БИЫЛ ШАРУАЛАРҒА 700 МЛРД ТЕҢГЕ ЖЕҢІЛДЕТІЛГЕН КРЕДИТ БЕРІЛЕДІ

Қазақстан – кең байтақ жері мен құнарлы топырағы бар аграрлық мемлекет. Елдің климаты әртүрлі болғанымен, ауыл шаруашылығына қолайлы аймақтары жеткілікті. Әсіресе, Солтүстік Қазақстан, Қостанай, Ақмола және Павлодар облыстары егін шаруашылығының негізгі орталықтары болып саналады. Қазақстанның егін шаруашылығының басты артықшылықтарының бірі – жер ресурстарының молдығы. Елімізде бидай, арпа, сұлы, жүгері және күнбағыс сияқты дақылдар өсіріледі. Әсіресе, қазақстандық бидай әлемдік нарықта жоғары сапасымен ерекшеленеді.

Дегенмен, егін шаруашылығын дамытуда белгілі бір қиындықтар да кездеседі. Климаттық өзгерістер, құрғақшылық және су тапшылығы ауыл шаруашылығы саласына айтарлықтай әсер етеді. Сондықтан заманауи технологияларды енгізу, тамшылатып суару жүйелерін дамыту және ғылыми зерттеулерді күшейту маңызды. Осы орайда, биыл елімізде 8 млн га жерге егін егу жоспарланып отыр. Егін маусымына дайындық жұмыстары туралы Ауыл шаруашылығы министрі Айдарбек Сапаров айтып берді. Сөзінше, көктемгі егіс жұмыстарына жеңілдетілген кредит көлемі — 700 млрд теңге. Егіс науқанын қаржыландыру былтыр қараша айында басталды. Фермерлер субсидиясыз, таза 5 пайызбен жеңілдетілген кредиттер алып жатыр. Бүгінде 206 млрд теңгеге 1,8 мыңнан астам шаруашылық қаржыландырылды. Сонымен қатар қарыз сомасының 85 пайызына кепілдік беру бағдарламасының іске асырылуы жалғасады. 200 млрд теңге сомасына жеңілдетілген лизингті ұйымдастыру отандық техниканың 6 мың бірлігін сатып алуға мүмкіндік береді.
Қазір 3,2 мың шаруадан 130 млрд теңгеге 5 мың техниканы сатып алуға өтінім келіп түскен. Осы орайда, «Көктемгі егіс жұмыстарын қаржыландыруға әлеуметтік кәсіпкерлік корпорациялардың қосылуы кредит берудегі қолжетімділіктің маңызды факторы болды. Өткен жылы бұл бағдарламаға 7 әлеуметтік кәсіпкерлік корпорация қатысты, бірақ бүгінде тек 4 корпорация қатысып жатыр. Бұл жағдай шаруалардың арасында наразылық тудырып жатыр. Осыған байланысты, облыс әкімдіктеріне әлеуметтік кәсіпкерлік корпорация арқылы шаруаларды қаржыландыру жұмыстарын күшейту керек. Ауыл шаруашылығын қаржыландыруды кеңейту үшін қаржы институттарын тікелей субсидиялау енгізіледі. Биыл аграрлық несие корпорациясы арқылы 48 млрд теңге өңдеу кәсіпорындарын қолдау үшін айналым қаражатына беріледі» деп атап өтті ведомство басшысы.