған үн. Мектептің ерекшелігі – оқушыларды тек академиялық біліммен ғана қаруландырып қоймай, олардың тұлғалық дамуына, шығармашылық қабілеттерін шыңдауға да ерекше көңіл бөлуінде. Оқу ордасының қабырғасынан әртүрлі олимпиада жүлдегерлері, спорттық жарыстарда топ жарған оқушылар, өнер сайыстарында озық шыққан дарындар қанат қағып келеді. Бұл – мектептің жан-жақты білім мен тәрбие беру бағытындағы жүйелі жұмысының айғағы. Ұстаздар ұжымы да бұл күні шәкірттеріне ақ жол тілеп, жаңа оқу жылындағы сәттілік пен табысқа ниеттестігін білдірді. Ұстаздың еңбегі – қоғамдағы ең жауапты әрі қадірлі қызмет. Себебі олар жас ұрпаққа тек білім ғана емес, өмірлік бағдар, адами құндылықтарды дарытады. №8 мектеп-гимназиясының педагогикалық құрамы осы миссияны абыроймен атқарып келеді.
Алғашқы қоңыраудың сыңғыры – болашақтың бастауы. Бұл – баланың өмірінде мәңгі есте қалар сәт. Әрбір бірінші сынып оқушысы мектеп табалдырығын аттаған кезде жаңа өмір кезеңін бастайды, ал әрбір түлек үшін бұл күн – болашаққа қадам басар алғашқы баспалдақ. Мұндай мерекелік сәттер елдің білім беру жүйесіне деген сенімді күшейтіп, ата-ана мен қоғамды ортақ мақсатта біріктіреді. Президент Қасым-Жомарт Тоқаев айтқандай, «Білімді ұрпақ – ел болашағының берік іргетасы». Мұхамед Хайдар Дулати атындағы №8 мектеп-гимназиясының алғашқы қоңырауы осы сөздің өміршеңдігін тағы да дәлелдеді. Мұнда жас ұрпаққа тек білім ғана берілмейді, олардың елін сүйетін, отбасына қамқор, адал да парасатты азамат болып қалыптасуына жағдай жасалады. Алғашқы қоңырау – жай ғана оқу жылының басталуы емес. Ол – ата-ананың арман-үміті, ұстаздың қажырлы еңбегі, оқушының жарқын болашағы. №8 мектеп-гимназиясы осы үштағанды ұштастырып, қоғам дамуына өз үлесін қосып келеді. Ендігі міндет – жаңа оқу жылында қойылған биік мақсаттарға қол жеткізіп, білімді де тәрбиелі ұрпақ тәрбиелеу.